ନୂଆଦିଲ୍ଲୀ: ଭାରତୀୟ ଜନସଞ୍ଚାର ପ୍ରତିଷ୍ଠାନ (ଆଇଆଇଏମସି)ର 56ତମ ସମାବର୍ତ୍ତନ ସମାରୋହ ମଙ୍ଗଳବାର ଆୟୋଜିତ ହୋଇଯାଇଛି। ମହାତ୍ମା ଗାନ୍ଧୀ ମଞ୍ଚ, ଆଇଆଇଏମସି, ନୂଆଦିଲ୍ଲୀଠାରେ ଏହା ଆୟୋଜନ କରାଯାଇଥିଲା। ଆଇଆଇଏମସିର କୁଳପତି ତଥା କେନ୍ଦ୍ର ସୂଚନା ଓ ପ୍ରସାରଣ, ରେଳ ଏବଂ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ମନ୍ତ୍ରୀ ଅଶ୍ୱିନୀ ବୈଷ୍ଣବ ଏହି ଅବସରରେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।
ଏହି ସମାରୋହରେ 2023-24 ଶିକ୍ଷାବର୍ଷ ପାଇଁ ଆଇଆଇଏମସି ନୂଆଦିଲ୍ଲୀ ଏବଂ ଏହାର ପାଞ୍ଚଟି ଆଞ୍ଚଳିକ କ୍ୟାମ୍ପସ-ଢେଙ୍କାନାଳ, ଆଇଜଲ, ଅମରାବତୀ, କୋଟ୍ଟାୟମ ଏବଂ ଜାମ୍ମୁର 478 ଜଣ ଛାତ୍ରଛାତ୍ରୀଙ୍କୁ ସ୍ନାତକୋତ୍ତର ଡିପ୍ଲୋମା ପ୍ରମାଣପତ୍ର ପ୍ରଦାନ କରାଯାଇଥିଲା। ଏହାବ୍ୟତୀତ, 36 ଜଣ ଉତ୍କୃଷ୍ଟ ଛାତ୍ରଛାତ୍ରୀଙ୍କୁ ସେମାନଙ୍କ ଶିକ୍ଷାଗତ ଉତ୍କର୍ଷତା ପାଇଁ ପଦକ ଏବଂ ନଗଦ ପୁରସ୍କାରରେ ସମ୍ମାନିତ କରାଯାଇଥିଲା। ଏହା ସେମାନଙ୍କ ଶିକ୍ଷାଗତ ଯାତ୍ରାର ଏକ ଗୁରୁତ୍ୱପୂର୍ଣ୍ଣ ଅବସରକୁ ଚିହ୍ନିତ କରିଥିଲା।
ବିଶ୍ୱସ୍ତରୀୟ ଗଣମାଧ୍ୟମ ବିଶ୍ୱବିଦ୍ୟାଳୟ ହେବ ଆଇଆଇଏମସି
ନୂଆଦିଲ୍ଲୀର ଭାରତୀୟ ଜନସଞ୍ଚାର ପ୍ରତିଷ୍ଠାନ (ଆଇଆଇଏମସି) ର 56ତମ ସମାବର୍ତ୍ତନ ସମାରୋହକୁ ସମ୍ବୋଧିତ କରି ଶ୍ରୀ ଅଶ୍ୱିନୀ ବୈଷ୍ଣବ କହିଥିଲେ ଯେ ଏହି ଜନସଞ୍ଚାର ଶିକ୍ଷାନୁଷ୍ଠାନକୁ ଏକ ବିଶ୍ୱସ୍ତରୀୟ ମିଡିଆ ବିଶ୍ୱବିଦ୍ୟାଳୟରେ ପରିଣତ କରାଯିବ।
