ଭୁବନେଶ୍ବର: ଆଜି ବିଧାନସଭା ଘେରାଉ କରିବ ପ୍ରଦେଶ କଂଗ୍ରେସ। ରାଜରାସ୍ତାରେ କରିବ ଗର୍ଜ୍ଜନ। ସେଥିପାଇଁ ଦଳ ତରଫରୁ କରାଯାଇଛି ବ୍ୟାପକ ପ୍ରସ୍ତୁତି। ରାଜ୍ୟର ବିଭିନ୍ନ ଜିଲ୍ଲାରୁ କର୍ମିଙ୍କୁ ଅଣାଯାଇ ବିଧାନସଭା ଭିତରକୁ ପ୍ରବେଶ କରିବାକୁ କରିବ ଚେଷ୍ଠା। ଭକ୍ତ ଦାସ ସଭାପତି ହେବା ପରେ ଏହା ହେଉଛି ତାଙ୍କର ଆଉ ଏକ ବଡ କାର୍ଯ୍ୟକ୍ରମ।
ବିଧାନସଭାରେ କଂଗ୍ରେସ ବିଧାୟକଙ୍କୁ ନିଲମ୍ବନ କରିବା ବିରୋଧରେ ଗର୍ଜ୍ଜନ କରିବ କଂଗ୍ରେସ। ବିଜେପି ସରକାରର ଗୁଣ୍ଡାରାଜ ବିରୋଧରେ କରିବ ପ୍ରତିବାଦ।ରାଜ୍ୟରେ ମହିଳା ନିର୍ଯ୍ୟାତନା ବୃଦ୍ଧି ବିରୋଧରେ ପ୍ରତିବାଦ କରିବ ଦଳ। ବିଧାନସଭାରେ କଂଗ୍ରେସ ବିଧାୟକମାନେ ନାରୀ ନିର୍ଯ୍ୟାତନା ବିରୋଧରେ ସ୍ବର ଉତ୍ତୋଳନ କରିବାରୁ ସେମାନଙ୍କୁ ନିଲମ୍ବନ କରାଯାଇଛି। ଏହାର ପ୍ରତିବାଦ କରିବ କଂଗ୍ରେସ।
ଆଜି ଦିନ ୧୦ ଟାରେ ପ୍ରଦେଶ କଂଗ୍ରେସ ସଭାପତି ଶ୍ରୀ ଭକ୍ତଚରଣ ଦାସଙ୍କ ନେତୃତ୍ୱରେ ଲୋଏର ପିଏମ୍ଜି ଠାରେ ଏହି ବିଧାନସଭା ଘେରାଉ କାର୍ଯ୍ୟକ୍ରମ ଆୟୋଜିତ ହେବ। ଏହି କାର୍ଯ୍ୟକ୍ରମରେ ଓଡ଼ିଶା ପ୍ରଭାରୀ ଶ୍ରୀଯୁକ୍ତ ଅଜୟ କୁମାର ଲଲ୍ଲ, ଓଡ଼ିଶା ସହ-ପ୍ରଭାରୀ ମିସ୍ ରୋଜାଲିନା ତିର୍କି, କଂଗ୍ରେସ ବିଧାୟକ ଓ ବରିଷ୍ଠ କଂଗ୍ରେସ ନେତୃବର୍ଗ ଯୋଗଦେବେ।ଓଡ଼ିଶାର ବିଭିନ୍ନ ପ୍ରାନ୍ତରୁ କଂଗ୍ରେସ କର୍ମୀ ଓ ବିଶେଷ କରି ମହିଳା ଓ ବିଭିନ୍ନ ବର୍ଗର ଲୋକ ଅଂଶ ଗ୍ରହଣ କରିବେ।
