ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲ୍ଲା ଭଞ୍ଜନଗର ବସଷ୍ଟାଣ୍ଡ ପରିସରରେ ଉମରକୋଟ ଠାରୁ ଭୁବନେଶ୍ଵର ଯାଉଥିବା ସରକାରୀ ବସ୍ ଧକ୍କାରେ ତ୍ରିନାଥ ଗୌଡ ନାମକ ଜଣେ ପାଣି ବୁହାଳି ଶ୍ରମିକର ବିୟୋଗ ଘଟିଛି। ମୃତ ତ୍ରିନାଥଙ୍କ ଘର ତାରା ସିଂ ଥାନା ଅର୍ନ୍ତଗତ ବ୍ରାହ୍ମଣପଦର ଓ ସେ ଭଞ୍ଜନଗର ଅଞ୍ଚଳର ବିଭିନ୍ନ ହୋଟେଲରେ ପାଣି ଯୋଗାଇ ପରିବାର ଚଳାଉଥିବା ବେଳେ ସେ ଭଞ୍ଜନଗର ବସଷ୍ଟାଣ୍ଡ ର ବିଭିନ୍ନ ଦୋକାନ ବାରଣ୍ଡାରେ ରାତ୍ରୀ ଯାପନ କରୁଥିଲେ।
କିନ୍ତୁ ଗତ ବୁଧବାର ରାତିରେ ବସଷ୍ଟାଣ୍ଡ ରାସ୍ତା କଡ଼ରେ ଶୋଇଥିଲା ବେଳେ ଉକ୍ତ ବସ୍ ରାସ୍ତା କଡ଼ରେ ଛିଡ଼ା କରିବା ପାଇଁ ପାଖେଇ ଆସୁଥିବାବେଳେ ଅସାବଧାନତାବଶତଃ ତ୍ରିନାଥ ଉପରେ ଚଢ଼ି ଯାଇଥିଲା ଓ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ଘଟିଥିଲା।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତ୍ରିନାଥଙ୍କ ଶବକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇ ଦୁର୍ଘଟଣାଗ୍ରସ୍ତ ବସ୍ କୁ ଜବତ କରି ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
