ବାଣପୁର: ବାଜା ରୋଶଣୀ, ଘଣ୍ଟ। ଘଣ୍ଟ କାହାଳୀର ଶବ୍ଦ ସହିତ ଅଗଣିତ ଶ୍ରଦ୍ଧାଳୁଙ୍କ ହରିବୋଲ ହୁଳହୁଳି ଧ୍ବନୀରେ ଆରମ୍ଭ ହେଲା ଶକ୍ତିପୀଠ ବାଣପୁରର ଆରାଧ୍ୟା ଦେବୀ ମା’ଭଗବତୀଙ୍କ ପ୍ରସିଦ୍ଧ ଭଉଁରୀ ଯାତ୍ରା। ଶ୍ରୀକ୍ଷେତ୍ରର ପ୍ରସିଦ୍ଧ ନରେନ୍ଦ୍ର ପୁଷ୍କରିଣୀରେ ପ୍ରଭୁ ଶ୍ରୀଜଗନ୍ନାଥଙ୍କ ଚଳନ୍ତି ପ୍ରତିମା ଶ୍ରୀମଦନମୋହନ ଦେବା ଦେବୀଙ୍କ ସହିତ ଚ଼ାପକ୍ରୀଡ଼ା ଓ ଭଉଁରୀ ଯାତ୍ରା କଲା ପରି ବାଣପୁରର ବଙ୍କାଡ଼ଗଡ଼ରାଜାଙ୍କ ଦ୍ଵାରା ପ୍ରତିଷ୍ଠିତ ଆଠ ଶାସନରୁ ଗୋପାଳପୁର ଶାସନର ପବିତ୍ର ମାଜଣା ପୁଷ୍କରିଣୀରେ କାହିଁ କେଉଁ କାଳରୁ ମା’ଭଗବତୀ କାଠି ଠାକୁରାଣୀଙ୍କ ଚନ୍ଦନ ଓ ଚାପଯାତ୍ରା ଅନୁଷ୍ଠିତ ହେବାର ପରମ୍ପରା ଚାଲି ଆସିଛି।
ବୈଶାଖ ଶୁକ୍ଳ ତୃତୀୟା ପବିତ୍ର ଅକ୍ଷୟତୃତୀୟା ଭାବରେ ପରିଚିତ ଏହି ଦିନଠାରୁ ପ୍ରଚଣ୍ଡ ରୌଦ୍ର ତାପରୁ ଦେବାଦେବୀଙ୍କୁ ଶୀତଳ ଉପଚ଼ାର ପ୍ରଦାନ କରିବାପାଇଁ ମନ୍ଦିରମାନଙ୍କରେ ବିଭିନ୍ନ ନୀତିକାନ୍ତି ଖଞ୍ଜା ଯାଇଛି। ତନ୍ମଧ୍ୟରୁ ଦେବାଦେବୀ ପ୍ରତିମାଙ୍କ ଶରୀରରେ ଚନ୍ଦନ ଲେପନ, ଚନ୍ଦନ କର୍ପୁର ଅଗୁରୁ ମିଶ୍ରିତ ସୁବାଷିତ ପୁଷ୍ପ ପରିପୂର୍ଣ୍ଣ ଶୀତଳ ଜଳ କୁଣ୍ଡରେ ଅବସ୍ଥାନ ଏବଂ ପୁଷ୍କରିଣୀରେ ନୌବିହାର ଜଳକ୍ରୀଡା ବା ଚାପ କ୍ରୀଡ଼ା ସହିତ ଶୀତଳ ମଣୋହୀ ଯଥା ‘ଖଇ, ମୁଗଧୁଆ, ଆମ୍ବକଦଳୀ, କାକୁଡ଼ି, ସପୁରୀ, ନଡ଼ିଆ, ତାଳ, ତରଭୁଜ ଇତ୍ୟାଦି ସୁମଧୁରଫଳ ସହିତ ଛେନାପଣା ମଣୋହୀ ମାନବୀୟ ଲୀଳାର ଏକ ଏକ ପରିପ୍ରକାଶ।
ଅକ୍ଷୟତୃତୀୟା ଠାରୁ ଆରମ୍ଭ ଏହି ଯାତ୍ରା ଜ୍ୟେଷ୍ଠ କୃଷ୍ଣ ଅଷ୍ଟମୀରେ ଶେଷ ହୁଏ। ଦୀର୍ଘ ଏକୋଇଶି ଦିନ ଧରି ଏହି ଯାତ୍ରା ଉତ୍କଳରେ ଚନ୍ଦନ ଯାତ୍ରା ଭାବରେ ପରିଚିତ। ମା’ ଭଗବତୀଙ୍କ ମନ୍ଦିରରେ ପାଳିତ ଏହି ଯାତ୍ରା ଓଡ଼ିଶାର ଶକ୍ତିପୀଠମାନଙ୍କରେ ପାଳିତ ଯାତ୍ରା ଠାରୁ ସଂପୂର୍ଣ୍ଣ ନିଆରା।
