ଭୁବନେଶ୍ୱର: ରାଜଭବନରେ ଓଡିଆ ନବ ବର୍ଷ ଏବଂ ହିମାଚଳ ପ୍ରଦେଶର ପ୍ରତିଷ୍ଠା ଦିବସ ତଥା ବିଭିନ୍ନ ପ୍ରଦେଶର ନବବର୍ଷ ଏକ ମନୋଜ୍ଞ ପରିବେଶରେ ପାଳିତ ହୋଇଯାଇଛି । ଏହିି ପରିପ୍ରେକ୍ଷୀରେ ଚଳିତ ଏପ୍ରିଲ ୧୪ ତାରିଖ ଅପରାହ୍ନରେ ରାଜଭବନର ନ୍ୟୁ ଅଭିଷେକ ହଲ୍ଠାରେ ଆୟୋଜିତ ଉତ୍ସବରେ ଉଦ୍ବୋଧନ ଦେଇ ରାଜ୍ୟପାଳ ଡ. ହରି ବାବୁ କମ୍ଭମ୍ପାଟି କହିଥିଲେ ଯେ ରାଜଭବନରେ ଅନ୍ୟ ରାଜ୍ୟର ପ୍ରତିଷ୍ଠା ଦିବସ ପାଳନ “ଏକ ଭାରତ – ଶ୍ରେଷ୍ଠ ଭାରତ”ର ପ୍ରକୃତ ଭାବନାକୁ ପ୍ରତିଫଳିତ କରୁଛି ।
ଏତଦ୍ବ୍ୟତୀତ ଏକ ଶକ୍ତିଶାଳୀ ଓ ସମୃଦ୍ଧ ଓଡିଶା ଗଠନ ପାଇଁ ଓଡିଆ ନବବର୍ଷରେ ସମସ୍ତେ ପ୍ରତିବଦ୍ଧତା ଦୋହରାଇବାକୁ ରାଜ୍ୟପାଳ ଆହ୍ୱାନ ଜଣାଇଥିଲେ । ଓଡିଆ ନବ ବର୍ଷ ଅବସରରେ ଓଡିଶାବାସୀଙ୍କୁ ତଥା ହିମାଚଳ ପ୍ରଦେଶର ପ୍ରତିଷ୍ଠା ଦିବସ ଉପଲକ୍ଷେ ଉକ୍ତ ରାଜ୍ୟର ଅଧିବାସୀମାନଙ୍କୁ ଏବଂ ନବବର୍ଷ ପାଳନ କରୁଥିବା ଆସାମ, କେରଳ, ତାମିଲନାଡୁ, ବୈଶାଖୀ ପାଳନ କରୁଥିବା ପଞ୍ଜାବ ରାଜ୍ୟର ଅଧିବାସୀମାନଙ୍କୁ ରାଜ୍ୟପାଳ ଶୁଭେଚ୍ଛା ଜଣାଇବା ସହିତ ସେମାନଙ୍କର ସୁଖ ସମୃଦ୍ଧି କାମନା କରିଥିଲେ ।
ଏହି ସମାରୋହରେ ଉଦ୍ବୋଧନ ଦେଇ ରାଜ୍ୟପାଳ କହିଥିଲେ ଯେ, ଏପରି ଉତ୍ସବର ମୁହୂର୍ତ ତାଙ୍କ ପାଇଁ ସ୍ୱତନ୍ତ୍ର, କାରଣ ସେ ପ୍ରଥମ ଥର ପାଇଁ ଓଡିଶାରେ ଓଡିଆ ନବ ବର୍ଷ ପାଳନ କରୁଛନ୍ତି । ସଂଯୋଗ ବଶତଃ ହିମାଚଳ ପ୍ରଦେଶର ପ୍ରତିଷ୍ଠା ଦିବସ ପାଳନରେ ସାମିଲ ହୋଇଛନ୍ତି । କିଛି ଦିନ ପୂର୍ବରୁ ରାଜ ଭବନରେ ଉଗାଡ଼ି ଓ ଗୁଡ଼ି ପଡୱା ଉତ୍ସବ ମୁଖରିତ ପରିବେଶରେ ପାଳିତ ହୋଇଥିଲା, ଯାହା ଆନ୍ଧ୍ର ପ୍ରଦେଶ, ତେଲେଙ୍ଗାନା, କର୍ଣର୍ାଟକ ଏବଂ ମହାରାଷ୍ଟ୍ରର ସଂସ୍କୃତି ଓ ପରମ୍ପରାକୁ ଏକତ୍ରିତ କରିଥିଲା ।
