ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଏକ ଅଭାବନୀୟ ଘଟଣା ଘଟିଯାଇଛି। ବାଣପୁର ଏନଏସି କାର୍ଯ୍ୟାଳୟରେ ସ୍ୱଚ୍ଛସାଥି ଭାବେ କାର୍ଯ୍ୟ କରୁଥିବା ଜଣେ ମହିଳାଙ୍କ ସନ୍ଦେହଜନକ ଭାବେ ମୃତ୍ୟୁ ହୋଇଛି।
ସୂଚନା ମୁତାବକ ବାଣପୁର ଏନଏସି ଅନ୍ତର୍ଗତ କୋଟବିଦ୍ୟାଧରପୁର ଗ୍ରାମର କୋଠଘରେ ମିତା ବାରିକ (୩୧) ନାମକ ମହିଳା ଭଡ଼ାସୂତ୍ରରେ ରହୁଥିଲେ। ସେ ଉକ୍ତ ଗ୍ରାମର ତ୍ରିଲୋଚନ ପରିଡ଼ାଙ୍କୁ ୧୨ ବର୍ଷ ତଳେ ବିବାହ କରିଥିବାବେଳେ ସ୍ୱାମୀ ତ୍ରିଲୋଚନ ବିଦେଶରେ କାମ କରୁଛନ୍ତି। ମିତା ବାଣପୁର ଏନଏସି କାର୍ଯ୍ୟାଳୟରେ ସ୍ୱଚ୍ଛସାଥି ଭାବେ କାର୍ଯ୍ୟରତ ଥିବାବେଳେ ଗତକାଲି ସଂନ୍ଧ୍ୟାରେ ଭଡାରେ ରହୁଥିବା କୋଠଘରେ ନିଜ ଚୁନିରେ ଦଉଡି ଲଗାଇ ଆତ୍ମହତ୍ୟା କରିଥିଲେ।
ତେବେ ଏ ନେଇ ମିତାଙ୍କ ମାତା ଶାନ୍ତିଲତା ବାରିକ ବାଣପୁର ଥାନାରେ ଲିଖିତ ଅଭିଯୋଗ କରିବାପରେ ପୋଲିସ କେସ ନମ୍ବର ୧୧/୨୫ ରେ ଏକ ଅପମୃତ୍ୟୁ ମାମଲା ରୁଜୁ କରିବା ସହ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଇଦେଇଛି। ତେବେ ମୃତ ମିତାଙ୍କ ମାତା ଶାନ୍ତିଲତା ଆର୍ଥିକ ଅନଟନ ଲାଗି ମିତା ଆତ୍ମହତ୍ୟା କରିଥିବା ଏତଲାରେ ଲେଖିଥିବା ବେଳେ ତାଙ୍କର ମୃତ୍ୟୁ ସନ୍ଦେହଘେରରେ ଅଛି। ଶବ ବ୍ୟବଚ୍ଛେଦ ରିପୋର୍ଟ ଆସିବାପରେ ମୃତ୍ୟୁର ପ୍ରକୃତ କାରଣ ଜଣାପଡିବ। ସୂଚନା ଥାଉକି ମୃତ ମିତାଙ୍କ ଦୁଇ ଗୋଟି ସନ୍ତାନ ଅଛନ୍ତି।