ସ୍ନାତକ ଛାତ୍ରଛାତ୍ରୀଙ୍କୁ ଅଭିନନ୍ଦନ ଜଣାଇ ବୈଷ୍ଣବ ଗୁରୁତ୍ୱାରୋପ କରି କହିଥିଲେ ଯେ ଆଇଆଇଏମସିର ପରବର୍ତ୍ତୀ ସଂସ୍କରଣରେ ବିଶ୍ୱସ୍ତରୀୟ ପାଠ୍ୟକ୍ରମ ଏବଂ ଦ୍ରୁତ ଗତିରେ ବଦଳୁଥିବା ଯୋଗାଯୋଗ ପରିଦୃଶ୍ୟର ଆବଶ୍ୟକତାକୁ ପୂରଣ କରିବା ପାଇଁ ଗଣମାଧ୍ୟମ ଉଦ୍ୟୋଗ ସହିତ ଦୃଢ଼ ସହଯୋଗ ମଧ୍ୟ ସାମିଲ ହେବ।
ଶ୍ରୀ ବୈଷ୍ଣବ ମଧ୍ୟ ଗଣମାଧ୍ୟମ ଶିଳ୍ପର ଗତିଶୀଳ ପ୍ରକୃତି ଏବଂ ଅନୁକୂଳତାର ଗୁରୁତ୍ୱ ଉପରେ ଆଲୋକପାତ କରିଥିଲେ। ସେ କହିଥିଲେ, ‘‘ସମ୍ପୂର୍ଣ୍ଣ ଗଣମାଧ୍ୟମର ଦୁନିଆ ବଦଳୁଛି, ଏବଂ ନିରନ୍ତର ପରିବର୍ତ୍ତନ ଜାରି ରହିଛି। ଆଗକୁ ବଢ଼ିବା ପାଇଁ ଆମକୁ ଏହି ପରିବର୍ତ୍ତନଗୁଡ଼ିକୁ ଗ୍ରହଣ କରିବାକୁ ହେବ ଏବଂ ତା’ ସହିତ ଖାପ ଖୁଆଇବାକୁ ହେବ।’’
ସ୍ନାତକମାନେ ସମ୍ମୁଖୀନ ହେଉଥିବା ଆହ୍ୱାନର ମୁକାବିଲା କରି ମନ୍ତ୍ରୀ ଛାତ୍ରଛାତ୍ରୀମାନଙ୍କୁ ସମର୍ପଣ ଏବଂ ଅଧ୍ୟବସାୟ ସହିତ ସେମାନଙ୍କର ଯାତ୍ରା ଜାରି ରଖିବାକୁ ପରାମର୍ଶ ଦେଇଥିଲେ । ଯେଉଁ ଶକ୍ତି ବଳରେ ସେମାନେ ଏହି ମାଇଲଖୁଣ୍ଟ ହାସଲ କରିଛନ୍ତି ତାହାକୁ ନେଇ ଆଗକୁ ବଢ଼ିବା ଲାଗି ମନ୍ତ୍ରୀ ଶ୍ରୀ ବୈଷ୍ଣବ କହିଥିଲେ । କେନ୍ଦ୍ର ମନ୍ତ୍ରୀ ଶ୍ରୀ ବୈଷ୍ଣବ କହିଥିଲେ, ‘‘ଆପଣମାନେ ଯେଉଁଠି ବି କାମ କରନ୍ତୁ, ସବୁବେଳେ ମନେ ରଖନ୍ତୁ-ରାଷ୍ଟ୍ର ପ୍ରଥମ, ସର୍ବଦା ପ୍ରଥମ ରହିବା ଉଚିତ୍। ଆପଣଙ୍କ କାର୍ଯ୍ୟ ଦେଶକୁ ସାହାଯ୍ୟ କରିବା ପାଇଁ ଉଦ୍ଦିଷ୍ଟ ହେବା ଉଚିତ, ଏବଂ ଅନ୍ୟାନ୍ୟ ଜିନିଷ ଏହାର ପଛରେ ରହିବ ।’’
ପାଠ୍ୟକ୍ରମର ଆଧୁନିକୀକରଣ ଏବଂ ପ୍ରଶିକ୍ଷଣ କାର୍ଯ୍ୟକ୍ରମର ସମ୍ପ୍ରସାରଣ ଜାରି ରଖିବ ଆଇଆଇଏମସି