ପୂର୍ବ ମାସଗୁଡ଼ିକରେ ମଧ୍ୟ ବିଭିନ୍ନ ରାଜ୍ୟର ପ୍ରତିଷ୍ଠା ଦିବସ ମହା ଆଡମ୍ବରରେ ପାଳିତ ହୋଇଥିଲା ଏବଂ ଏହା ପ୍ରତ୍ୟେକ ରାଜ୍ୟର ସ୍ୱତନ୍ତ୍ର ପରିଚୟ, ଗୌରବମୟ ଐତିହ୍ୟ ଏବଂ ଆଧୁନିକ ଭାରତ ଗଠନରେ ଅବଦାନକୁ ପ୍ରତିଫଳିତ କରୁଥିଲା ବୋଲି ରାଜ୍ୟପାଳ କହିଥିଲେ । ପୁଣି ରାଜ୍ୟପାଳ କହିଥିଲେ ଯେ ଓଡିଆ ନବ ବର୍ଷ ଏବଂ ମହାବିଷୁବ ସଂକ୍ରାନ୍ତି ନୂତନତା, ଆଶା ଏବଂ ଦିବ୍ୟ ଆଶୀର୍ବାଦର ଏକ ଶୁଭ ସମୟର ବାର୍ତ୍ତା ପ୍ରଦାନ କରେ ।
ଏହି ପବିତ୍ର ଦିନ ଆମକୁ ନୂଆ ଆଶା, ନୂଆ ବିଶ୍ୱାସର ସହିତ ନୂତନ ଆରମ୍ଭକୁ ଗ୍ରହଣ କରିବାକୁ ଆମନ୍ତ୍ରଣ କରେ । ଓଡିଶାର କାଳଜୟୀ ମନ୍ଦିର, ଆତ୍ମା ପୂର୍ଣ୍ଣ କଳା ଏବଂ ସ୍ପନ୍ଦନଶୀଳ ପରମ୍ପରା ସହିତ ଏହାର କୃପା ଏବଂ ସ୍ଥିରତା ପ୍ରେରଣା ଦେଇ ଚାଲିଛି । ମହାବିଷୁବ ସଂକ୍ରାନ୍ତିର ଆଲୋକ ଓଡିଶାକୁ ଏକ ଉଜ୍ଜ୍ୱଳ ଏବଂ ଅଧିକ ସମାବେଶୀ ଭବିଷ୍ୟତ ଆଡକୁ ମାର୍ଗଦର୍ଶନ କରିବ ବୋଲି କହିବା ସହିତ ନୂତନ ବର୍ଷ ପ୍ରତ୍ୟେକ ଘରେ ଖୁସି ଆଣୁ ବୋଲି ରାଜ୍ୟପାଳ କାମନା କରିଥିଲେ ।
ଏହି ଅବସରରେ ରାଜ୍ୟପାଳ ଓଡିଶା ଓ ହିମାଚଳ ପ୍ରଦେଶର ସୁନ୍ଦର ସଂପର୍କ ବିଷୟରେ ଅବତାରଣା କରି ୧୯୪୮ ମସିହା ଏପ୍ରେଲ ମାସରେ ହିମାଚଳ ପ୍ରଦେଶ ଗଠନ ହେବା ପର ଠାରୁ ସନ୍ତୁଳିତ ବିକାଶ, ପରିବେଶଗତ ସଂରକ୍ଷଣ ଏବଂ ସାଂସ୍କୃତିକ ଗର୍ବର ଏକ ଉଜ୍ଜଳ ଉଦାହରଣ ଭାବେ ଉଭା ହୋଇଛି ବୋଲି କହିଥିଲେ । ପର୍ଯ୍ୟଟନ, ଉଦ୍ୟାନ କୃଷି, ଶିକ୍ଷା ଏବଂ ପରିବେଶ ସଂରକ୍ଷଣରେ ଦେଶ ଗଠନରେ ହିମାଚଳ ପ୍ରଦେଶର ଭୂମିକା ପ୍ରକୃତରେ ପ୍ରଶଂସନୀୟ । ହିମାଚଳ ପ୍ରଦେଶର ଅନେକ ମୂଳ ବାସିନ୍ଦା ଏବେ ଓଡ଼ିଶାକୁ ନିଜର ଦ୍ୱିତୀୟ ଘର ବୋଲି କହୁଛନ୍ତି । ସେମାନଙ୍କର ଅଧ୍ୟୟନ, ବୃତ୍ତିଗତ କାର୍ଯ୍ୟ ଓଡିଶାର ବିକାଶରେ ଯୋଗଦାନ ଦେଇଛି ବୋଲି ରାଜ୍ୟପାଳ କହିଥିଲେ ।
ଏହି ସମାରୋହରେ ବକ୍ତା ଭାବେ ଯୋଗଦେଇ ଲବ୍ଧ ପ୍ରତିଷ୍ଠିତ କଥାକାର ପ୍ରଫେସର ଦାଶ୍ ବେନହୁର ଏବଂ ସୁନାମଧନ୍ୟା କଣ୍ଠଶିଳ୍ପୀ ଶ୍ରୀମତୀ ଗୀତା ପଟ୍ଟନାୟକ ଓଡ଼ିଆ ନବ ବର୍ଷ ପାଳନର ତାତ୍ପର୍ଯ୍ୟ ସଂପର୍କରେ ସାରଗର୍ଭକ ବକ୍ତବ୍ୟ ପ୍ରଦାନ କରିଥିଲେ । ଏତଦ୍ବ୍ୟତୀତ ରିଜିଓନାଲ ଇନ୍ଷ୍ଟିଚ୍ୟୁଟ୍ ଅଫ୍ ଏଜୁକେସନର ଆସିଷ୍ଟାଂଟ୍ ପ୍ରଫେସର ରାଜ କୁମାର ଓଡିଶା ସହିତ ହିମାଚଳ ପ୍ରଦେଶର ସଂପର୍କ, ନିଜ ରାଜ୍ୟର ବୈଶିଷ୍ଟ୍ୟ ଏବଂ ଓଡିଶାରେ ନିଜର ଅଭିଜ୍ଞତା ଓ ଉପଲବ୍ଧି ସଂପର୍କରେ ବକ୍ତବ୍ୟ ପ୍ରଦାନ କରିଥିଲେ ।
ଆଡିସିନାଲ ଡିସିପି ଶ୍ରୀମତୀ ଅମରିତ୍ ପାଲ୍ କୌର୍ ବୈଶାଖୀ ପାଳନର ବିଶେଷତ୍ଵ ସମ୍ପର୍କରେ ବକ୍ତବ୍ୟ ପ୍ରଦାନ କରିଥିଲେ । ରାଜ୍ୟପାଳଙ୍କ ଲୋକ ସଂପର୍କ ଅଧିକାରୀ ସଂଗ୍ରାମ ଦେଓଭଂଜ ପ୍ରାରମ୍ଭରେ ସ୍ୱାଗତ ଭାଷଣ ପ୍ରଦାନ କରିଥିଲେ । ଏହି ଅବସରରେ ଓଡିଶା ସରକାରଙ୍କ ଓଡିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ତଥା ବିଭିନ୍ନ ଅନୁଷ୍ଠାନ ସୌଜନ୍ୟରେ ସାଂସ୍କୃତିକ କାର୍ଯ୍ୟକ୍ରମ ପରିବେଷିତ ହୋଇଥିଲା ।
