ନୂଆଦିଲ୍ଲୀ: କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଅମିତ ଶାହ ନୂଆଦିଲ୍ଲୀଠାରେ ‘ସମବାୟକୁ ସୁଦୃଢ଼ କରିବା ପାଇଁ ନିଆଯାଇଥିବା ଏବଂ ଜାରି ରହିଥିବା ପଦକ୍ଷେପ’ ସମ୍ପର୍କରେ ଗଠିତ ସମବାୟ ମନ୍ତ୍ରଣାଳୟର ସଂସଦୀୟ ପରାମର୍ଶଦାତା କମିଟିର ପ୍ରଥମ ବୈଠକରେ ଅଧ୍ୟକ୍ଷତା କରିଛନ୍ତି। କେନ୍ଦ୍ର ସମବାୟ ରାଷ୍ଟ୍ରମନ୍ତ୍ରୀକ୍ରିଷନ ପାଲ ଏବଂ ମୁରଲୀଧର ମୋହୋଲ, କମିଟିର ସଦସ୍ୟ, କେନ୍ଦ୍ର ସମବାୟ ସଚିବ ଏବଂ ସମବାୟ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ଏହି ବୈଠକରେ ଯୋଗ ଦେଇଥିଲେ। ବୈଠକରେ ସମବାୟ ମନ୍ତ୍ରଣାଳୟ ଦ୍ୱାରା ଆରମ୍ଭ ହେବା ପରଠାରୁ ସମବାୟ ସଂସ୍ଥାଗୁଡ଼ିକୁ ସୁଦୃଢ଼ କରିବା ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ଆଲୋଚନା ହୋଇଥିଲା।
ବୈଠକରେ ଉଦବୋଧନ ଦେଇ କେନ୍ଦ୍ର ଗୃହ ଏବଂ ସମବାୟ ମନ୍ତ୍ରୀ ଅମିତ ଶାହ କହିଥିଲେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାରା ଦେଶର ଚାଷୀ ଏବଂ ଗ୍ରାମାଞ୍ଚଳର ବିକାଶ ପାଇଁ ସ୍ୱତନ୍ତ୍ର ସମବାୟ ମନ୍ତ୍ରଣାଳୟ ଗଠନ କରି ‘ସମବାୟ ମାଧ୍ୟମରେ ସମୃଦ୍ଧି’ର ମନ୍ତ୍ର ଦେଇଛନ୍ତି। ସେ କହିଥିଲେ ଯେ ମୋଦୀ ସରକାର ବିଶ୍ୱାସ କରନ୍ତି ଯେ ସମବାୟ ଦ୍ୱାରା ଗ୍ରାମାଞ୍ଚଳରେ ନିଯୁକ୍ତି ସୃଷ୍ଟି ଏବଂ ସମୃଦ୍ଧି ଉଭୟ ସମ୍ଭବ।
ଅମିତ ଶାହ କହିଥିଲେ ଯେ ସ୍ୱାଧୀନତା ପରେ କିଛି ବର୍ଷ ପାଇଁ ଦେଶରେ ସମବାୟ ଆନ୍ଦୋଳନ ଏକ ସୁଦୃଢ଼ ସ୍ଥିତିରେ ଥିଲା, କିନ୍ତୁ ପରେ ଏହା ଅଧିକାଂଶ ରାଜ୍ୟରେ ଦୁର୍ବଳ ହୋଇଗଲା। ସେ କହିଥିଲେ ଯେ କେନ୍ଦ୍ରରେ ସମବାୟ ମନ୍ତ୍ରଣାଳୟ ଗଠନ ହେବା ପରେ, ଆମେ ପ୍ରଥମେ ରାଜ୍ୟଗୁଡ଼ିକ ସହିତ ପ୍ରାଥମିକ କୃଷି ଋଣ ସମବାୟ ସମିତି (PACS)ର ଏକ ଡାଟାବେସ୍ ତିଆରି କରିବା ପାଇଁ କାମ କରିଥିଲୁ। ଏହିକ୍ରମରେ ଦେଶରେ ଦୁଇ ଲକ୍ଷ PACS ପଞ୍ଜୀକୃତ ହୋଇଥିଲା। ଏଭିତରେ ଜାତୀୟ ସମବାୟ ସମିତି ଡାଟାବେସ୍ ବିକଶିତ କରିବାର କାର୍ଯ୍ୟ ପ୍ରାୟ ସମାପ୍ତ ହୋଇଛି ଏବଂ ଏବେ ଦେଶବ୍ୟାପୀ ସମବାୟ ସମିତିଗୁଡ଼ିକର କ୍ଷେତ୍ରୱାରୀ ସୂଚନା ଗୋଟିଏ କ୍ଲିକରେ ଉପଲବ୍ଧ ହେଉଛି। ଶ୍ରୀ ଶାହା କହିଛନ୍ତି ଯେ PACSକୁ କମ୍ପ୍ୟୁଟରୀକରଣ କରିବା ପାଇଁ ପଦକ୍ଷେପ ନିଆଯାଇଛି। ସେ କହିଥିଲେ ଯେ ଆଗାମୀ ସମୟରେ ଦେଶର ସମସ୍ତ ପଞ୍ଚାୟତରେ PACS ଉପଲବ୍ଧ ରହିବ।
