ନୟାଗଡ଼: ନୟାଗଡ଼ରେ ଆନ୍ତର୍ଜାତୀୟ ତୃତୀୟଲିଙ୍ଗୀ ଦିବସ ଜିଲ୍ଲା ସାମାଜିକ ସୁରକ୍ଷା, ଭିନ୍ନକ୍ଷମ ସଶକ୍ତକରଣ ବିଭାଗ ଏବଂ ଜିଲ୍ଲା ପ୍ରଶାସନ ପକ୍ଷରୁ ନୟାଗଡ଼ ଜ଼ିଲ୍ଲାପାଳଙ୍କ ସଦଭାବନା ଗୃହରେ ଆୟୋଜିତ ହୋଇଛି। ଏହି ବୈଠକରେ ମୁଖ୍ୟଅତିଥି ଭାବେ ଜିଲ୍ଲା ପରିଷଦ ଅଧ୍ୟକ୍ଷ ଦେବାଶିଷ ପଟ୍ଟନାୟକ ଏବଂ ସମ୍ମାନିତ ଅତିଥି ଭାବେ ଅତିରିକ୍ତ ଜିଲ୍ଲାପାଳ ରୋଜିନା ଦାଶ, ଜିଲ୍ଲାପରିଷଦ ମୁଖ୍ୟ ଉନ୍ନୟନ ଅଧିକାରୀ ଲଗ୍ନଜିତ ରାଉତ, ଉପଜିଲ୍ଲାପାଳ କର୍ଣ୍ଣଦେବ ସମାଦ୍ଦାର, ଜିଲ୍ଲା ସୂଚନା ଓ ଲୋକ ସଂପର୍କ ଅଧିକାରୀ ତରୁଣ କୁମାର ମହାପାତ୍ର, ଜିଲ୍ଲା ସାମାଜିକ ସୁରକ୍ଷା ଅଧିକାରୀ କାମଦେବ ନାୟକ ପ୍ରମୁଖ ଯୋଗ ଦେଇ ତୃତୀୟଲିଙ୍ଗୀ ମାନଙ୍କ ପାଇଁ ଆଜି ଏକ ଖୁସି ଦିବସ ବୋଲି ଅତିଥି ମାନେ ବକ୍ତବ୍ୟ ରଖିଥିଲେ।
ନିଜ ଅଧିକାର ପାଇଁ ନିଜେ ଲଢ଼ିବା ଆବଶ୍ୟକ ଅଛି। ସମସ୍ତେ ନିଜ ନିଜର ସ୍ୱତନ୍ତ୍ର ପରିଚୟ ପତ୍ର ସଠିକ ଭାବରେ କରିବା ପାଇଁ ଅତିଥି ମାନେ ବକ୍ତବ୍ୟ ରଖିଥିଲେ। ପୂର୍ବ ଅପେକ୍ଷା ଆଜିର ସମାଜରେ ତୃତୀୟଲିଙ୍ଗୀ ମାନଙ୍କ ମଧ୍ୟରେ ଅନେକ ପରିବର୍ତନ ଆସିଲାଣି। ସେମାନେ ନିଜ ଗୋଡ଼ରେ ଠିଆ ହୋଇ ପାରିଲେଣି। ତୃତୀୟଲିଙ୍ଗୀ ମାନେ ବିଭିନ୍ନ ସ୍ୱୟଂ ସହାୟକ ଗୋଷ୍ଠି ତିଆରି କରି ସରକାରଙ୍କର ବିଭିନ୍ନ ସୁବିଧା ସୁଯୋଗ ପାଇ ପାରୁଛନ୍ତି। ମଧୁବାବୁ ପେନ୍ସନ ଯୋଜନାରେ ଲାଭବାନ ହେଲେଣି।
ସେହିପରି,ତୃତୀୟ ଲିଙ୍ଗ ପାଇଁ ଅଭିନବ ଯୋଜନା, ଆଇନ ସହାୟତା ବ୍ୟବସ୍ଥା,ଖାଦ୍ୟ ସୁରକ୍ଷା ଯୋଜନା, ବସୁନ୍ଧରା ଯୋଜନା, ସ୍ୱାସ୍ଥ୍ୟ, ବୀମା ବ୍ୟବସ୍ଥା, ବିଭିନ୍ନ ସହାୟତା ଆଦି ରାଜ୍ୟ ଏବଂ କେନ୍ଦ୍ର ସରକାରଙ୍କ ପକ୍ଷରୁ ଯୋଗାଇ ଦିଆଯାଉଥିବା ବିଷୟରେ ଆଲୋଚନା ହୋଇଥିଲା। ଏହି କାର୍ଯ୍ୟକ୍ରମରେ ବହୁ ତୃତୀୟଲିଙ୍ଗୀ ମାନେ ଯୋଗ ଦେଇଥିଲେ।