ନୂଆଦିଲ୍ଲୀ: ଚାଇନାରେ ହ୍ୟୁମାନ୍ ମେଟାପ୍ନୁମୋଭାଇରସ୍ (hMPV) ର ଶୀଘ୍ର ବିସ୍ତାର ହେବା ଭୟକୁ ଆହୁରି ବଢାଇ ଦେଇଛି। କାରଣ ଏହା କରୋନା ଭାଇରସ ପରି ମହାମାରୀର ରୂପ ନେଇପାରେ। ଭାରତରେ ମଧ୍ୟ ଏହା ଉପରେ କଡା ନଜର ରଖାଯାଉଛି। ବର୍ତ୍ତମାନ ଘଟଣାକ୍ରମରେ ଭାରତ ସରକାର କହିଛନ୍ତି ଯେ, ଏହି ଭୂତାଣୁକୁ ମୁକାବିଲା କରିବା ପାଇଁ ଭାରତ ସମ୍ପୂର୍ଣ୍ଣ ପ୍ରସ୍ତୁତ ଅଛି ଏବଂ ଭୟଭୀତ ହେବାର କୌଣସି ଆବଶ୍ୟକତା ନାହିଁ। ଏଥି ସହ ତେଲେଙ୍ଗାନା ସରକାର ନିର୍ଦ୍ଦେଶାବଳୀ ଜାରି କରିଛନ୍ତି। ତେବେ ଏପର୍ଯ୍ୟନ୍ତ ରାଜ୍ୟରେ କୌଣସି ମାମଲା ରୁଜୁ ହୋଇନାହିଁ।
ତେଲେଙ୍ଗାନା ରାଜ୍ୟ ସ୍ୱାସ୍ଥ୍ୟ ମନ୍ତ୍ରଣାଳୟ ସ୍ପଷ୍ଟ କରିଛି ଯେ, ଚାଇନାରୁ ହ୍ୟୁମାନ ମେଟାପ୍ନୁମୋଭାଇରସ୍ (ଏଚଏମପିଭି) ଖବରକୁ ନେଇ ରାଜ୍ୟ ସଜାଗ ରହିଛି ଏବଂ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟର ସହଯୋଗରେ ପରିସ୍ଥିତି ଉପରେ ନଜର ରଖିଛି। ଗୁଜବକୁ ଏଡ଼ାଇବା ପାଇଁ ଏବଂ ସତର୍କତା ଅବଲମ୍ବନ କରିବାକୁ ସ୍ୱାସ୍ଥ୍ୟ ବିଭାଗ ନାଗରିକମାନଙ୍କୁ ନିବେଦନ କରିଛି।
ତେଲେଙ୍ଗାନାରେ hMPV ର କୌଣସି ମାମଲା ରେକର୍ଡ ହୋଇନାହିଁ:
ତେଲେଙ୍ଗାନା ସ୍ୱାସ୍ଥ୍ୟ ବିଭାଗ ରାଜ୍ୟରେ ଶ୍ଵାସକ୍ରିୟା ସଂକ୍ରମଣ ସମ୍ବନ୍ଧୀୟ ତଥ୍ୟ ବିଶ୍ଳେଷଣ କରି ଜାଣିବାକୁ ପାଇଛି ଯେ, ଡିସେମ୍ବର 2024 ତୁଳନାରେ ଡିସେମ୍ବର 2023 ରେ ସଂକ୍ରମଣ କ୍ଷେତ୍ରରେ କୌଣସି ବିଶେଷ ବୃଦ୍ଧି ଘଟିନାହିଁ।
ସତର୍କତା ନିର୍ଦ୍ଦେଶ:
ଶ୍ଵାସକ୍ରିୟା ସଂକ୍ରମଣକୁ ରୋକିବା ପାଇଁ ସ୍ୱାସ୍ଥ୍ୟ ବିଭାଗ ନାଗରିକମାନଙ୍କୁ ନିମ୍ନଲିଖିତ ସତର୍କତା ଅବଲମ୍ବନ କରିବାକୁ ଅନୁରୋଧ କରିଛି ଏବଂ ନିର୍ଦ୍ଦେଶାବଳୀ ଜାରି କରିଛି-
କଣ କରିବେ:
– କାଶ କିମ୍ବା ଛିଙ୍କିବା ସମୟରେ ପାଟି ଏବଂ ନାକକୁ ରୁମାଲ କିମ୍ବା ଟିସୁରେ ଘୋଡାନ୍ତୁ।
– ସାବୁନ୍ ଏବଂ ପାଣିରେ ବାରମ୍ବାର ହାତ ଧୋଇ ଦିଅନ୍ତୁ କିମ୍ବା ଏକ ଆଲକୋହଲ ଭିତ୍ତିକ ସାନିଟାଇଜର ବ୍ୟବହାର କରନ୍ତୁ।
– ଜନଗହଳି ପୂର୍ଣ୍ଣ ସ୍ଥାନରୁ ଦୂରେଇ ରୁହନ୍ତୁ ଏବଂ ଫ୍ଲୁରେ ଆକ୍ରାନ୍ତ ଲୋକଙ୍କଠାରୁ ଦୂରତା ବଜାୟ ରଖନ୍ତୁ।