କେନ୍ଦ୍ର ସମବାୟ ମନ୍ତ୍ରୀ କହିଛନ୍ତି ଯେ PACS କୁ ସୁଚାରୁ ରୂପେ ‘କାର୍ଯ୍ୟକ୍ଷମ କରିବା ପାଇଁ ତିଆରି ହୋଇଥିବା ନିୟମଗୁଡ଼ିକୁ ଦେଶର ପ୍ରାୟ ସମସ୍ତ ରାଜ୍ୟ ଗ୍ରହଣ କରିଛନ୍ତି। ସେ କହିଥିଲେ ଯେ ଏହି ପ୍ରାଥମିକ ସମବାୟ ସମିତିଗୁଡ଼ିକ ୨୦ରୁ ଅଧିକ କାର୍ଯ୍ୟ କରିବା ସହିତ ଏବଂ ବର୍ତ୍ତମାନ ସେମାନେ ସାଧାରଣ ସେବା କେନ୍ଦ୍ର, ଜନ ଔଷଧି କେନ୍ଦ୍ର ଭଳି ସେବା ପ୍ରଦାନ କରିବା ଆରମ୍ଭ କରିଛନ୍ତି।
ଅମିତ ଶାହ କହିଛନ୍ତି ଯେ ଚଳିତ ବଜେଟ ଅଧିବେଶନରେ ତ୍ରିଭୁବନ ସମବାୟ ବିଶ୍ୱବିଦ୍ୟାଳୟ ଗଠନ ପାଇଁ ସମବାୟ ମନ୍ତ୍ରଣାଳୟ ଏକ ବିଧେୟକ ଆଗତ କରିଛନ୍ତି ଏବଂ ଏହା ଖୁବ୍ ଶୀଘ୍ର ସଂସଦରେ ଗୃହୀତ ହେବ। ସେ କହିଥିଲେ ଯେ ଏହି ବିଶ୍ୱବିଦ୍ୟାଳୟ ଗଠନ ହେବାଦ୍ୱାରା, ସମବାୟ କ୍ଷେତ୍ରକୁ ଆସୁଥିବା ପେସାଦାରମାନେ ବୈଷୟିକ ଶିକ୍ଷା, ଆକାଉଣ୍ଟିଂ ଏବଂ ପ୍ରଶାସନ ସମ୍ବନ୍ଧୀୟ ସୂଚନା ଏବଂ ତାଲିମ ପାଇବେ। ସେ କହିଥିଲେ ଯେ ଏହା ସମବାୟ କ୍ଷେତ୍ରରେ ପ୍ରଶିକ୍ଷିତ ମାନବଶକ୍ତିଙ୍କୁ ସୃଷ୍ଟି କରିବ।
କେନ୍ଦ୍ର ସମବାୟ ମନ୍ତ୍ରୀ କହିଛନ୍ତି ଯେ ଜାତୀୟ ସ୍ତରରେ, ଜାତୀୟ ସମବାୟ ରପ୍ତାନୀ ଲିମିଟେଡ୍ (NCEL), ଜାତୀୟ ସମବାୟ ଜୈବିକ ଲିମିଟେଡ୍ (NCOL) ଏବଂ ଭାରତୀୟ ବିହନ ସମବାୟ ସମିତି ଲିମିଟେଡ୍ (BBSSL) ଭଳି ସମବାୟ ପ୍ରତିଷ୍ଠାନ ଗଠନ କରାଯାଇଛି। ଏସବୁ ପ୍ରତିଷ୍ଠାନ ସମବାୟ କ୍ଷେତ୍ରରେ ରପ୍ତାନୀ ବୃଦ୍ଧି, ଜୈବିକ ଉତ୍ପାଦ ଏବଂ ଉନ୍ନତ ବିହନକୁ ପ୍ରୋତ୍ସାହିତ କରିବା ଲାଗି ଉଦ୍ୟମ କରୁଛନ୍ତି। ସେ କହିଥିଲେ ଯେ ଏହି ପଦକ୍ଷେପଗୁଡ଼ିକଦ୍ୱାରା ଆଗାମୀ କିଛି ବର୍ଷ ମଧ୍ୟରେ ସମବାୟ କ୍ଷେତ୍ରରେ ବ୍ୟାପକ ପରିବର୍ତ୍ତନ ଆସିବ।
