ନୂଆଦିଲ୍ଲୀ: ଦିଲ୍ଲୀ ଶାସନ କ୍ଷମତାରୁ ହଟିଯିବା ପରେ ବର୍ତ୍ତମାନ ଆମ ଆଦମୀ ପାର୍ଟିର ପରିସ୍ଥିତି ଭଲ ନାହିଁ। ଆପ୍ ନୂଆ ଦିଲ୍ଲୀରେ ଏପରି ବିପର୍ଯ୍ୟୟର ସମ୍ମୁଖୀନ ହେବ ବୋଲି ସେମାନେ କେବେ ବି ଆଶା କରି ନ ଥିଲେ। ଏପରି ପରିସ୍ଥିତିରେ ଶାସନ କ୍ଷମତାରେ ଥିବା ପଂଜାବରେ ମଧ୍ୟ ଦଳର ବିଭିନ୍ନ ସମସ୍ୟା ଉପୁଜିବ ବୋଲି ଅନେକ ଆଶଙ୍କା ମଧ୍ୟ କରୁଛନ୍ତି।
ହେଲେ ଏହିପରି ଅବସ୍ଥାରେ ଜଣେ ପରିଚିତ ଚେହେରା ଆପ୍ ରେ ଯୋଗ ଦେବେ ତାହା ଅନେକଙ୍କୁ ଆଶ୍ଚର୍ଯ୍ୟ କରିଛି। ହେଲେ ତାହା ସତ ଯେ, ଆମ ଆଦମୀ ପାର୍ଟିରେ ଯୋଗ ଦେଇଛନ୍ତି ଜଣେ ଅଭିନେତ୍ରୀ। ଯାହାକୁ ନେଇ ଦିଲ୍ଲୀ ରାଜନୀତିରେ ବେଶ ଚର୍ଚ୍ଚା ଆରମ୍ଭ ହୋଇଯାଇଛି। ଏପରି ସୁନ୍ଦରୀ ଅଭିନେତ୍ରୀ କାହିଁକି ଆପ୍ ରେ ଯୋଗ ଦେଲେ ସେ ନେଇ ବିଭିନ୍ନ ମହଲରେ ପ୍ରଶ୍ନ ମଧ୍ୟ ଉଠିଛି।
ତେବେ ଯେଉଁ ଅଭିନେତ୍ରୀ ଆପ୍ ରେ ଯୋଗ ଦେଇଛନ୍ତି ସେ ହେଉଛନ୍ତି ପଂଜାବୀ ଚଳଚିତ୍ରର ବେଶ ପରିଚିତ ଚେହେରା ସୋନିଆ ମାନ୍। କେବଳ ପଂଜାବୀ ନୁହେଁ ସେ ହିନ୍ଦି, ମାଲାୟାଲାମ, ତେଲୁଗୁ ଓ ମରାଠୀ ଚଳଚିତ୍ରରେ ମଧ୍ୟ ଅଭିନୟ କରିଛନ୍ତି। ସେ 2014 ମସିହାରେ ହିନ୍ଦି ଚଳଚିତ୍ର ‘କାହାନୀ ହେ ମେରା ପ୍ୟାର’ ଚଳଚିତ୍ରରେ ଅଭିନୟ କରିଛନ୍ତି। ତାଙ୍କ ବାପା ସ୍ବର୍ଗତ ବଳଦେବ ସିଂହ ଥିଲେ କ୍ରିତି କିଶାନ ସଂଘର ବଡ ନେତା। ତାଙ୍କୁ ଖଲିସ୍ତାନୀମାନେ 1980 ମସିହାରେ ହତ୍ୟା କରିଥିଲେ।
ସୋନିଆ ଗତ ରବିବାର ଦିନ ଆପ୍ ର ଜାତୀୟ କନଭେନର ଅରବିନ୍ଦ କେଜ୍ରାୱାଲଙ୍କ ଉପସ୍ଥିତିରେ ସେ ଦଳରେ ସାମିଲ ହୋଇଛନ୍ତି। ଏ ନେଇ ଦଳ ତରଫରୁ ସାମାଜିକ ଗଣମାଧ୍ୟମରେ ଅବଗତ କରାଯାଇଛି। ସେ ଦଳରେ ସାମିଲ ହୋଇଥିବାରୁ ତାଙ୍କୁ କେଜ୍ରିୱାଲ ସ୍ବାଗତ କରିଛନ୍ତି। ଏହାଦ୍ବାରା ପଂଜୀବରେ ଆମ ଆଦମୀ ପାର୍ଟି ସୁଦୃଢ ହେବ ବୋଲି ସେ କହିଛନ୍ତି।
ବର୍ତ୍ତମାନ କେଜ୍ରିୱାଲ ଦିଲ୍ଲୀରୁ ପରାଜୟ ହେବା ପରେ ପଂଜାବ ରାଜନୀତିକୁ ଅଧିକ ଗୁରୁତ୍ବ ଦେଉଥିବାର ପରିଲକ୍ଷିତ ହୋଇଛି।
