ନୂଆଦିଲ୍ଲୀ: ଜାମ୍ମୁ କାଶ୍ମୀର ବିଧାନସଭାରେ ପାକିସ୍ତାନର ବିକାଶକୁ ନେଇ ଏନସି ବିଧାୟକଙ୍କ ମନ୍ତବ୍ୟକୁ ନେଇ ହଙ୍ଗାମା ସୃଷ୍ଟି ହୋଇଛି। ମୁଖ୍ୟମନ୍ତ୍ରୀ ତଥା ଏନସି ନେତା ଓମାର ଅବଦୁଲ୍ଲା ଏ ସମ୍ପର୍କରେ ସ୍ପଷ୍ଟୀକରଣ ଦେଇଛନ୍ତି। ଓମାର କହିଛନ୍ତି ଯେ, ଚୀନ୍ ସହାୟତାରେ LOC ନିକଟରେ ଥିବା ଅନେକ ଅଞ୍ଚଳରେ ବିକାଶ ଘଟିଛି, କିନ୍ତୁ ପାକିସ୍ତାନର ଆଭ୍ୟନ୍ତରୀଣ ଅଞ୍ଚଳରେ ଅବସ୍ଥା ଅଧିକ ଖରାପ ରହିଛି।
ଜାମ୍ମୁ କାଶ୍ମୀର ବିଧାନସଭାରେ ଏନସି ବିଧାୟକ ସଇଫୁଲ୍ଲା ମିର ପାକିସ୍ତାନର ବିକାଶ ଉପରେ ମନ୍ତବ୍ୟ ଦେଇଥିଲେ। ଏହାକୁ ନେଇ ବିଜେପି କଡା ଆପତ୍ତି ଜଣାଇଥିଲା ଏବଂ ବିଧାନସଭାରେ ହଙ୍ଗାମା ହୋଇଥିଲା।
ଓମାର ଅବଦୁଲ୍ଲା କ’ଣ କହିଥିଲେ?:
ଓମାର ଅବଦୁଲ୍ଲା କହିଛନ୍ତି ଯେ, ଗୃହରେ ସବୁକିଛି ଠିକ୍ ଚାଲିଛି, କିନ୍ତୁ ହଠାତ୍ ଏକ ବିତର୍କ ଆରମ୍ଭ ହେଲା। ଉଭୟ ଦଳର ବିଧାୟକଙ୍କୁ ଅଟକାଇ ଓମାର ଅବଦୁଲ୍ଲା ଗୃହରେ ଏହି ପ୍ରସଙ୍ଗରେ ନିଜର ଆଭିମୁଖ୍ୟ ସ୍ପଷ୍ଟ କରିଛନ୍ତି।
ଜାମ୍ମୁ କାଶ୍ମୀରର ମୁଖ୍ୟମନ୍ତ୍ରୀ କହିଛନ୍ତି ଯେ, ସଇଫୁଲ୍ଲା ମିର କିମ୍ବା ନାସିର ଗୁରେଜୀ ଏ ବିଷୟରେ ଯାହା କହିଛନ୍ତି ତାହା ଭୁଲ ନୁହେଁ, କିନ୍ତୁ ଏହା ମଧ୍ୟ ସମ୍ପୂର୍ଣ୍ଣ ସତ୍ୟ ନୁହେଁ। ଏହି ଦୁଇ ବିଧାୟକ ନିଜ ମତକୁ ସଠିକ୍ ଏବଂ ସଂପୂର୍ଣ୍ଣ ଭାବରେ ପ୍ରକାଶ କରିବାରେ ସକ୍ଷମ ହୋଇ ନାହାଁନ୍ତି।
ଓମାର ଅବଦୁଲ୍ଲା କହିଛନ୍ତି ଯେ, ଜାମ୍ମୁ କାଶ୍ମୀରର ଅନେକ ଅଞ୍ଚଳ ଲାଇନ ଅଫ୍ କଣ୍ଟ୍ରୋଲ ସହିତ ଲାଗି ରହିଛି ଏବଂ ପାକିସ୍ତାନ ନିୟନ୍ତ୍ରଣ ରେଖା ନିକଟରେ ଥିବା ଅନେକ କ୍ଷେତ୍ରରେ ବିକାଶ କରିଛି। ଓମାର କହିଛନ୍ତି ଯେ, ପାକିସ୍ତାନ ଏହି ବିକାଶ ନିଜେ କରିନାହିଁ ବରଂ ଚୀନ୍ ସହାୟତାରେ କରିଛି।
