ଖୋର୍ଦ୍ଧା: ବହୁଚର୍ଚ୍ଚିତ ବାଣପୁର ପ୍ରଶାନ୍ତ ହତ୍ୟାକାଣ୍ଡ ମାମଲାର ରାୟ ଖୋର୍ଦ୍ଧା ଏଡିଜେ-୧ ଙ୍କ କୋର୍ଟରେ ପ୍ରକାଶ ପାଇଛି। ସମସ୍ତ ସାକ୍ଷ୍ୟ ଓ ପ୍ରମାଣକୁ ଭିତ୍ତିକରି ବିଚାରପତି ରଞ୍ଜୁଲତା ଲେଙ୍କା ବାଣପୁର ଥାନା ହଳନ୍ଦା ଗ୍ରାମର ଚାରି ଜଣ ଅଭିଯୁକ୍ତଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଅଭିଯୁକ୍ତ ମାନେ ଉକ୍ତ ଗ୍ରାମର ଆଶିଷ କୁମାର ବିଶ୍ବାଳ, ମାନସ ପାତ୍ର, ସନାତନ ବିଶ୍ବାଳ, ଆଲୋକ ବିଶ୍ବାଳ।
୨୦୧୪ ମସିହା ଅକ୍ଟୋବର ୨୨ତାରିଖରେ କଂକ୍ରିଟ୍ ରାସ୍ତାର ଠିକାଦାରୀକୁ ନେଇ ଏହି ହତ୍ୟା କାଣ୍ଡ ଘଟିଥିଲା। ପ୍ରଶାନ୍ତ ବିଶୋୟୀ ଓରଫ୍ ବୋତଲ ଯାହାଙ୍କ ଦାଣ୍ଡରେ ଠିକାଦାରଙ୍କୁ ବୋମାମାଡ଼ କରି ହତ୍ୟାକୁ ନେଇ ଗ୍ରାମର ଶ୍ରୀନିବାସ ବିଶ୍ବାଳ, ପୂର୍ଣ୍ଣଚନ୍ଦ୍ର ବିଶ୍ବାଳ, ଆଶିଷ କୁମାର ବିଶ୍ବାଳ, ମାନସ ପାତ୍ର, ସନାତନ ପାତ୍ର ଓ ଆଲୋକ ପାତ୍ର ଆଦିଙ୍କ ସହିତ ବାଦ ବିବାଦ ମୁଣ୍ଡ ଟେକିଥିଲl l ହତ୍ୟାକାଣ୍ଡ ଦିନ ରାତି ପ୍ରାୟ ୮ଟାରେ ଉପରୋକ୍ତ ଅଭିଯୁକ୍ତମାନେ ଖଣ୍ଡା, ଭୂଜାଲି, ବୋମା ଆଦି ମାରଣାସ୍ତ୍ର ଧରି ପ୍ରଶାନ୍ତଙ୍କ ଘର ନିକଟ କୁ କୁ ଆସିଥିଲେ।
ପ୍ରଶାନ୍ତଙ୍କ ଘର ବାରଣ୍ଡାରେ ତାଙ୍କ ମା’ ସରଜୁ ଓରଫ୍ କନ୍ଧୁଣୀ ବିଶୋୟୀ ଓ ନାତୁଣୀ ଉମି ପ୍ରଧାନ ଉପସ୍ଥିତ ଥିଲେ। ସରଜୁଙ୍କୁ ଅଭିଯୁକ୍ତମାନେ ଗାଳିଗୁଲଜ କରି ମାରି ଦେବାକୁ କେବଳ ଧମକ ଦେଇଥିଲେ। ପରେ ବୋମା ଫିଙ୍ଗିଥିଲେ। ସରଜୁଙ୍କ ଗୋଡ଼ରେ ଗଭୀର ଆଘାତ ଲାଗିଥିଲା ଓ ନାତୁଣୀ ବି ଆହତ ହୋଇଥିଲେ। ଏହି ସମୟରେ ପ୍ରଶାନ୍ତ ପହଂଚିବାରୁ ଉତେଜନା ଆହୁରି ବଢିଥିଲା। ପ୍ରଶାନ୍ତଙ୍କୁ ଲକ୍ଷ୍ୟ କରି ଅଭିଯୁକ୍ତମାନେ ଆଉ ଏକ ବୋମାମାଡ଼ କରିଥିଲେ। ଘଟଣାରେ ପ୍ରଶାନ୍ତ ଗୁରୁତର ହୋଇଥିଲେ। ଅଭିଯୁକ୍ତମାନେ କ୍ଷତାକ୍ତ ପ୍ରଶାନ୍ତଙ୍କୁ ପୁଣି ଆଘାତ କରିଥିଲେ। ଯେଉଁଥିପାଇଁ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା।
ପ୍ରଶାନ୍ତଙ୍କ ମୃତ୍ୟୁକୁ ନେଇ ପ୍ରଶାନ୍ତଙ୍କ ମା’ ବାଣପୁର ଥାନାରେ ଲିଖିତ ଅଭିଯୋଗ କରିଥିଲେ। ପୁଲିସ ଏତଲା କ୍ରମେ ଘଟଣାର ତଦନ୍ତ କରି ଅଭିଯୁକ୍ତମାନଙ୍କୁ ଗିରଫ କରିଥିଲା। ଏହି ମାମଲାର ଶୁଣାଣି ଏଡିଜେ-୧ଙ୍କ କୋର୍ଟରେ ଚାଲିଥିଲା। ମାମଲାର ରାୟ ଆସିବା ପ୍ରାୟ ବର୍ଷେ/ଦେଢ଼ ବର୍ଷ ପୂର୍ବରୁ ଦୁଇ ଜଣ ଅଭିଯୁକ୍ତ ଶ୍ରୀନିବାସ ବିଶ୍ବାଳ ଓ ପୂର୍ଣ୍ଣଚନ୍ଦ୍ର ବିଶ୍ବାଳଙ୍କର ମୃତ୍ୟୁ ହୋଇ ସାରିଛି।
ଅନ୍ୟ ଉପରୋକ୍ତ ଚାରି ଅଭିଯୁକ୍ତଙ୍କ ବିରୋଧରେ କୋର୍ଟ ଆଜୀବନ କାରାଦଣ୍ଡ ଶୁଣାଇଛନ୍ତି। ସରକାରୀ ଓକିଲ ସଲିଳ କୁମାର ପ୍ରଧାନ ମାମଲା ପରିଚାଳନା କରୁଥିଲେ।
