ନୂଆଦିଲ୍ଲୀ: ଭାରତର ତିନି ସେନାର ଅପରେସନ ସିନ୍ଦୂର ଉପରେ ପ୍ରେସ ବ୍ରିଫିଂରେ ୨୨ ଏପ୍ରିଲରେ ପହଲଗାମରେ ଆତଙ୍କବାଦୀ ଆକ୍ରମଣ ପରଠାରୁ ଘଟିଥିବା ଘଟଣାବଳୀ ବିଷୟରେ ସୂଚନା ଦିଆଯାଇଥିଲା। ଏହି ପ୍ରେସ ବ୍ରିଫିଂରେ, ଡିଜିଏମଓ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ କହିଛନ୍ତି ଯେ, ଅପରେସନ ସିନ୍ଦୁରର ଲକ୍ଷ୍ୟ ଆତଙ୍କବାଦୀ ଷଡଯନ୍ତ୍ରକାରୀ ଏବଂ ସେମାନଙ୍କ ଆଡ୍ଡାଗୁଡ଼ିକୁ ଧ୍ୱଂସ କରିବା। ଆମେ ସୀମା ଆରପାରିରେ ଆତଙ୍କୀ ଶିବିର ଏବଂ କୋଠାଗୁଡ଼ିକୁ ଚିହ୍ନଟ କରିଥିଲୁ। ଗୁଇନ୍ଦା ସଂସ୍ଥାଗୁଡ଼ିକଠାରୁ ଏହାର ନିଶ୍ଚିତତା ପରେ ୯ ଟି ଆତଙ୍କବାଦୀ ଆଡ୍ଡା ଧ୍ୱଂସ କରାଯାଇଥିଲା। ଏଥିରେ ୧୦୦ ରୁ ଅଧିକ ଆତଙ୍କବାଦୀ ନିହତ ହୋଇଥିଲେ।
ଭାରତର ଡିଜିଏମଓ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ କହିଛନ୍ତି ଯେ, “ଅପରେସନ୍ ସିନ୍ଦୁର ପରେ କିଛି ଏୟାରଫିଲ୍ଡ ଏବଂ ଡମ୍ପ ଉପରେ ନିରନ୍ତର ବିମାନ ଆକ୍ରମଣ ହୋଇଥିଲା, ଯାହାକୁ ସବୁକୁ ପଣ୍ଡ କରାଯାଇଥିଲା। ପାକିସ୍ତାନୀ ସେନା ରିପୋର୍ଟ କରିଛି ଯେ, ମେ ୭ ରୁ ୧୦ ତାରିଖ ମଧ୍ୟରେ ନିୟନ୍ତ୍ରଣ ରେଖାରେ ତୋପ ଏବଂ ଛୋଟ ଅସ୍ତ୍ର ଗୁଳିଚାଳନା ଯୋଗୁଁ ଏହାର ପ୍ରାୟ ୩୫ ରୁ ୪୦ ସୈନିକଙ୍କ ମୃତ୍ୟୁ ହୋଇଛି।”
ଏୟାର ମାର୍ଶାଲ ଏ.କେ. ଭାରତୀ କହିଛନ୍ତି ଯେ, “୮ ଏବଂ ୯ ତାରିଖ ରାତିରେ, ରାତି ୧୦:୩୦ ରୁ ଶ୍ରୀନଗରରୁ ନଲିଆ ପର୍ଯ୍ୟନ୍ତ ଆମ ସହରଗୁଡ଼ିକ ଉପରେ ଡ୍ରୋନ୍, ମାନବହୀନ ବାୟୁଯାନ ଦ୍ୱାରା ଏକ ବଡ଼ ଆକ୍ରମଣ କରାଯାଇଥିଲା। ଆମେ ପ୍ରସ୍ତୁତ ଥିଲୁ ଏବଂ ଆମର ବାୟୁ ପ୍ରତିରକ୍ଷା ପ୍ରସ୍ତୁତି ନିଶ୍ଚିତ କରିଥିଲା ଯେ, ଶତ୍ରୁ ଦ୍ୱାରା ଭୂମିରେ କୌଣସି ଉଦ୍ଦେଶ୍ୟମୂଳକ ଲକ୍ଷ୍ୟସ୍ଥଳକୁ କ୍ଷତି ପହଞ୍ଚାଯାଇ ପାରିନାହିଁ।”