ଓମାର ଅବଦୁଲ୍ଲା କହିଛନ୍ତି ଯେ, LOC ସଂଲଗ୍ନ ଅଞ୍ଚଳଠାରୁ କିଛି ଦୂରରେ ପାକିସ୍ତାନର ଆଭ୍ୟନ୍ତରୀଣ ଅଞ୍ଚଳରେ ଅବସ୍ଥା ଖରାପ। ପାକିସ୍ତାନର ଏହି ଅଞ୍ଚଳର ଲୋକଙ୍କୁ କୋଟ ତ ପିନ୍ଧାଇ ଦିଆଯାଇଛି, କିନ୍ତୁ କୋଟ ପକେଟରେ ଗୋଟିଏ ବି ଟଙ୍କା ନାହିଁ।
ସଇଫୁଲ୍ଲା ମିର କ’ଣ କହିଥିଲେ?:
ଜାମ୍ମୁ କାଶ୍ମୀରର ଶାସକ ଦଳର ବିଧାୟକ ସଇଫୁଲ୍ଲା ମିର ବିଧାନସଭାରେ ପ୍ରଶ୍ନ ଉଠାଇଥିଲେ ଯେ, ତାଙ୍କ ବିଧାନସଭା ନିର୍ବାଚନମଣ୍ଡଳୀ ଦୂରବର୍ତ୍ତୀ ଅଞ୍ଚଳ କେରନ ଏବଂ ଜମଗୁଣ୍ଡ ଶୀତ ମାସରେ ଦେଶ ତଥା ଦୁନିଆରୁ ବିଚ୍ଛିନ୍ନ ହୋଇଯିବ। ସେ ତାଙ୍କ ବିଧାନସଭା ନିର୍ବାଚନମଣ୍ଡଳୀର ଏହି କ୍ଷେତ୍ରଗୁଡିକ ପାଇଁ ଟନେଲ୍ ଦାବି କରିଥିଲେ ଏବଂ ଏହା ପୂର୍ବରୁ ସରକାରଙ୍କୁ ଡିପିଆର ପ୍ରସ୍ତୁତ କରିବାକୁ କହିଥିଲେ।
ସଇଫୁଲ୍ଲା ମିର କହିଛନ୍ତି ଯେ, ଶୀତ ସମୟରେ ପଡୋଶୀ ପାକିସ୍ଥାନର ରାସ୍ତା ସେମାନଙ୍କ ଅଞ୍ଚଳର ରାସ୍ତା ଅପେକ୍ଷା ବହୁତ ଭଲ ଅଟେ।
ପାକିସ୍ତାନ ଉପରେ ସଇଫୁଲ୍ଲା ମିରଙ୍କ ମନ୍ତବ୍ୟକୁ ନେଇ ବିଜେପି ବିଧାୟକ ରଣବୀର ସିଂ ପଠାନିଆ ଗୃହରେ ହଙ୍ଗମା କରିଥିଲେ। ସେ କହିଥିଲେ ଯେ, ପାକିସ୍ତାନ ଏବଂ ଭାରତ ମଧ୍ୟରେ କୌଣସି ତୁଳନା ନାହିଁ ଏବଂ ସେଗୁଡିକର ତୁଳନା ଗୃହରେ କରିବା ଭୁଲ ଅଟେ।
ସଇଫୁଲ୍ଲା ମିରଙ୍କ ସ୍ପଷ୍ଟୀକରଣ:
ଏଥି ସହ ସଇଫୁଲ୍ଲା ମିର ମଧ୍ୟ ଏହି ପ୍ରସଙ୍ଗରେ ଆଗକୁ ଆସି କହିଥିଲେ ଯେ, ସେ ଭାରତ ଏବଂ ପାକିସ୍ତାନ ମଧ୍ୟରେ ତୁଳନା କରିନାହାଁନ୍ତି। ସେ କହିଛନ୍ତି ଯେ, ଭାରତ ଏବଂ ପାକିସ୍ତାନକୁ ତୁଳନା କରାଯାଇପାରିବ ନାହିଁ ଏବଂ ଭାରତ ପାକିସ୍ତାନଠାରୁ ବହୁତ ଆଗରେ ଅଛି। ସେ କହିଛନ୍ତି ଯେ, ତାଙ୍କ ଶବ୍ଦର ଭୁଲ ବ୍ୟାଖ୍ୟା କରାଯାଇଛି।
