ଚଳିତ କ୍ରିକେଟ ବିଶ୍ବକପ୍ରର ବିରାଟ କୋହଲିଙ୍କ ଭାରତୀୟ ଦଳ ସେମି ଫାଇନାଲରୁ ବିଦାୟ ନେଇଥିଲା । ଦଳର ଏହି ପରାଜୟ ପରେ ବ୍ୟାଟିଂ କୋଚ୍ ସଞ୍ଜୟ ବାଙ୍ଗର ବିସିସିଆଇର ରାଡାରରେ ରହିଛନ୍ତି । ଭାରତର ବିଦାୟ ପରେ ସମସ୍ତ ସପୋର୍ଟ ଷ୍ଟାଫ୍ଙ୍କ କାର୍ଯ୍ୟକାଳ 45 ଦିନ ବୃଦ୍ଧି କରାଯାଇଛି । ମାତ୍ର ବାଙ୍ଗରଙ୍କ କାର୍ଯ୍ୟଶୈଳୀକୁ ନେଇ ବିସିସିଆଇ ଖପ୍ପା ରହିଥିବା ଜଣା ପଡିଛି । ଲିଗ୍ ପର୍ଯ୍ୟାୟରେ ଭାରତର ମ୍ୟାଚ୍ ସମୟରେ ବାଙ୍ଗର ବିଜୟ ଶଙ୍କରଙ୍କୁ ଫିଟ୍ ଘୋଷିତ କରିଥିଲେ । ସେହି ସମାନ ଦିନ ବିଜୟ ଶଙ୍କରଙ୍କୁ ବିଶ୍ବକପ୍ ଦଳରୁ ବାଦ୍ ଦିଆଯାଇଥିଲା । ଏଥିପାଇଁ ବାଙ୍ଗରଙ୍କୁ ସମାଲୋଚନାର ଶିକାର ହେବାକୁ ପଡିଥିଲା । ଭାରତର ପରାଜୟ ପରେ ସମସ୍ତ ପୂର୍ବତନ ଖେଳାଳି ଦଳର ବ୍ୟାଟିଂ ବିଫଳତାକୁ ଦାୟୀ କରିଥିଲେ । ଭରତ ଅରୁଣଙ୍କ ପ୍ରଶିକ୍ଷଣରେ ବୋଲିଂ ବିଭାଗ ନିୟମିତ ଓ୍ବିକେଟ ଅକ୍ତିଆର କରୁଥିବା ବେଳେ କ୍ଷେତ୍ରରକ୍ଷଣରେ ମଧ୍ୟ ଦଳର ପ୍ରଦର୍ଶନରେ ଉନ୍ନତି ଘଟିଛି । ତେଣୁ ଉଭୟଙ୍କୁ ନିଜ ଦାୟିତ୍ବରେ ରଖି ବାଙ୍ଗରଙ୍କୁ ଅବ୍ୟାହତି ଦେଇପାରେ ବିସିସିଆଇ ବୋଲି ମତପ୍ରକାଶ କରିଛନ୍ତି ଅନେକ ପୂର୍ବତନ ଖେଳାଳି ।
