ନୂଆଦିଲ୍ଲୀ: ବରିଷ୍ଠ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଭିଡିଓରେ, ରାହୁଲ ଗାନ୍ଧୀ ଆମେରିକାର ବ୍ରାଉନ୍ ବିଶ୍ୱବିଦ୍ୟାଳୟରେ ଏକ କାର୍ଯ୍ୟକ୍ରମ ସମୟରେ ଛାତ୍ରଛାତ୍ରୀମାନଙ୍କ ସହ କଥା ହେଉଥିବାର ଦେଖାଯାଉଛି। ଏହି କାର୍ଯ୍ୟକ୍ରମ ସମୟରେ, ଜଣେ ଶିଖ ଛାତ୍ର ରାହୁଲ ଗାନ୍ଧୀଙ୍କୁ ୧୯୮୪ ଦଙ୍ଗା ଏବଂ ଶିଖ ପ୍ରସଙ୍ଗରେ କିଛି ପ୍ରଶ୍ନ ପଚାରିଥିଲେ।
ଛାତ୍ର ଜଣକ ରାହୁଲ ଗାନ୍ଧୀଙ୍କୁ ପଚାରିଲେ ଯେ, “ଆପଣ କହିଲେ ରାଜନୀତି ନିର୍ଭୀକ ହେବା ଉଚିତ, ଭୟ କରିବା ଉଚିତ୍ ନୁହେଁ। କିନ୍ତୁ ଆମେ କେବଳ କଡ଼ା ପିନ୍ଧିବାକୁ ଚାହୁଁନାହୁଁ, ଆମେ କେବଳ ପଗଡ଼ି ବାନ୍ଧିବାକୁ ଚାହୁଁନାହୁଁ, ଆମେ ମତବ୍ୟକ୍ତ କରିବାର ସ୍ୱାଧୀନତା ଚାହୁଁ, ଯାହା କଂଗ୍ରେସ ଦଳର ଶାସନରେ ଅନୁମତି ନଥିଲା।” ଛାତ୍ର ଜଣଙ୍କ କଂଗ୍ରେସ ଉପରେ ଶିଖ ସ୍ୱରକୁ ଅଣଦେଖା କରିବା ଏବଂ ୧୯୮୪ ଦଙ୍ଗାର ଅଭିଯୁକ୍ତ ସଜ୍ଜନ କୁମାରଙ୍କ ପରି ଲୋକଙ୍କୁ ସୁରକ୍ଷା ଦେବାର ମଧ୍ୟ ଅଭିଯୋଗ ଆଣିଥିଲେ।
ଏହା ଉପରେ ରାହୁଲ ଗାନ୍ଧୀ କହିଥିଲେ ଯେ, ସେତେବେଳେ ଦଳର ଅନେକ ଭୁଲ ଘଟିଥିଲା। କଂଗ୍ରେସ ଦଳର ଇତିହାସରେ ହୋଇଥିବା ପ୍ରତ୍ୟେକ ଭୁଲର ଦାୟିତ୍ୱ ନେବାକୁ ସେ ପ୍ରସ୍ତୁତ। ମୁଁ ସାର୍ବଜନୀନ ଭାବରେ କହିସାରିଛି ଯେ, ୮୦ ଦଶକରେ ଯାହା ଘଟିଥିଲା ତାହା ଭୁଲ ଥିଲା। ମୁଁ ଅନେକ ଥର ସ୍ୱର୍ଣ୍ଣ ମନ୍ଦିର ପରିଦର୍ଶନ କରିଛି। ମୋର ଭାରତରେ ଶିଖ ସମ୍ପ୍ରଦାୟ ସହିତ ବହୁତ ଭଲ ସମ୍ପର୍କ ଅଛି।”