ନୂଆଦିଲ୍ଲୀ: ଆମ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜରିୱାଲ ଆଜି ବିଜେପି ପ୍ରାର୍ଥୀ ପରବେଶ ବର୍ମାଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ, ବର୍ମା ନିଜ ଘରେ ଖୋଲାଖୋଲି ଟଙ୍କା ବାଣ୍ଟୁଛନ୍ତି। ନିର୍ବାଚନ କମିଶନ ବର୍ମାଙ୍କୁ ନିର୍ବାଚନ ଲଢ଼ିବାରୁ ରୋକିବା ଉଚିତ ଏବଂ ତାଙ୍କ ଘରେ କେତେ ଟଙ୍କା ଅଛି ତାହା ଜାଣିବା ପାଇଁ ତାଙ୍କ ଘରେ ଚଢାଉ କରାଯିବା ଉଚିତ ବୋଲି ସେ କହିଛନ୍ତି।
ଏ ନେଇ ଅରବିନ୍ଦ କେଜ୍ରିୱାଲଙ୍କ ସମେତ ଆମ ଆଦମୀ ପାର୍ଟିର ନେତାମାନେ ଆଜି ସନ୍ଧ୍ୟାରେ ନିର୍ବାଚନ କମିଶନ ଅଧିକାରୀମାନଙ୍କୁ ଭେଟିଥିଲେ। ସେ ପରବେଶ ବର୍ମାଙ୍କ ବିରୋଧରେ କମିଶନଙ୍କ ନିକଟରେ ଅଭିଯୋଗ କରିଛନ୍ତି। ପରବେଶ ବର୍ମା ନୂଆଦିଲ୍ଲୀ ବିଧାନସଭା ଆସନରୁ ବିଜେପି ପ୍ରାର୍ଥୀ ହୋଇଛନ୍ତି।
କେଜରିୱାଲ କହିଛନ୍ତି ନୂଆ ଦିଲ୍ଲୀ ବିଧାନସଭା କ୍ଷେତ୍ରରେ ଭୋଟ ଜାଲିଆତି କରିବାକୁ ବିଜେପି ଚେଷ୍ଠା କରୁଛି। ସେ କହିଛନ୍ତି ଯେ, ଡିସେମ୍ବର ୧୫ ରୁ ଜାନୁଆରୀ ୭ ତାରିଖ ପର୍ଯ୍ୟନ୍ତ ୨୨ ଦିନ ମଧ୍ୟରେ ଭୋଟର ତାଲିକାରୁ ବାତିଲ ପାଇଁ ୫,୫୦୦ ଆବେଦନ ମିଳିଛି। ଏହି ଆବେଦନଗୁଡ଼ିକ ସବୁ ନକଲି। ଦଳ କହିଛି ଯେ,ଗତ ୧୫ ଦିନ ମଧ୍ୟରେ ୧୩,୦୦୦ ନୂତନ ଭୋଟ ପାଇଁ ଆବେଦନ ଆସିଛି। ବିଭିନ୍ନ ରାଜ୍ୟରୁ ଲୋକଙ୍କୁ ଆଣି ଦିଲ୍ଲୀରେ ନକଲି ଭୋଟ ସୃଷ୍ଟି କରାଯାଉଛି।
ଅରବିନ୍ଦ କେଜରିୱାଲ କହିଛନ୍ତି, ନୂଆ ଦିଲ୍ଲୀ ବିଧାନସଭା ନିର୍ବାଚନ ମଣ୍ଡଳୀର ସ୍ଥାନୀୟ ନିର୍ବାଚନ ଅଧିକାରୀ ବିଜେପି ନିକଟରେ ଆତ୍ମସମର୍ପଣ କରିଛନ୍ତି। ସେମାନେ ବିଜେପିର ସମସ୍ତ ଭୁଲ କାର୍ଯ୍ୟରେ ସାହାଯ୍ୟ କରୁଛନ୍ତି ବୋଲି କେଜ୍ରିୱାଲା କହିଛନ୍ତି।