– ଯଦି ଆପଣଙ୍କର ଜ୍ୱର, କାଶ କିମ୍ବା ଛିଙ୍କ ଅଛି ତେବେ ସର୍ବସାଧାରଣ ସ୍ଥାନକୁ ଯିବା ଠାରୁ ଦୂରେଇ ରୁହନ୍ତୁ।
– ପର୍ଯ୍ୟାପ୍ତ ପରିମାଣର ପାଣି ପିଅନ୍ତୁ ଏବଂ ପୁଷ୍ଟିକର ଖାଦ୍ୟ ଖାଆନ୍ତୁ।
– ସମସ୍ତ ସ୍ଥାନରେ ପର୍ଯ୍ୟାପ୍ତ ଭେଣ୍ଟିଲେସନ୍ ନିଶ୍ଚିତ କରନ୍ତୁ।
– ଅସୁସ୍ଥ ହେଲେ ଘରେ ରୁହନ୍ତୁ ଏବଂ ଅନ୍ୟମାନଙ୍କ ସହିତ ସମ୍ପର୍କ ସୀମିତ କରନ୍ତୁ।
– ଯଥେଷ୍ଟ ଶୁଅନ୍ତୁ।
କରନ୍ତୁ ନାହିଁ:
– ହାତ ମିଳାଇବା ଠାରୁ ଦୂରେଇ ରୁହନ୍ତୁ।
– ବାରମ୍ବାର ଟିସୁ ପେପର କିମ୍ବା ରୁମାଲ ବ୍ୟବହାର କରନ୍ତୁ ନାହିଁ।
– ଅସୁସ୍ଥ ଲୋକଙ୍କ ସଂସ୍ପର୍ଶରେ ଆସନ୍ତୁ ନାହିଁ।
– ବାରମ୍ବାର ଆଖି, ନାକ ଏବଂ ପାଟି ଛୁଇଁବା ଠାରୁ ଦୂରେଇ ରୁହନ୍ତୁ।
– ସର୍ବସାଧାରଣ ସ୍ଥାନରେ ଛେପ ପକାଇବା ଠାରୁ ଦୂରେଇ ରୁହନ୍ତୁ।
– ଡାକ୍ତରଙ୍କ ପରାମର୍ଶ ବିନା ଔଷଧ ସେବନ କରନ୍ତୁ ନାହିଁ।
କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ କ’ଣ କହିଛି?:
ଚାଇନାରେ HMPV (ହ୍ୟୁମାନ୍ ମେଟାପ୍ନୁମୋଭାଇରସ୍) ବିସ୍ତାର ହେବାର ସମ୍ଭାବନାକୁ ନେଇ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଲୋକଙ୍କୁ ଶାନ୍ତ ରହିବାକୁ ଅନୁରୋଧ କରିଛି ଏବଂ ଚୀନ୍ର ପରିସ୍ଥିତି ଅସ୍ୱାଭାବିକ ନୁହେଁ ବୋଲି ଆଶ୍ୱାସନା ଦେଇଛନ୍ତି।
ଭାରତ ସରକାରଙ୍କ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ (MoH & FW) ର ଡିଜିଏସ୍ଏସ୍ ଏବଂ ନ୍ୟାସନାଲ ସେଣ୍ଟର ଫର ଡିଜିଜ କଣ୍ଟ୍ରୋଲ (NCDC) ର ନିର୍ଦ୍ଦେଶକ ଏକ ବିବୃତ୍ତି ଦେଇଛନ୍ତି। ବିବୃତ୍ତିରେ କୁହାଯାଇଛି ଯେ, ମେଟାପ୍ନୁମୋଭାଇରସ୍ (hMPV) ହେଉଛି ଏକ ସାଧାରଣ ଶ୍ଵାସକ୍ରିୟା ସଂକ୍ରମଣ ଜୀବାଣୁ, ଯାହା ଶୀତ ଋତୁରେ ଥଣ୍ଡା ଏବଂ ଫ୍ଲୁ ଭଳି ଲକ୍ଷଣ ସୃଷ୍ଟି କରିଥାଏ। ଏହା ବିଶେଷତଃ ଛୋଟ ପିଲା ଏବଂ ବୃଦ୍ଧଙ୍କୁ ପ୍ରଭାବିତ କରିଥାଏ।
ସ୍ୱାସ୍ଥ୍ୟ ସେବା ମହାନିର୍ଦ୍ଦେଶକ (ଡିଜିଏଚ୍ଏସ୍) ଡକ୍ଟର ଅତୁଲ ଗୋୟଲ କହିଛନ୍ତି ଯେ, ଭୟଭୀତ ହେବାର କୌଣସି ଆବଶ୍ୟକତା ନାହିଁ। ମେଟାପ୍ନୁମୋଭାଇରସ୍ ଅନ୍ୟ ଶ୍ଵାସକ୍ରିୟା ଜୀବାଣୁ ପରି ଯାହା ସାଧାରଣ ଥଣ୍ଡା ସୃଷ୍ଟି କରେ; ଏହା ବୃଦ୍ଧ ଏବଂ ଯୁବକମାନଙ୍କଠାରେ ଫ୍ଲୁ ଭଳି ଲକ୍ଷଣ ସୃଷ୍ଟି କରିପାରେ।
