ବାଲୁଗାଁ: ଅପ୍ରେଲ ୨୨ ରେ ଜମ୍ମୁ କାଶ୍ମୀର ପହଲଗାମ ଠାରେ ଆତଙ୍କବାଦୀ ଆକ୍ରମଣରେ ୨୬ ଜଣ ଭାରତୀୟ ପର୍ଯ୍ୟଟକ ପ୍ରାଣ ହରାଇଥିଲେ।ଏହାର ଦୃଢ଼ ଜବାବ ନେଇ ଭାରତ ସରକାରଙ୍କ ପକ୍ଷରୁ କଡା ଆଭିମୁଖ୍ୟ ଗ୍ରହଣ କରାଯାଇ ‘ଅପରେସନ ସିନ୍ଦୁର’ ମାଧ୍ୟମରେ ଆତଙ୍କୀଙ୍କ ଉପରେ ଆକ୍ରମଣ କରାଯାଇଥିଲା।ଯେଉଁଥିରେ ଭାରତୀୟ ଯବାନ ମାନଙ୍କ ଭୂମିକା ବେଶ ଗୁରୁତ୍ୱପୂର୍ଣ୍ଣ ରହିଥିଲା।
ଏହି ପରିପ୍ରେକ୍ଷୀରେ ବୀର ଯବାନଙ୍କ ବୀରତ୍ୱ, ଅଦମ୍ୟ ସାହସ, ଦେଶର ଅଖଣ୍ଡତା ନିମନ୍ତେ ସେମାନଙ୍କୁ ସମ୍ମାନିତ ଓ ମନୋବଳ ବୃଦ୍ଧି ନିମନ୍ତେ ଆଜି ସକାଳେ ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ଓ ବାଲୁଗାଁ ଏନଏସି ପକ୍ଷରୁ ଜିଲ୍ଲା ପ୍ରଶାସନର ସହଯୋଗରେ ଏକ ବିଶାଳ ତ୍ରିରଙ୍ଗା ଯାତ୍ରା ଅନୁଷ୍ଠିତ ହୋଇଯାଇଛି। ବାଲୁଗାଁ ଏନଏସି ପକ୍ଷରୁ ଆୟୋଜିତ ତ୍ରିରଙ୍ଗା ଯାତ୍ରାରେ ଶହ ଶହ ସଂଖ୍ୟାରେ ବାଇକ ବାଲୁଗାଁ ଥାନା ଠାରୁ ସୋମନାଥ ବସଷ୍ଟାଣ୍ଡ ଓ ଗାନ୍ଧୀ ଛକ ଠାରୁ ଚିଲିକା କୂଳ ପର୍ଯ୍ୟନ୍ତ ପରିକ୍ରମା କରିଥିଲା।
ଅନୁରୂପ ଭାବେ ବାଣପୁର ଏନଏସି ପକ୍ଷରୁ ଆୟୋଜିତ ତ୍ରିରଙ୍ଗା ଯାତ୍ରାରେ ଶହ ଶହ ସଂଖ୍ୟାରେ ବାଇକ ବାଣପୁର ବାଇପାସ ରୁ ବାହାରି ସମଗ୍ର ସହର ପରିକ୍ରମା କରି ପଲଟନ ପଡିଆଠାରେ ସମାପ୍ତ ହୋଇଥିଲା l ଉକ୍ତ ଶୋଭାଯାତ୍ରାରେ ବୀର ଯବାନ ମାନଙ୍କୁ ଦେଶର ଅଖଣ୍ଡତା ଓ ବୀରତ୍ୱ ନିମନ୍ତେ ସମର୍ଥନ ଦେବା ନେଇ ସରକାରୀ ଓ ବେସରକାରୀ କର୍ମଚାରୀ, ଜନପ୍ରତିନିଧି, ବୁଦ୍ଧିଜୀବୀ, ସମାଜସେବୀ, ସ୍ବେଚ୍ଛାସେବୀ, ବରିଷ୍ଠ ନାଗରିକ, କଲେଜ ଛାତ୍ର,ଏନସିସି କ୍ୟାଡେଟ, ଗଣମାଧ୍ୟମ ପ୍ରତିନିଧିମାନେ ଯୋଗ ଦେଇଥିଲେ। ଉଭୟ କାର୍ଯ୍ୟକ୍ରମକୁ ଉଭୟ ଏନଏସି କାର୍ଯ୍ୟନିର୍ବାହୀ ଅଧିକାରୀ ପରିଚାଳନା କରିଥିବାବେଳେ , ଉଭୟ ଏନଏସି ଅଧ୍ୟକ୍ଷ,ବିଡିଓ, ତହସିଲଦାର ଓ ଥାନାଧିକାରୀ ମାନେ ସହଯୋଗ କରିଥିଲେl