ସେ ଆହୁରି କହିଛନ୍ତି ଯେ, ପାକିସ୍ତାନର ଏହି ଆକ୍ରମଣର ଜବାବରେ ଆମେ ପୁଣି ଥରେ ଗୁଜରାନୱାଲାରେ ସାମରିକ ପ୍ରତିଷ୍ଠାନ ଏବଂ ନିରୀକ୍ଷଣ ରାଡାର ସ୍ଥଳଗୁଡ଼ିକୁ ଟାର୍ଗେଟ କରିଥିଲୁ। ସକାଳ ପର୍ଯ୍ୟନ୍ତ ଡ୍ରୋନ୍ ଆକ୍ରମଣ ଜାରି ରହିଥିଲା, ଯାହାକୁ ଆମେ ପ୍ରତିହତ କରିଥିଲୁ। ଯେତେବେଳେ ଲାହୋର ନିକଟବର୍ତ୍ତୀ କୌଣସି ସ୍ଥାନରୁ ଡ୍ରୋନ ଆକ୍ରମଣ କରାଯାଉଥିଲା, ଶତ୍ରୁପକ୍ଷ କେବଳ ସେମାନଙ୍କର ନିଜସ୍ୱ ବିମାନ ନୁହେଁ ବରଂ ଆନ୍ତର୍ଜାତୀୟ ଯାତ୍ରୀବାହୀ ବିମାନକୁ ମଧ୍ୟ ଲାହୋର ଉପରେ ଉଡ଼ାଣ କରିବାକୁ ଦେଇଥିଲା, ଯାହା ବହୁତ ସମ୍ବେଦନଶୀଳ ଥିଲା ଏବଂ ଆମକୁ ଅତ୍ୟନ୍ତ ସତର୍କତା ଅବଲମ୍ବନ କରିବାକୁ ପଡିଥିଲା।”
ଡିଜିଏମଓ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ ଆହୁରି ମଧ୍ୟ କହିଛନ୍ତି ଯେ, “୮-୯ ମଇ ରାତିରେ ପାକିସ୍ତାନ ସୀମା ପାର କରି ଆମର ବାୟୁକ୍ଷେତ୍ରରେ ଡ୍ରୋନ୍ ଏବଂ ବିମାନ ଉଡ଼ାଇଥିଲା ଏବଂ ବହୁ ସାମରିକ ଭିତ୍ତିଭୂମିକୁ ଟାର୍ଗେଟ କରିବାକୁ ପ୍ରାୟତଃ ବିଫଳ ପ୍ରୟାସ କରିଥିଲା। ପାକିସ୍ତାନ ଦ୍ୱାରା ନିୟନ୍ତ୍ରଣ ରେଖାରେ ଉଲ୍ଲଂଘନ ପୁଣି ଥରେ ଆରମ୍ଭ ହୋଇଥିଲା ଏବଂ ପ୍ରବଳ ଗୁଳିବର୍ଷା ହୋଇଥିଲା।”
୧୦୦ ରୁ ଅଧିକ ଆତଙ୍କବାଦୀ ନିହତ: ଡିଜିଏମଓ
ପ୍ରେସ ବ୍ରିଫିଂ ଆରମ୍ଭରେ ଡିଜିଏମଓ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ କହିଥିଲେ ଯେ, ୯ ଟି ଆତଙ୍କବାଦୀ ଆଡ୍ଡା ଉପରେ ଆକ୍ରମଣ କରାଯାଇଥିଲା। ଏହି ଆକ୍ରମଣରେ ୧୦୦ ରୁ ଅଧିକ ଆତଙ୍କବାଦୀ ନିହତ ହୋଇଥିଲେ। ଏଥିରେ ୟୁସୁଫ ଆଝାର, ଅବଦୁଲ ମାଲିକ ରୌଫ ଏବଂ ମୁଦାସିର ଅହମ୍ମଦଙ୍କ ଭଳି ଟାର୍ଗେଟ ଅନ୍ତର୍ଭୁକ୍ତ ଥିଲେ, ଯେଉଁମାନେ ଆଇସି୮୧୪ ଅପହରଣ ଏବଂ ପୁଲୱାମା ବିସ୍ଫୋରଣରେ ସାମିଲ ଥିଲେ।