ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ହୋଇଥିବା ଅସ୍ତ୍ରବିରତି ଚୁକ୍ତିନାମାକୁ ନେଇ ରାଜନୈତିକ ବୟାନବାଜି ତୀବ୍ର ହୋଇଛି। କଂଗ୍ରେସ ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କ ୧୯୭୧ ନେତୃତ୍ୱକୁ ଗୁରୁତ୍ୱ ଦେଇ ମୋଦି ସରକାରଙ୍କ ଯୁଦ୍ଧ ନୀତିକୁ ସମାଲୋଚନା କରିଥିବା ବେଳେ, କଂଗ୍ରେସ ସାଂସଦ ଶଶି ଥରୁର ଏକ ସନ୍ତୁଳିତ ମତ ରଖିଛନ୍ତି। ସେ ସ୍ପଷ୍ଟ କରିଛନ୍ତି ଯେ, ୧୯୭୧ ଏବଂ ୨୦୨୫ର ପରିସ୍ଥିତି ସମ୍ପୂର୍ଣ୍ଣ ଭିନ୍ନ ଏବଂ ବର୍ତ୍ତମାନ ଭାରତ ପାଇଁ ଶାନ୍ତି ଏବଂ ସ୍ଥିରତା ପ୍ରାଥମିକ ଲକ୍ଷ୍ୟ ହେବା ଉଚିତ।
ଥରୁର କହିଛନ୍ତି ଯେ, ଏଥର ଭାରତ ଆତଙ୍କବାଦୀଙ୍କୁ ଶିକ୍ଷା ଦେବା ପାଇଁ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା, ଯାହା ଏବେ ସଫଳ ହୋଇଛି। ସେ କୁହନ୍ତି ଯେ, ଏହା ଏପରି ଏକ ଯୁଦ୍ଧ ନଥିଲା ଯାହାକୁ ଆମେ ଜାରି ରଖିବାକୁ ଚାହୁଁଥିଲୁ। ଆମେ ଆତଙ୍କବାଦୀଙ୍କୁ ଜବାବ ଦେଇଛୁ ଏବଂ ଏହା ଏବେ ଶେଷ ହେବା ଉଚିତ। ତାଙ୍କ ମତରେ ଭାରତକୁ ଏହାର ଆର୍ଥିକ ପ୍ରଗତି ଏବଂ ନାଗରିକଙ୍କ ସୁରକ୍ଷା ଉପରେ ଧ୍ୟାନ ଦେବା ଉଚିତ ଏବଂ ଦୀର୍ଘକାଳୀନ ଯୁଦ୍ଧରେ ଫସି ରହିବା ଉଚିତ୍ ନୁହେଁ।
୧୯୭୧ ଯୁଦ୍ଧ ବନାମ ଅପରେସନ ସିନ୍ଦୂର:
ଥରୁର ଏହା ମଧ୍ୟ ରେଖାଙ୍କିତ କରିଛନ୍ତି ଯେ, ୧୯୭୧ ଯୁଦ୍ଧର ଏକ ନୈତିକ ଉଦ୍ଦେଶ୍ୟ ଥିଲା। ସେତେବେଳେ ବାଂଲାଦେଶର ସ୍ୱାଧୀନତା ପାଇଁ ଲଢାଯାଇଥିଲା। ଭାରତ ଲୋକମାନଙ୍କୁ ସ୍ୱାଧୀନତା ଦେବା ପାଇଁ ଏକ ନୈତିକ କାରଣରୁ ଲଢାଯାଇଥିଲା। ଆଜି ପରିସ୍ଥିତି ଭିନ୍ନ। ପାକିସ୍ତାନର ସାମରିକ ସ୍ଥିତି, ପ୍ରଯୁକ୍ତିବିଦ୍ୟା କ୍ଷମତା ଏବଂ ରଣନୈତିକ ଚିନ୍ତାଧାରା ପରିବର୍ତ୍ତନ ହୋଇଛି। ସେ କହିଛନ୍ତି ଯେ, ଆଜିର ଭାରତ କେବଳ ପ୍ରତିଶୋଧ ଚାହୁଁନାହିଁ ବରଂ ସ୍ଥିରତା ଚାହୁଁଛି।
୧୯୭୧ ର ସଫଳତା ବିଷୟରେ କହିଛି କଂଗ୍ରେସ:
ଯୁଦ୍ଧବିରତି ଖବର ଆସିବା ମାତ୍ରେ କଂଗ୍ରେସ ଇନ୍ଦିରା ଗାନ୍ଧୀଙ୍କ ଫଟୋ ସେୟାର କରି ୧୯୭୧ ମସିହାର ସଫଳତାକୁ ମନେ ପକାଇ ଦେଇଥିଲା। ଏହାକୁ ପ୍ରଧାନମନ୍ତ୍ରୀ ମୋଦିଙ୍କ ରଣନୀତି ପ୍ରତି ଏକ ପରିହାସ ଭାବରେ ଦେଖାଯାଇଥିଲା, କିନ୍ତୁ ଥରୁର ଦଳୀୟ ମତ ଠାରୁ ଭିନ୍ନ ମତ ରଖିଥିଲେ ଏବଂ ବର୍ତ୍ତମାନର ପରିସ୍ଥିତିର ଗଭୀର ସମୀକ୍ଷା କରିଥିଲେ।
କଂଗ୍ରେସକୁ ଘେରିଲା ବିଜେପି:
ବିଜେପି ମୁଖପାତ୍ର ଗୌରବ ଭାଟିଆ କଂଗ୍ରେସକୁ ପଚାରିଥିଲେ ଯେ, ୨୬/୧୧ ଆକ୍ରମଣ ପରେ ମନମୋହନ ସିଂହ ସରକାର କ’ଣ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ? ସେ କଂଗ୍ରେସର ଦ୍ୱନ୍ଦ୍ୱ ମାନସିକତା ଉପରେ ପ୍ରଶ୍ନ ଉଠାଇଥିଲେ।