ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଟାଉନ ଥାନା ଅର୍ନ୍ତଗତ ଧର୍ମ ନଗର ଗିରିଜା ରେଷ୍ଟୁରାଣ୍ଟ ପରିସର ପ୍ରଥମ ମହଲାର ଏକ ଅବ୍ୟବହୃତ ବାଥ୍ ରୁମ୍ ଭିତରୁ ଜଣେ କର୍ମଚାରୀଙ୍କ ଗଳିତ ଶବ ଜବତ କରି ପୋଲିସ ବ୍ୟବଚ୍ଛେଦ ପାଇଁ ପଠାଇଛନ୍ତି। ମୃତକ ଜଣଙ୍କ ଗଜପତି ଜିଲ୍ଲା ମୋହନା ବ୍ଲକ ଅଂଚଳର ପ୍ରେମାନନ୍ଦ ମଲିକ (୨୪) ବୋଲି ଜଣାପଡ଼ିଛି। ସେ ୪ରୁ ୫ଦିନ ପୂର୍ବେ ଗାଁକୁ ଯାଉଥିବା କହି ହୋଟେଲରୁ ଯାଇଥିଲା। ଆଜି ପ୍ରଥମ ମହଲାର ଏକ ଅବ୍ୟବହୃତ ଘରୁ ତାଙ୍କର ମୃତଦେହ ଉଦ୍ଧାର ହୋଇଛି।
ଘଟଣରୁ ଜଣାପଡିଛି ଯେ, ବାଥ୍ ରୁମ୍ ରୁ ଦୁର୍ଗନ୍ଧ ବାହାରିବା ପରେ କର୍ମଚାରୀମାନେ ତାଙ୍କର କବାଟ ଖୋଲି ଦେଖିଲା ବେଳକୁ ପ୍ରେମାନନ୍ଦର ମୃତଦେହ ଝୁଲନ୍ତା ଅବସ୍ଥାରେ ମିଳିଥିଲା। ହୋଟେଲ୍ ମାଲିକ ଟାଉନ ଥାନାରେ ଅଭିଯୋଗ ଦେବା ପରେ ପୋଲିସ ପହଞ୍ଚି ଶବକୁ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି। ପ୍ରେମ ସମ୍ପର୍କକୁ ନେଇ ସେ ଆତ୍ମହତ୍ୟା କରି ଥାଇ ପାରନ୍ତି ବୋଲି ପୋଲିସ ପ୍ରାଥମିକ ତଦନ୍ତରୁ କହୁଥିବାବେଳେ ବ୍ୟବଚ୍ଛେଦ ରିପୋର୍ଟ ଆସିବା ପରେ ହିଁ ସ୍ଥିତି ସ୍ପଷ୍ଟ ହେବ ବୋଲି ପୋଲିସ କହିଛି।
ତେବେ ଏ ସବୁ ଭିତରେ ଉପର ମହଲାରେ ପ୍ରତିଦିନ ଲୋକେ ହୋଟେଲକୁ ଆସନ୍ତି। କିଭଳି ମୃତକଙ୍କ ବିଷୟରେ କେହି ସୁରାକ ପାଇଲେ ନାହିଁ ତାହା ସନ୍ଦେହ ସୃଷ୍ଟି କରୁଛି। କିପରି ଏବଂ କେଉଁ ପରିସ୍ଥିତିରେ ଏଭଳି ଘଟଣା ଘଟିଛି ତାହା ସଠିକ ତଦନ୍ତ ପରିସରଭୁକ୍ତ।