ଭୁବନେଶ୍ବର: ଶେଷରେ ମୁହଁ ଖୋଲିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ। ସେ ଆଜି ନବୀନ ନିବାସରେ ନିଜର ମତ ରଖିଛନ୍ତି। ଦୀର୍ଘଦିନ ଧରି ଦଳ ଭିତରେ ଯେଉଁ ମେଳି ଚାଲିଛି ତାହା ଉପରେ କହିଛନ୍ତି। ଯାହାକୁ ନେଇ ପାଣ୍ଡିଆନ ବିରୋଧୀଙ୍କ ମୁଣ୍ଡ ଅକଲ ହୋଇଯାଇଛି। ସେପଟେ ପାଣ୍ଡିଆନ ସପକ୍ଷ ଗୋଷ୍ଠୀ ଏହାକୁ ନେଇ ବେଶ ଉତ୍ସାହିତ ହୋଇପଡିଛନ୍ତି।
ଆଜି ନବୀନ ତାଙ୍କର ଗଣମାଧ୍ୟମକୁ ଦେଇଥିବା ମନ୍ତବ୍ୟ ତିନିଟି ଭାଗରେ ବିଭକ୍ତ କରିଛନ୍ତି। ପ୍ରଥମେ ସେ ବିଜେଡି ନେତାଙ୍କ ବିଭିନ୍ନ ମେଳିକୁ ନେଇ ମନ୍ତବ୍ୟ ଦେଇଛନ୍ତି। ସେ କହିଛନ୍ତି ଯେ, ନେତାମାନେ ବିଭିନ୍ନ ସ୍ଥାନରେ ବା ହୋଟେଲରେ ବୈଠକ କରୁଛନ୍ତି। ସେମାନଙ୍କର ଦଳୀୟ କାର୍ଯ୍ୟାଳୟ ଶଙ୍ଖ ଭବନ ଅଛି। ସେଠାରେ ସେମାନେ ବୈଠକ କରନ୍ତୁ ବୋଲି ନବୀନ କହିଛନ୍ତି।
ସେହିପରି ପ୍ରଭାତ ତ୍ରିପାଠୀଙ୍କ ବୟାନକୁ ନେଇ ନବୀନ କହିଛନ୍ତି ଯେ, ସେ ବହୁତ ବର୍ଷ ତଳେ ଦଳରୁ ବହିସ୍କାର ହୋଇଛନ୍ତି। ସେ ଚିଟ ଫଣ୍ଡ ଟଙ୍କା ଠକେଇରେ ଜେଲ ଯାଇଛନ୍ତି। ସେ ଯାହା କହୁଛନ୍ତି ସେଥିରେ କିଛି ଗୁରୁତ୍ବ ନାହିଁ। ସେ ଦଳର କିଛି ନୁହଁନ୍ତି ବୋଲି ନବୀନ କହିଛନ୍ତି।
ଅନ୍ୟପକ୍ଷରେ ପାଣ୍ଡିଆନଙ୍କୁ ନେଇ ନବୀନ କହିଛନ୍ତି ଯେ, କାର୍ତ୍ତିକେୟନ ପାଣ୍ଡିଆନ ବିଗତ ବର୍ଷରେ ବେଶ ଭଲ କାମ କରିଛନ୍ତି। ହେଲେ ନିର୍ବାଚନ ପରେ ସେ ଦଳ ଛାଡି ଦେଇଛନ୍ତି। ସେ ପ୍ରାୟ ଦଶ ମାସ ହେଲା ଦଳରେ ନାହାଁନ୍ତି। ତେଣୁ ସେ ଦଳର କୌଣସି କାର୍ଯ୍ୟରେ ସାମିଲ ନାହାଁନ୍ତି ବୋଲି ନବୀନ କହିଛନ୍ତି।
ତେବେ ୱାକଫ ବିଲ ଉପରେ ନବୀନ କିଛି କହି ନ ଥିଲେ। ସେ ନିର୍ଦ୍ଦେଶ ଦେଇଥିଲେ କି ନାହିଁ ସେ ଉପରେ ନବୀନ କିଛି ମନ୍ତବ୍ୟ ଦେଇ ନ ଥିଲେ।
