ଭୁବନେଶ୍ବର: ଉଭୟ କେନ୍ଦ୍ର ଓ ରାଜ୍ୟ ସରକାର ନିଜକୁ ଚାଷୀ ସରକାର ବୋଲି କହୁଛନ୍ତି। ଉଭୟ କହୁଛନ୍ତି, ଆମେ କୃଷକଙ୍କ ପାଇଁ ଜତ୍ନଶୀଳ। ହେଲେ, ପ୍ରକୃତପକ୍ଷେ ଚାଷୀର ଉତ୍ପାଦ ବୃଦ୍ଧି ସମୟରେ ସରକାରଙ୍କ ଅସଲ କଥା ଧରାପଡ଼ିଛି। ଅଧିକାଂଶ ଜିଲ୍ଲାରେ ଧାନ ବିକ୍ରିରେ ବ୍ୟାପକ ହରିଲୁଟ୍, ମିଲର ରାଜ୍ ଚାଲିଛି। ସରକାରଙ୍କ ସ୍ଲୋଗାନକୁ ଫିକା ପକେଇଦେଇଛି।
ପ୍ରାରମ୍ଭରୁ ସରକାର ଧାନ କିଣା ବ୍ୟବସ୍ଥିତ କରି କଟନୀ ଛଟନୀ ବନ୍ଦ କରିବେ ବୋଲି କହିଥିଲେ ହେଁ, ପୂରା ହାତ ଛାଡ଼ି ଦେଇଛନ୍ତି। ଯେଉଁଥିରେ କି ଯୋଗାଣ ମନ୍ତ୍ରୀଙ୍କ ବିବୃତ୍ତି ଏହାର ପ୍ରମାଣ। ମନ୍ତ୍ରୀ କହିଥିଲେ, ସଚିବ କହୁଛନ୍ତି, ଧାନ କିଣା ବ୍ୟବସ୍ଥାରେ ଆପଣ ମୁଣ୍ଡ ପୁରାନ୍ତୁ ନାହିଁ, ଏହାକୁ ଚାଷୀ ଓ ମିଲରଙ୍କ ଉପରେ ଛାଡ଼ି ଦିଅନ୍ତୁ। ସରକାରୀ ନିୟନ୍ତ୍ରଣ ହୁଗୁଳା ହେଲା ପରେ ମିଲରଙ୍କ ମନମାନୀ ବଢ଼ିଯାଇଥିଲା।
ସ୍ଥଳ ବିଶେଷରେ ୯, ୧୧, ୧୨ ଓ ୨୪କେଜି ପର୍ଯ୍ୟନ୍ତ ମିଲରମାନେ ଧାନ କାଟି ଚାଲିଥିଲେ। ଶାନ୍ତପୂର୍ଣ୍ଣ ଗଣତାନ୍ତ୍ରିକ ଉପାୟରେ ଆନ୍ଦୋଳନ କଲା ପରେ ବି ସରକାର ମିଲର ରାଜ ଭାଙ୍ଗିବା ପାଇଁ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନେଇନଥିଲେ। ଯାହାଫଳରେ ଏବେବି ମିଲରଙ୍କ ମର୍ଜିରେ ଧାନ କିଣା ଚାଲିଛି। ଯୋଗାଣ ଅଧିକାରୀ, ଜିଲ୍ଲା ସମବାୟ ନିବନ୍ଧକ ଓ ଉପଜିଲ୍ଲାପାଳ ଏମାନେ ଦନ୍ତହୀନ ହୋଇବସିଛନ୍ତି।
ଏମାନଙ୍କ ଉପରେ କୌଣସି ପ୍ରକାର ଛାଟ ବସୁନାହିଁ। ଯେଉଁଥିପାଇଁ ଧାନ କିଣାରେ ଶହ ଶହ କୋଟି ଟଙ୍କାର ଦୁର୍ନୀତି ହେଉଛି। ଏହାର ପ୍ରତିବାଦରେ ନବନିର୍ମାଣ କୃଷକ ସଂଗଠନର ରାଷ୍ଟ୍ରୀୟ ସଂଯୋଜକ ଅକ୍ଷୟ କୁମାର ଆଜିକୁ ୬ ଦିନ ହେଲା ଅନଶନ ଚଳାଇଛନ୍ତି। ଅକ୍ଷୟ କୁମାରଙ୍କ ଅନଶନକୁ ସମର୍ଥନ ଜଣାଇ ବହୁ ସାମାଜିକ କର୍ମୀ, ପୂର୍ବତନ ବିଧାୟକ, ପୂର୍ବତନ ମନ୍ତ୍ରୀ ଅନଶନ ସ୍ଥଳକୁ ଆସି ନୈତିକ ସମର୍ଥନ ଜଣାଇଛନ୍ତି।
ରାଜ୍ୟ ପ୍ରଶାସନ ପକ୍ଷରୁ ଡାକ୍ତରୀ ଟିମ୍ ଆସି ଶ୍ରୀ କୁମାରଙ୍କ ସ୍ବାସ୍ଥ୍ୟ ପରୀକ୍ଷା କରିଛି। କିନ୍ତୁ ଏପର୍ଯ୍ୟନ୍ତ ସରକାର ଯେଉଁ ସମ୍ବେଦନଶୀଳ ହୋଇ ଅନଶନକାରୀ ଚାଷୀ ନେତା ଅକ୍ଷୟ କୁମାରଙ୍କ ସହ ଆଲୋଚନା କରିବା କଥା ତାହା କରିନାହାଁନ୍ତି। ଚାଷୀ ନେତାଙ୍କ ଅନଶନ ନେଇ ଚାଷୀମାନଙ୍କ ମଧ୍ୟରେ ଚାପା ଉତ୍ତେଜନା ବଢ଼ିବାରେ ଲାଗିଛି। ସରକାର ଯଦି ଆଲୋଚନା ନକରନ୍ତି ତେବେ ବଡ଼ ଧରଣର ପ୍ରତିବାଦ କରାଯିବ ବୋଲି ସଂଗଠନ ପକ୍ଷରୁ କୁହାଯାଇଛି।
ଆଜିର ଅନଶନରେ ସଂଗଠନର ରାଜ୍ୟ କମିଟି ସଦସ୍ୟ ରଣଜିତ୍ ପଟ୍ଟନାୟକ, ଡା. କୁଳମଣୀ, ମଧୁସ୍ମିତା ସାମଲ, ପ୍ରଭାତ ମହାଳିକ, ଶୁଭଶ୍ରୀ ଭାରତ ପ୍ରମୁଖ ଯୋଗଦେଇଥିଲେ।