ଭାରତୀୟ ଜନସଞ୍ଚାର ପ୍ରତିଷ୍ଠାନ (ଆଇଆଇଏମସି) କୁଳପତି ଡ. ଅନୁପମା ଭଟ୍ଟନାଗର କହିଥିଲେ, ‘‘ଆଇଆଇଏମସି ଆଧୁନିକ ପ୍ରଗତି ଏବଂ ପରିବର୍ତ୍ତନଶୀଳ ଆବଶ୍ୟକତା ସହିତ ତାଳମେଳ ରଖିବା ପାଇଁ ଏହାର ପାଠ୍ୟକ୍ରମକୁ ନିରନ୍ତର ଭାବେ ନବୀକରଣ କରିଆସୁଛି।’’ ଛାତ୍ରଛାତ୍ରୀମାନେ ଗଣଯୋଗାଯୋଗ କ୍ଷେତ୍ରରେ ବଡ଼ ସଫଳତା ହାସଲ କରିବେ ବୋଲି ସେ ଆଶା ବ୍ୟକ୍ତ କରିଥିଲେ । ଏହି ଲକ୍ଷ୍ୟକୁ ସମର୍ଥନ କରିବା ପାଇଁ, ନିଯୁକ୍ତି କେନ୍ଦ୍ର ଗତ ଡିସେମ୍ବରରେ ସଫଳତାର ସହ ଏକ ଇଣ୍ଡଷ୍ଟ୍ରି କନେକ୍ଟ ଇଭେଣ୍ଟ ଆୟୋଜନ କରିଥିଲା, ଯାହା ଛାତ୍ରଛାତ୍ରୀମାନଙ୍କୁ ବିଭିନ୍ନ ଗଣମାଧ୍ୟମ କ୍ଷେତ୍ରରେ ପ୍ରତିଷ୍ଠିତ ଶିଳ୍ପ ନେତୃବର୍ଗଙ୍କଠାରୁ ଶିଖିବା ପାଇଁ ଏକ ମୂଲ୍ୟବାନ ମଞ୍ଚ ପ୍ରଦାନ କରିଥିଲା।
ସେ ଆହୁରି କହିଥିଲେ ଯେ ଭାରତୀୟ ସୂଚନା ସେବାର ଅଧିକାରୀମାନଙ୍କୁ ତାଲିମ ଦେବାରେ ମଧ୍ୟ ଆଇଆଇଏମସି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ନିକଟ ଅତୀତରେ, ସୁରକ୍ଷା କ୍ଷେତ୍ରର ଆବଶ୍ୟକତାକୁ ଦୃଷ୍ଟିରେ ରଖି ସଶସ୍ତ୍ର ବାହିନୀ, ରାଜ୍ୟ ପୁଲିସ ବିଭାଗ, ତଟରକ୍ଷୀ ବାହିନୀ, ଆସାମ ରାଇଫଲ୍ସ ଏବଂ ସିଆଇଏସଏଫ ପାଇଁ ସ୍ୱତନ୍ତ୍ର ଗଣଯୋଗାଯୋଗ ପାଠ୍ୟକ୍ରମ ଆୟୋଜନ କରାଯାଇଛି। ଏହାବ୍ୟତୀତ, ରାଜ୍ୟ ସୂଚନା ଅଧିକାରୀ ଏବଂ ଜନସମ୍ପର୍କ ଅଧିକାରୀଙ୍କ ପାଇଁ ପ୍ରଶିକ୍ଷଣ କାର୍ଯ୍ୟକ୍ରମ ଆୟୋଜନ କରାଯାଇଛି।
ଏହି ଅବସରରେ ଆଇଆଇଏମସିର ଅତିରିକ୍ତ ମହାନିର୍ଦ୍ଦେଶକ ଡ. ନିମିଶ ରୁସ୍ତଗୀଙ୍କ ସମେତ ଅନୁଷ୍ଠାନର ଅଧ୍ୟାପକ ଓ କର୍ମଚାରୀମାନେ ମଧ୍ୟ ଉପସ୍ଥିତ ଥିଲେ।
