ନୂଆଦିଲ୍ଲୀ: ଜାମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଦେଶରେ ରହୁଥିବା ପାକିସ୍ତାନୀ ତଥା ବେଆଇନ ବାଂଲାଦେଶୀମାନଙ୍କୁ ଦେଶରୁ ବିତାଡିତ କରିବା କାର୍ଯ୍ୟ ଜୋରଦାର କରାଯାଇଛି। ଏହି ମାମଲାରେ ଗୁଜୁରାଟ ପୋଲିସକୁ ଏକ ବଡ଼ ସଫଳତା ମିଳିଛି।
ସୂଚନା ଅନୁଯାୟୀ, ଶନିବାର ଦିନ ୩ ଟାରୁ ଆରମ୍ଭ ହୋଇଥିବା ଏକ ଅପରେସନରେ ଗୁଜରାଟ ପୋଲିସ ବେଆଇନ ଭାବେ ବାସ କରୁଥିବା ବାଂଲାଦେଶୀମାନଙ୍କୁ ଅଟକ ରଖିଛି। ଗୁଜୁରାଟ, ଅହମ୍ମଦାବାଦ ଏବଂ ସୁରଟର ପ୍ରମୁଖ ସହରରୁ ୧୦୨୪ ବାଂଲାଦେଶୀଙ୍କୁ ପୋଲିସ ଗିରଫ କରିଛି। ଅହମ୍ମଦାବାଦରୁ୮୯୦ ବାଂଲାଦେଶୀ ଏବଂ ସୁରଟରୁ ୧୩୪ ବେଆଇନ ଅନୁପ୍ରବେଶକାରୀଙ୍କୁ ପୋଲିସ ଗିରଫ କରିଛି।
ଗୁଜୁରାଟର ଗୃହମନ୍ତ୍ରୀ ହର୍ଷ ସାଙ୍ଗଭି ଏହି ପୋଲିସର କାର୍ଯ୍ୟକୁ ଏକ ଐତିହାସିକ ବିଜୟ ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ, ବେଆଇନ ଭାବେ ରହୁଥିବା ବାଂଲାଦେଶୀମାନଙ୍କୁ ପୋଲିସ ନାଲି ଆଖି ଦେଖାଇଛି। ପୋଲିସ ଅଧିକାରୀମାନେ ମଧ୍ୟ ଏହି ଅଭିଯାନ ବିଷୟରେ ସୂଚନା ଦେଇ କହିଛନ୍ତି ଯେ, ଏହା ବେଆଇନ ପ୍ରବାସୀ ଅନୁପ୍ରବେଶକାରୀଙ୍କ ବିରୋଧରେ ଏକ ଐତିହାସିକ ସର୍ଜିକାଲ ଷ୍ଟ୍ରାଇକ୍। କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଗୁଜୁରାଟ ପୋଲିସର ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି, ଯେଉଁଥିପାଇଁ ଭାରତ ସରକାର ପାକିସ୍ତାନକୁ ଦାୟୀ କରିଛନ୍ତି।