ଭୁବନେଶ୍ବର: ତୁଳସୀକ୍ଷେତ୍ର ଆରାଧ୍ୟଦେବତା ଶ୍ରୀବଳଦେବଜୀଉ ମନ୍ଦିରର ପାରିପାର୍ଶ୍ଵିକ ପରିବେଶର ଉନ୍ନତୀକରଣ କରାଯିବ। ଏନେଇ ଜିଲ୍ଲା ପ୍ରଶାସନ ପକ୍ଷରୁ କଣ ପଦକ୍ଷେପ ନିଆଯାଉଛି ବା ପ୍ରସ୍ତୁତି କରାଯାଉଛି ତାହା ଜାଣିବା ପାଇଁ ଆଇନ ମନ୍ତ୍ରୀ ପୃଥୀରାଜ ହରିଚନ୍ଦନ ଏକ ଜରୁରୀ ଚିଠି ଲେଖି ଜାଣିବାକୁ ଚାହିଁବା ପରେ ଜିଲ୍ଲା ପ୍ରଶାସନର ନିଦ ଭାଙ୍ଗିଛି।
ତରବରିଆ କ୍ରମେ ଜିଲ୍ଲାପାଳଙ୍କ ନେତୃତ୍ୱରେ ଏକ ପ୍ରସାଶନିକ ଦଳ ମନ୍ଦିର ନିକଟରେ ପହଁଚି ପାରିପାର୍ଶ୍ଵିକ ପରିସ୍ଥିତି କିପରି ରହିଛି ତାହାର କ୍ଷେତ୍ରସମୀକ୍ଷା କରିଛନ୍ତି। ମନ୍ଦିର ମଧ୍ୟରେ ରହିଥିବା କେତେକ ସ୍ଥାନ ଯଥା ସିନ୍ଧୁକ ରଖିବା ସ୍ଥାନ, କାଠ ରଖିବା ଜାଗା, ମନ୍ଦିର ପାଚେରୀକୁ ଲାଗିଥିବା ଉଦ୍ୟାନ, ଚନ୍ଦନ ପୋଖରୀ ନିକଟରେ ପହଁଚି ପରିସ୍ଥିତି ଅନୁଧ୍ୟାନ କରିଥିଲେ।
ମନ୍ଦିର ମଧ୍ୟରେ କାଠ ଏବଂ ସିନ୍ଦୁକ କିଭଳି ଅନ୍ୟତ୍ର ସ୍ଥାନାନ୍ତର ହେବ ସେ ନେଇ ନିଷ୍ପତି ନିଆଯାଇପାରେ ବୋଲି ଦେବୋତର ନିର୍ବାହୀ ଅଧିକାରୀ ବଳଭଦ୍ର ପତ୍ରୀ ପରୋକ୍ଷରେ ସୂଚନା ଦେଇଛନ୍ତି । ସେହିପରି ମନ୍ଦିରକୁ ଲାଗି ରହିଥିବା ଶିଶୁ ଉଦ୍ୟାନ ଏବେ ପରିତ୍ୟକ୍ତ ଅବସ୍ଥାରେ ରହିଛି ତାହାର କିପରି ଉନତିକରଣ କରାଯାଇପାରିବ ସେନେଇ ମଧ୍ୟ ପ୍ରତିନିଧି ଦଳ କ୍ଷେତ୍ର ଅନୁଧ୍ୟାନ କରିଥିଲେ।
5 T ଯୋଜନାରେ ମନ୍ଦିର ଉନତି ପାଇଁ 10 କୋଟି ଟଙ୍କା ଆର୍ଥିକ ଅନୁଦାନ ପୂର୍ଵତନ ସରକାର ଯୋଗାଇ ଦେଇଥିଲେ। ସେହି ଅନୁଦାନ ବିନିଯୋଗ ହେବା ପରେ ପାଖାପାଖି ଅଢେଇ କୋଟି ଟଙ୍କା ବଳକା ଭାବେ ପଡି ରହିଛି। ଦେବୋତର ସଂସ୍ଥା ପକ୍ଷରୁ ନିକଟ ଅତୀତରେ ମନ୍ଦିର ନିକଟରେ ରହିଥିବା ଏକ ଚନ୍ଦନ ପୋଖରୀ କୁ ଶ୍ରୀଜୀଉଙ୍କ ନାଁରେ କିଣାଯାଇଛି।
ଏହି ପୋଖରୀକୁ ବଳିପଡ଼ିଥିବା ଆର୍ଥିକ ଅନୁଦାନରେ କିପରି ଚତୁଃପାର୍ଶ୍ଵର ଉନୟନ କରାଯିବ ସେ ନେଇ ମଧ୍ୟ ପ୍ରତିନିଧି ଦଳ ବୁଲି ଦେଖିଛନ୍ତି। ଏ ସମ୍ପର୍କରେ ସଂଗ୍ରହ କରାଯାଇଥିବା ଚୂଡାନ୍ତ ରିପୋର୍ଟ ଆଇନ ମନ୍ତ୍ରୀଙ୍କୁ ପ୍ରଦାନ କରାଯିବା ପରେ ମନ୍ଦିର ପ୍ରଶାସନ ସହ ଜିଲ୍ଲା ପ୍ରଶାସନର ଏକ ଦଳ ଆଇନ ମନ୍ତ୍ରୀଙ୍କ ସହ ମନ୍ଦିର ଉନତି ସମ୍ପର୍କରେ ସଦ୍ୟତମ ଆଲୋଚନା କରିବେ।
ପୁରୀ ଶ୍ରୀମନ୍ଦିର ପରି ତୁଳସୀକ୍ଷେତ୍ର ଶ୍ରୀବଳଦେବଜୀଉ ମନ୍ଦିର ଚାରିପଟେ ଏକ ପରିକ୍ରମା ପ୍ରକଳ୍ପ କରାଯିବ ବୋଲି ମଧ୍ୟ ଶୁଣିବାକୁ ମିଳୁଛି। ତେଵେ ମନ୍ଦିର ଚତୁଃପାର୍ଶ୍ଵର ଉନୟନ କାର୍ଯ୍ୟ କିପରି ହେବ ସେଥିପାଇଁ ବର୍ତ୍ତମାନ ସରକାର କିଭଳି ଆଭିମୁଖ୍ୟ ପୋଷଣ କରିଛନ୍ତି ତାହାକୁ ନେଇ ଚର୍ଚ୍ଚା ଲାଗି ରହିଥିବା ବେଳେ ଆଇନମନ୍ତ୍ରୀଙ୍କ ସହ ଆଲୋଚନା ପରେ ଛବି ସ୍ପଷ୍ଟ ହେବ ବୋଲି ସୂଚନା ମିଳୁଛି।