ଗୋପାଳପୁର ଶାସନ ଗ୍ରାମବାସୀଙ୍କ ନିମନ୍ତ୍ରଣ ପତ୍ର ପାଇ ଏହି ପୀଠରେ କେବଳ ମା’ଙ୍କ ଚଳନ୍ତି ପ୍ରତିମା ସ୍ତମ୍ଵେଶ୍ଵରୀ କାଠି ଠାକୁରାଣୀ ଶେଷ ତିନିଦିନ ହେବାକୁଥିବା ଭଉଁରୀ ଯାତ୍ରାକୁ ସାଥିରେ ଶ୍ରୀ ଚନ୍ଦ୍ରଶେଖରଦେବ, ଶ୍ରୀ ଗୋପୀନାଥ ଦେବ, ଶ୍ରୀରଙ୍କନାଥ ଦେବଙ୍କ ସହିତ ଥାଟ ପଟୁଆର ବାଜା ରୋଶଣୀରେ ମାଜଣା ପୁଷ୍କରିଣୀକୁ ବିଜେ କଲା ବେଳେ ସ୍ଥାନାଧିପତି ଗୋପାଳପୁର ଶାସନର ଆରଧ୍ୟଠାକୁର ଶ୍ରୀ ବାଲୁଙ୍କେଶ୍ଵରଦେବ ଶ୍ରୀକପିଳେଶ୍ଵରଦେବ, ତାଙ୍କୁ ପାଛୋଟି ନେଇଥିଲେ।
ପରେ ମାଜଣା ମଣ୍ଡପରେ ମା’ ବିଜେ କଲା ପରେ କୋଟ ବିଦ୍ୟାଧରପୁର ଶାସନର ବିଜେଶ୍ରୀ ନୀଳକଣ୍ଠେଶ୍ଵର ଦେବ, ପାଟପୁର ଶାସନର ବିଜେ ଶ୍ରୀ ଗୋପୀନାଥ ଦେବ ମା’ କନକଦୁର୍ଗା ଏହି ମଣ୍ଡପକୁ ପଦାର୍ପଣ କରିବାପରେ ସମସ୍ତ ଦେବାଦେବୀଙ୍କୁ ଶୋଡ଼ଷ ଉପଚ଼ାରରେ ଶୀତଳ ମଣୋହୀ ଅର୍ପଣ କରାଯାଇଥିଲା। ପରେ ଘଣ୍ଟା ଘଣ୍ଟକାହାଳୀ ହରିବୋଲ ହୁଳହୁଳି ଧ୍ବନୀରେ ଦେବା ଦେବୀଙ୍କୁ ଚାପରେ ବିଜେ କରାଯାଇଥିଲା।
ପୁଷ୍କରିଣୀରେ ସୁସଜ୍ଜିତଚାପ ଦେହରେ ଉପବେଶନ କରି ମା’ ସମସ୍ତ ଦେବାଦେବୀଙ୍କ ସହିତ ସାତଥର ପରିକ୍ରମା କରିବା ପରେ ପୁଣି ମାଜଣା ମଣ୍ଡପକୁ ବିଜେ କରି ଚନ୍ଦନ କୁଣ୍ଡରେ ଅବସ୍ଥାନ କରିଥିଲେ। ସେଠାରେ ପୁଣି ଶୀତଳମଣୋହୀ ସହିତ ଆଳତି ବଢିବିଳମ୍ବିତ ରାତିରେ ପିତ୍ରାଳୟ ଦକ୍ଷେଶ୍ଵର ମନ୍ଦିରକୁ ବାହୁଡ଼ିଥିଲେ। ମନ୍ଦିରରେ ରାତ୍ର ଧୂପ ହୋଇ ପହୁଡ଼ପଡ଼ିଥିଲା।
ପ୍ରଥମ ଦିନର ମାନବୀୟ ଲୀଳାର ଏହି ଦୁର୍ଲଭ ଚାପଯାତ୍ରାରେ ମା’ଙ୍କୁ ଚାପ ଉପରେ ଦର୍ଶନକରି କୃପାଲାଭ କରିବା ପାଇଁ ଅଗଣିତ ଶ୍ରଦ୍ଧାଳୁ ପୁଷ୍କରିଣୀ ଚ଼ତୁଃପାର୍ଶ୍ଵରେ ଜମିଥିଲେ। ଗୋପାଳପୁର ଶାସନ ଗ୍ରାମବାସୀ, ମନ୍ଦିର କାର୍ଯ୍ୟାଳୟର ସମସ୍ତ କର୍ମଚାରୀ, ସ୍ଥାନୀୟ ଆରକ୍ଷୀ ବାହିନୀଙ୍କ ମିଳିତ ସହଯୋଗରେ ପ୍ରଥମ ଦିନର ଏହି ଯାତ୍ରା ଶୃଙ୍ଖଳିତ ଭାବରେ ଶେଷ ହୋଇଥିଲା ବୋଲି କାର୍ଯ୍ୟନିର୍ବାହୀ ଅଧିକାରୀ ବାଳମୁକୁନ୍ଦ ଦାସ ପ୍ରକାଶ କରିଛନ୍ତି।