ଭୁବନେଶ୍ୱର: ଓମଫେଡର 114 ତମ ପରିଚାଳନା ନିର୍ଦ୍ଦେଶକ ମଣ୍ଡଳୀ ବୈଠକ ଆଜି ଭୁବନେଶ୍ୱର ସହିଦ ନଗରସ୍ଥିତ ମୁଖ୍ୟ କାର୍ଯ୍ୟାଳୟରେ ଅନୁଷ୍ଠିତ ହୋଇଯାଇଛି। ଓମଫେଡ୍ ଅଧ୍ୟକ୍ଷ ଶ୍ରୀ କିଶୋର ଚନ୍ଦ୍ର ପ୍ରଧାନୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଓମ୍ଫେଡର ପରିଚାଳନା ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେ ଉପସ୍ଥିତ ଥିଲେ। ଏଥିରେ ରାଜ୍ୟର ବିଭିନ୍ନ ଜିଲ୍ଲାରୁ ଆସିଥିବା ପରିଚାଳନା ନିର୍ଦେଶକ ମଣ୍ଡଳୀର ସଦସ୍ୟ, ସଦସ୍ୟା ଓ ରାଜ୍ୟ ସରକାରଙ୍କର ପ୍ରତିନିଧି ଯୋଗଦେଇଥିଲେ।
ଓମଫେଡକୁ ଦୁଗ୍ଧ ଦେଉଥିବା ଚାଷୀଙ୍କୁ ଦୁର୍ଘଟଣା ଜନିତ ବୀମା ପରିସରଭୁକ୍ତ କରାଯାଇଥିବାରୁ ନିର୍ଦେଶକ ମଣ୍ଡଳୀ, ମୁଖ୍ୟମନ୍ତ୍ରୀ, ବିଭାଗୀୟ ମନ୍ତ୍ରୀ, ପରିଚାଳନା ନିର୍ଦେଶକଙ୍କୁ ଧନ୍ୟବାଦ ଜଣାଇଥିଲେ। ଏହା ଦ୍ୱାରା ରାଜ୍ୟର 2.5 ଲକ୍ଷରୁ ଅଧିକ ପରିବାର ଉପକୃତ ହେବେ। ଚାଷୀମାନଙ୍କର ବୀମା ପ୍ରିମିୟମ ଓମଫେଡ୍ ଦେବ। ଏହି ବୈଠକରେ ରାଜ୍ୟ ସରକାରଙ୍କର ମୁଖ୍ୟମନ୍ତ୍ରୀ କାମଧେନୁ ଯୋଜନାକୁ ସମସ୍ତେ ସ୍ୱାଗତ କରିବା ସହ ମାଈ ବାଛୁରୀ ପାଳନ ଯୋଜନାକୁ ମଧ୍ୟ ଅଭିନନ୍ଦନ ଜଣାଇଛନ୍ତି।
ସଂପ୍ରତି ଦିନକୁ ଦିନ ସବୁ ଜିନିଷର ଦର ବୃଦ୍ଧି ପାଇବାରେ ଲାଗିଛି। ତେଣୁ ଚାଷୀମାନଙ୍କଠାରୁ ସଂଗ୍ରହ ହେଉଥିବା ଦୁଗ୍ଧ ଦାମ ବୃଦ୍ଧି କରିବା ପାଇଁ ପରିଚାଳନା ନିର୍ଦେଶକ ବିଜୟ ଅମୃତା କୁଲାଙ୍ଗେଙ୍କ ଜରିଆରେ ସରକାରଙ୍କୁ ଅବଗତ କରାଇଛନ୍ତି। ଦୁଗ୍ଧର ତିରୋଟ ସମୟରେ ଚାଷୀମାନଙ୍କୁ ରାଜ୍ୟ ସରକାର ଲିଟର ପିଛା 1ରୁ5 ଟଙ୍କା ପର୍ଯ୍ୟନ୍ତ ଇନସେଣ୍ଟିଭ ଦେଉଥିବାରୁ ସମସ୍ତେ ସରକାରଙ୍କୁ ସାଧୁବାଦ ଜଣାଇଛନ୍ତି।
