ନୂଆଦିଲ୍ଲୀ: ଭାରତୀୟ ସେନା ପାକିସ୍ତାନ ଏବଂ ପିଓକେରେ ଥିବା ଆତଙ୍କବାଦୀ ଶିବିରଗୁଡ଼ିକୁ ଧ୍ୱଂସ କରି ପହଲଗାମ ଆତଙ୍କବାଦୀ ଆକ୍ରମଣର ପ୍ରତିଶୋଧ ନେଇଛି। ଏହାକୁ ନେଇ ଆଜି ପାକିସ୍ତାନରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା, ଯେଉଁଥିରେ ଭାରତୀୟ ବିମାନ ଆକ୍ରମଣ ବିଷୟରେ ଆଲୋଚନା କରାଯାଇଥିଲା। ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫ ଆଜି ସନ୍ଧ୍ୟାରେ ଏହି ପ୍ରସଙ୍ଗରେ ସଂସଦରେ ଭାଷଣ ଦେଇପାରନ୍ତି। ଆଜି ଭୋର ସମୟରେ ଭାରତୀୟ ସେନା ଅପରେସନ ସିନ୍ଦୂର ଅଧୀନରେ ପାକିସ୍ତାନ ଏବଂ ପାକ୍ ଅଧିକୃତ କାଶ୍ମୀର (ପିଓକେ)ରେ ନଅଟି ଆତଙ୍କବାଦୀ ଶିବିର ଉପରେ ବିମାନ ଆକ୍ରମଣ କରିଥିଲା।
ପ୍ରତିଶୋଧ ନେବା ପାଇଁ ଅନୁମତି ମାଗିଲା ପାକ୍ ସେନା:
ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ଅଧ୍ୟକ୍ଷତାରେ ଜାତୀୟ ସୁରକ୍ଷା ପରିଷଦ (NSC)ର ଏକ ବୈଠକ ଅନୁଷ୍ଠିତ ହୋଇଥିଲା, ଯେଉଁଥିରେ କ୍ୟାବିନେଟ ମନ୍ତ୍ରୀ, ମୁଖ୍ୟମନ୍ତ୍ରୀ, ସମସ୍ତ ସଶସ୍ତ୍ର ବାହିନୀ ମୁଖ୍ୟ ଏବଂ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ। NSC ବୈଠକ ଦୁଇ ଘଣ୍ଟାରୁ ଅଧିକ ସମୟ ଧରି ଚାଲିଥିଲା ଏବଂ ସୁରକ୍ଷା ପରିସ୍ଥିତି ଉପରେ ବିସ୍ତୃତ ଆଲୋଚନା କରାଯାଇଥିଲା। ଭାରତର ପ୍ରତିଶୋଧମୂଳକ କାର୍ଯ୍ୟାନୁଷ୍ଠାନରେ ପାକିସ୍ତାନ କ୍ରୋଧିତ। ପାକିସ୍ତାନୀ ସେନା ପ୍ରଧାନମନ୍ତ୍ରୀ ଶାହବାଜ ସରିଫଙ୍କଠାରୁ ଆଦେଶ ମାଗିଛି। ଏହା ଉପରେ ଶାହବାଜ କହିଥିଲେ ଯେ, ସେ ସେନାକୁ ମୁକ୍ତ ଅଧିକାର ଦେଇଛନ୍ତି। ସେ କହିଥିଲେ ଯେ, ସେନାର ପୂର୍ଣ୍ଣ କ୍ଷମତା ରହିଛି।
ଭାରତର ବିମାନ ଆକ୍ରମଣରେ ପାକିସ୍ତାନ ଭୟଭୀତ:
ପାକିସ୍ତାନ ପ୍ରତିଥର ପରି ପୁଣିଥରେ କହିଛି ଯେ ତାଙ୍କ ଅଞ୍ଚଳରେ କୌଣସି ଆତଙ୍କବାଦୀ ଶିବିର ନାହିଁ। ପହଲଗାମ ଆତଙ୍କବାଦୀ ଆକ୍ରମଣ ପରେ ପାକିସ୍ତାନ ତଦନ୍ତ ଦାବି କରିଥିବା କଥା ଦୋହରାଇଛି। ଭାରତର ବିମାନ ଆକ୍ରମଣ ଭୟରେ ପାକିସ୍ତାନ ପୁଣି ଥରେ କହିଛି ଯେ, ସେ ଶାନ୍ତି ଚାହୁଁଛି।
ଭାରତର ସାମରିକ କାର୍ଯ୍ୟାନୁଷ୍ଠାନର କିଛି ଘଣ୍ଟା ପରେ, ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ କହିଛନ୍ତି ଯେ, ଯଦି ଭାରତ ନରମ ମନୋଭାବ ଗ୍ରହଣ କରେ, ତେବେ ପାକିସ୍ତାନ ଦୁଇ ଦେଶ ମଧ୍ୟରେ ଉତ୍ତେଜନା ସମାପ୍ତ କରିବାକୁ ପ୍ରସ୍ତୁତ।