ସମବାୟ କ୍ଷେତ୍ରକୁ କର୍ପୋରେଟ କ୍ଷେତ୍ର ପରି ସମାନ ସୁଯୋଗ ମିଳିବା ଦିଗରେ ସରକାର ଚେଷ୍ଟା କରୁଛନ୍ତି। ସମବାୟ ମନ୍ତ୍ରଣାଳୟ, ଅର୍ଥ ମନ୍ତ୍ରଣାଳୟ, ରିଜର୍ଭ ବ୍ୟାଙ୍କ ଏବଂ ଆୟକର ବିଭାଗ ସହିତ ମିଳିତ ଭାବରେ କର୍ପୋରେଟ୍ କ୍ଷେତ୍ର ଏବଂ ସମବାୟ କ୍ଷେତ୍ର ପାଇଁ ଟିକସ ଗଠନକୁ ସୁସଙ୍ଗତ କରିବା ପାଇଁ ପଦକ୍ଷେପ ନିଆଯାଇଥିବା ସମବାୟ ମନ୍ତ୍ରୀ ସୂଚନା ଦେଇଛନ୍ତି। ଦେଶର ସମବାୟ କ୍ଷେତ୍ର ସହିତ ଜଡ଼ିତ ଉଦ୍ୟୋଗଗୁଡ଼ିକ କର୍ପୋରେଟ୍ ଜଗତ ସହିତ ପ୍ରତିଯୋଗିତାମୂଳକଭାବେ ଆଗକୁ ବଢ଼ିବେ ଏବଂ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ‘ସମବାୟ ମାଧ୍ୟମରେ ସମୃଦ୍ଧି’ର ମନ୍ତ୍ରକୁ ସାକାର କରିବେ ବୋଲି ସେ ବିଶ୍ୱାସ ପ୍ରକଟ କରିଥିଲେ।
ଗୃହ ଏବଂ ସମବାୟ ମନ୍ତ୍ରୀ ଶ୍ରୀ ଅମିତ ଶାହ ପରାମର୍ଶଦାତା କମିଟିକୁ କହିଥିଲେ ଯେ ସମବାୟ ସହ ଜଡ଼ିତ ଜାତୀୟ ଫେଡେରେସନଗୁଡ଼ିକର ଦ୍ରୁତ ବିକାଶ ପାଇଁ କୃଷକ ଭାରତୀ ସମବାୟ ଲିମିଟେଡ୍ (KRIBHCO), ଭାରତୀୟ କୃଷକ ସାର ସମବାୟ ଲିମିଟେଡ୍ (IFFCO), ଜାତୀୟ ଦୁଗ୍ଧ ବିକାଶ ବୋର୍ଡ (NDDB) ଏବଂ ଅନ୍ୟାନ୍ୟ ଫେଡେରେସନଗୁଡ଼ିକ ସହିତ ମିଶି ଏକ ରୋଡମ୍ୟାପ୍ ପ୍ରସ୍ତୁତ କରିବା ଉପରେ କାର୍ଯ୍ୟ କରାଯାଉଛି। ସେ କହିଥିଲେ ଯେ ବର୍ତ୍ତମାନ PACS ରେଳ ଟିକେଟ ବୁକିଂ କାମ କରୁଛି ଏବଂ ଖୁବ ଶୀଘ୍ର PACS ଦ୍ୱାରା ବିମାନ ଟିକେଟ ମଧ୍ୟ ବିକ୍ରି କରାଯାଇପାରିବ।
ଅମିତ ଶାହ କହିଛନ୍ତି ଯେ ଦେଶରେ ସମବାୟ ବିକାଶରେ ଆଞ୍ଚଳିକ ବୈଷମ୍ୟକୁ ଦୃଷ୍ଟିରେ ରଖି, ସରକାର ସମସ୍ତ ରାଜ୍ୟରେ ସନ୍ତୁଳିତ ବିକାଶ ଆଣିବା ପାଇଁ ବିଶେଷ ପଦକ୍ଷେପ ନେଉଛନ୍ତି।
କେନ୍ଦ୍ର ସମବାୟ ମନ୍ତ୍ରୀ କହିଛନ୍ତି ଯେ ଗୁଜରାଟରେ ‘ସମବାୟ ସମିତିଗୁଡ଼ିକ ମଧ୍ୟରେ ସହଯୋଗ’ ପଦକ୍ଷେପର ବ୍ୟାପକ ସଫଳତା ପରେ, ଏହାକୁ ଦେଶର ଅନ୍ୟ ରାଜ୍ୟରେ ମଧ୍ୟ କାର୍ଯ୍ୟକାରୀ କରାଯିବ।
ବୈଠକରେ, କମିଟିର ସଦସ୍ୟମାନେ ଦେଶରେ ସମବାୟର ସଶକ୍ତିକରଣ ସମ୍ବନ୍ଧୀୟ ପ୍ରସଙ୍ଗ ଉପରେ ସେମାନଙ୍କର ପରାମର୍ଶ ଦେଇଥିଲେ ଏବଂ ଦେଶରେ ସମବାୟ ଆନ୍ଦୋଳନକୁ ସୁଦୃଢ଼ କରିବା ପାଇଁ ସରକାରଙ୍କ ଦ୍ୱାରା ନିଆଯାଇଥିବା ଗୁରୁତ୍ୱପୂର୍ଣ୍ଣ ପଦକ୍ଷେପକୁ ପ୍ରଶଂସା କରିଥିଲେ।