ଗୁଣାତ୍ମକ ଦୁଗ୍ଧ ସଂଗ୍ରହ ଉପରେ ବୈଠକରେ ଗୁରୁତ୍ୱାରୋପ କରାଯାଇଛି। ଚାଷୀଙ୍କଠାରୁ ଗୁଣାତ୍ମକ ଦୁଗ୍ଧ ସଂଗ୍ରହ କରିବା ଏବଂ ସଂଗ୍ରହ ପରିମାଣ ବୃଦ୍ଧି କରିବା ପାଇଁ ମଧ୍ୟ ଏହି ବୈଠକରେ ଆଲୋଚନା ହୋଇଥିଲା। ଏବେ ଦୈନିକ 5 ଲକ୍ଷ 40 ହଜାର ଲିଟର ଦୁଗ୍ଧ ସଂଗ୍ରହ ହେଉଛି। ମାତ୍ର 2025-26 ଆର୍ଥିକ ବର୍ଷରେ ତା’ର ପରିମାଣ 6 ଲକ୍ଷ ଲିଟରକୁ ବୃଦ୍ଧି କରିବା ପାଇଁ ବୈଠକରେ ନିଷ୍ପତ୍ତି ନିଆଯାଇଛି। କେବଳ ସଂଗ୍ରହ ବୃଦ୍ଧି ନୁହେଁ, ଓମ୍ଫେଡ୍ ଉତ୍ପାଦଗୁଡିକୁ ଗ୍ରାମାଞ୍ଚଳରେ ପହଞ୍ଚାଇବା ପାଇଁ ମାର୍କେଟ୍ ବିସ୍ତାର କରିବାକୁ ମଧ୍ୟ ଆଲୋନଚା ହୋଇଥିଲା। ସେହିପରି ଗୁଣାତ୍ମକ ଦୁଗ୍ଧ ସଂଗ୍ରହ ପାଇଁ ଅତ୍ୟାଧୁନିକ ପରୀକ୍ଷା ଯନ୍ତ୍ର ବା ଟେଷ୍ଟିଂ ମେସିନ ରାଜ୍ୟ ସରକାର ପ୍ରତ୍ୟେକ ସୋସାଇଟକୁ ଯୋଗାଇ ଦେବାକୁ ସଦସ୍ୟ ସଦସ୍ୟାମାନେ ଅନୁରୋଧ କରିଛନ୍ତି।
ଆଗାମୀ ଦିନରେ ରାଜ୍ୟର ବିଭିନ୍ନ ଅଂଚଳରେ ସୋଲାର ପ୍ଲାଣ୍ଟ ଓ ବାୟୋ ଗ୍ୟାସ୍ ପ୍ଲାଣ୍ଟ ପ୍ରତିଷ୍ଠା କରିବା ପାଇଁ ମଧ୍ୟ ଆଲୋଚନା ହୋଇଛି।
ଓମଫେଡ୍ ଏକ ଭରସାଯୋଗ୍ୟ ଆତ୍ମ ନିଯୁକ୍ତି ସଂସ୍ଥା ହୋଇଥିବାରୁ ଏଥିରେ ଲକ୍ଷ ଲକ୍ଷ ଦୁଗ୍ଧ ଚାଷୀ ପରିବାର ପ୍ରତିପୋଷଣ ହେଉଛନ୍ତି। ଓଡିଆ ଅସ୍ମିତ ସହ ଜଡିତ ଓମ୍ଫେଡକୁ ସରକାର କାମଧେନୁ ଯୋଜନାରେ ସାମିଲ କରିଛନ୍ତି। ଆଗାମୀ ଦିନରେ ଓମଫେଡ ଉତ୍ପାଦଗୁଡିକ କିପରି ଗ୍ରାମାଞ୍ଚଳର ସବୁ ଲୋକଙ୍କ ପାଖରେପହଞ୍ଚି ପାରିବ, ସେଥିପାଇଁ ସମସ୍ତେ କାମ କରିବାକୁ ଅନୁରୋଧ କରିଛନ୍ତି ପରିଚାଳନା ନିର୍ଦେଶକ ବିଜୟ ଅମୃତା କୁଲାଙ୍ଗେ। ସଦସ୍ୟ ସଦସ୍ୟାମାନେ ଯେଉଁସବୁ ପ୍ରସ୍ତାବ ଦେଇଛନ୍ତି ତାହା ସରକାରଙ୍କ ନିକଟରେ ଉପସ୍ଥାପନ କରିବେ ବୋଲି ସେ କହିଛନ୍ତି।
ଏହି ବୈଠକରେ ପରିଚାଳନା ନିର୍ଦ୍ଦେଶକ ମଣ୍ଡଳୀର ସମସ୍ତ ସଦସ୍ୟ ସଦସ୍ୟାଙ୍କ ସହ ଅତିରିକ୍ତ ନିର୍ଦେଶକ, ଡକ୍ଟର ଗିରିଧର ଭୋଇ, ଅତିରିକ୍ତ ନିର୍ଦ୍ଦେଶକ ଡକ୍ଟର ହାଡିବନ୍ଧୁ ଭୋଇ, ଓମଫେଡର ଜେନେରାଲ ମ୍ୟାନେଜର (ଫାଇନାନ୍ସ) ସୁରେଶ କୁମାର ଅଲଟିଆ, ଡେପୁଟି ଜେନେରାଲ ମ୍ୟାନେଜର (ମାନବ ସମ୍ବଳ) ଡକ୍ଟର ଜୟକୃଷ୍ଣ ପଟ୍ଟନାୟକ ପ୍ରମୁଖ ଉପସ୍ଥିତ ଥିଲେ।