ବାଣପୁର: ଦୋଳପୂର୍ଣ୍ଣମୀରେ ଉତ୍କଳର ପୁରପଲ୍ଲୀରେ କେଉଁଠି ଶ୍ରୀ ଦୋଳଗୋବିନ୍ଦ ଦୋଳିଖେଳନ୍ତି ତ କେଉଁଠି ଶ୍ରୀଗୋପୀନାଥ, କେଉଁଠି ଶ୍ରୀଚନ୍ଦ୍ରଶେଖର ତକେଉଁଠି ଶ୍ରୀରଘୁନାଥ। ଏମିତି ବିଭିନ୍ନ ଅଞ୍ଚଳରେ ଭିନ୍ନ ଭିନ୍ନ ନାମରେ ଠାକୁରମାନେ ଦୋଳି ଖେଳିବା ସହିତ ଦୋଳବେଦୀରେ ନୂତନ ପଞ୍ଜିକା ପଢ଼ି ଶୁଣାଇବା ଉତ୍କଳୀୟ ଆଧ୍ୟାତ୍ମିକ ଚିନ୍ତାଧାରାର ପରମ୍ପରା କାହିଁ କେଉଁ କାଳରୁ ଚଳିଆସିଥିବାବେଳେ ଓଡ଼ିଶାର ଅନ୍ୟତମ ପ୍ରଖ୍ୟାତ ଶକ୍ତିକ୍ଷେତ୍ର ଖୋର୍ଦ୍ଧା ଜିଲ୍ଲା ବାଣପୁରର ଆରାଧ୍ୟାଦେବୀ ମା’ଭଗବତୀଙ୍କ ପୀଠରେ ନିଆରା ଢ଼ଙ୍ଗରେ ଏହି ଉତ୍ସବ ପାଳନ କରାଯାଉଥିବାର ଦୃଷ୍ଟାନ୍ତ ଦେଖିବାକୁ ମିଳେ। ଏଠାରେ ସକଳ ଶକ୍ତିର ଆଧାର ମାତୃଶକ୍ତିର ପ୍ରତୀକ ମା’ ଭାଗବତୀଙ୍କୁ ପ୍ରତ୍ୟେକ ଜାନିଯାତ୍ରା, ପର୍ବପର୍ବାଣୀରେ ପ୍ରାଧାନ୍ୟ ଦିଆଯାଇ ପାଳନ କରାଯାଉଥିବାର ବିଧି କାହିଁ: କେଉଁକାଳରୁ ଚଳି ଆସିଛି।
ପ୍ରତ୍ୟେକ ଶୁଭକାର୍ଯ୍ୟରେ ମେଳା ମହୋତ୍ସବରେ ପ୍ରଥମେ ମା’ଙ୍କୁ ତାପରେ ଅନ୍ୟାନ୍ୟ ଦେବା ଦେବୀଙ୍କୁପୂଜାକରାଯାଏ । ବର୍ତ୍ତମାନ ସଂସାରରେ ପ୍ରତ୍ୟେକ କ୍ଷେତ୍ରରେ ମାତୃଶକ୍ତି ( ମହିଳା ) ମାନଙ୍କୁ ପ୍ରାଧାନ୍ୟ ଦିଆଯାଉଛି ଏହା ବାଣପୁର ଅଞ୍ଚଳର ପ୍ରାଚୀନ ସଂସ୍କୃତି ପରମ୍ପରା ର ପ୍ରତୀକ। ଦୋଳ ପୂର୍ଣ୍ଣିମାରେ ମା ଭଗବତୀଙ୍କ ଚଳନ୍ତି ପ୍ରତୀମା କାଠି ଠାକୁରାଣିଙ୍କୁ ବାଜା, ବାଣରୋଷଣୀରେ ଦୋଳବେଦୀରେ ପ୍ରଥମେ ବିଜେ କରାଯାଇ ପରେ ଚନ୍ଦ୍ରଶେଖର ଗୋପୀନାଥଙ୍କୁ ଦୋଳିରେ ବିଜେ କରାଯାଇଥିଲା। ଶ୍ରୀକ୍ଷେତ୍ରରେ ଦୋଳଗୋବିନ୍ଦଙ୍କ ସହିତ ଶ୍ରୀଦେବୀ ଭୁଦେବୀ ଦୋଳି ଖେଳୁଥିବାବେଳେ ଏଠାରେ ଭଗବତୀଙ୍କ ସହିତ ଗୋପୀନାଥ ଓ ଚନ୍ଦ୍ରଶେଖର ହରି ହର ଦୁର୍ଗା ଏକତ୍ର ଗୋଟିଏ ଦୋଳି ରେ ବସି ଦୋଳି ଖେଳବାର ଅନନ୍ୟ ପରମ୍ପରା ଦେଖିବାକୁ ମିଳିଥିଲା।
ପରିଚ୍ଛା ପ୍ରକାଶ ମହାପାତ୍ର ମା’ଙ୍କୁ ନିଶଙ୍କୁଡ଼ି ଧୂପରେ କାକରା, ସରପୁଳି,ମାଠପୁଳି,ଖେଇ, ଖଜା ଇତ୍ୟାଦିଧୂପ କରି ସନ୍ଧ୍ୟା ଆଳତି ବଢାଇଥିଲେ। ପରେ ମନ୍ଦିର ପାଞ୍ଜିକାର ଗଣକ ଅରୁଣ କୁମାର ପଣ୍ଡିତରାୟ ନିଜେ ତାଳପତ୍ର ଲେଖନୀରେ ପ୍ରସ୍ତୁତ କରିଥିବା ଆଗମୀନୂତନ ବର୍ଷର ନୂତନ ପାଞ୍ଜି ପାଠ କରି ଶୁଣେଇଲା ପରେ ଦୋଳବେଦୀରେ ଦେବା ଦେବୀମାନଙ୍କୁ ମନ୍ଦିର କାର୍ଯ୍ୟାଳୟ ତରଫରୁ ଯୋଗେଇଦିଆଯାଇଥିବା ଖଇ, ଫେଣୀ, ସାକର, ନଡ଼ିଆ ପାତି, ପୂଜା କରାଇ ଅବିର ଲାଗି କରାଯାଇଥିଲା।
ଦୋଳବେଦୀରେ ଅବିର ଲାଗି ସହିତ ସୁଗନ୍ଧିତ ରଙ୍ଗ ବେରଙ୍ଗର ପୁଷ୍ପରେ ମଣ୍ଡିତ ହୋଇ ଦୋଳି ଖେଳୁଥିବା ହରିହର ଭଗବତୀଙ୍କୁ ଦର୍ଶନ କରିବା ସହିତ ନୂତନ ପାଞ୍ଜିରେ ଆଗାମୀ ବର୍ଷର ଗ୍ରହ ରାଶି ନକ୍ଷତ୍ରଙ୍କ ଚ଼ଳନ, ଜାନିଯାତ୍ରା ପର୍ବପର୍ବାଣୀ, ଓଷାବ୍ରତ, ଦୈବିଦୁର୍ବିପାକ, ବର୍ଷା ରପରିମାଣ, ଶସ୍ୟ ଉତ୍ପାଦନ, ରୋଗ ବୈରାଗ୍ୟ, ଶୁଭାଶୁଭଫଳାଫଳ ଇତ୍ୟାଦି ଶ୍ରବଣ କରିବାପାଇଁ ଅଗଣିତ ଶ୍ରଦ୍ଧାଳୁଙ୍କ ଭିଡ଼ ଜମିଥିଲା।