ନୂଆଦିଲ୍ଲୀ: ICC ସଦ୍ୟତମ ଟେଷ୍ଟ ବୋଲର ରାଙ୍କିଂ ପ୍ରକାଶ କରିଛି। ଭାରତୀୟ ଦ୍ରୁତ ବୋଲର ଜସପ୍ରିତ ବୁମରାହ ଏହି ତାଲିକାରେ ପ୍ରଥମ ସ୍ଥାନରେ ରହିଛନ୍ତି। ଟେଷ୍ଟରେ ଶ୍ରେଷ୍ଠ ୫ ବୋଲର ରାଙ୍କିଂରେ ବୁମରାହ ଏକମାତ୍ର ଭାରତୀୟ ବୋଲର। ଶ୍ରେଷ୍ଠ ୫ ତାଲିକାରେ ଅଷ୍ଟ୍ରେଲିଆର ଦୁଇ ଜଣ ବୋଲର ଅଛନ୍ତି। ସେହିଭଳି ଦକ୍ଷିଣ ଆଫ୍ରିକା ଏବଂ ପାକିସ୍ତାନ ଦଳର ଜଣେ ଲେଖାଏଁ ବୋଲର ଏହି ତାଲିକାରେ ଅଛନ୍ତି। ଏଥର ରାଙ୍କିଂରେ କେବଳ ଗୋଟିଏ ପରିବର୍ତ୍ତନ ଦେଖିବାକୁ ମିଳିଛି।
ICC ଟେଷ୍ଟ ରାଙ୍କିଂ ଶୀର୍ଷ ୫ ବୋଲର:
ଜସପ୍ରିତ ବୁମରାହ: ଭାରତୀୟ ବୋଲର ବୁମରାହ ବିଶ୍ୱର ଶ୍ରେଷ୍ଠ ବୋଲରମାନଙ୍କ ମଧ୍ୟରୁ ଜଣେ। ବୁମରାହ ବର୍ତ୍ତମାନ ୯୦୭ ରେଟିଂ ସହିତ ନମ୍ବର ୱାନ ସ୍ଥାନରେ ଅଛନ୍ତି। ବୁମରାହ ସମ୍ପ୍ରତି ୨୦୨୪-୨୫ ବର୍ଡର-ଗାଭାସ୍କର ଟ୍ରଫିରେ ଅଷ୍ଟ୍ରେଲିଆ ବିପକ୍ଷରେ ୫ ଟି ମ୍ୟାଚ୍ ରେ ୩୨ ଟି ୱିକେଟ ନେଇଥିଲେ। ଏହା ପରେ ଇଂଲଣ୍ଡ ବିପକ୍ଷ ସିରିଜରେ ମଧ୍ୟ ସେ ପ୍ରଥମ ମ୍ୟାଚ୍ ରେ ପାଞ୍ଚଟି ୱିକେଟ ନେଇଥିଲେ।
କାଗିସୋ ରାବାଡା: ଦକ୍ଷିଣ ଆଫ୍ରିକାର ଦ୍ରୁତ ବୋଲର ରାବାଡା ୮୫୯ ରେଟିଂ ପଏଣ୍ଟ ସହିତ ଏହି ତାଲିକାରେ ଦ୍ୱିତୀୟ ସ୍ଥାନରେ ଅଛନ୍ତି। ରାବାଡା ସମ୍ପ୍ରତି ଅଷ୍ଟ୍ରେଲିଆ ବିପକ୍ଷରେ ୨୦୨୫ ବିଶ୍ୱ ଟେଷ୍ଟ ଚାମ୍ପିଅନସିପର ଫାଇନାଲରେ ଚମତ୍କାର ବୋଲିଂ କରିଥିଲେ। ଯାହା ଯୋଗୁଁ ଦକ୍ଷିଣ ଆଫ୍ରିକା ଟାଇଟଲ ଜିତିଥିଲା। ରାବାଡା ଫାଇନାଲରେ ୯ ୱିକେଟ୍ ନେଇଥିଲେ।
ପ୍ୟାଟ୍ କମିନ୍ସ: ଅଷ୍ଟ୍ରେଲିଆର ଅଧିନାୟକ ପ୍ୟାଟ୍ କମିନ୍ସ ୮୪୬ ରେଟିଂ ପଏଣ୍ଟ ସହିତ ରାଙ୍କିଙ୍ଗରେ ତୃତୀୟ ସ୍ଥାନରେ ଅଛନ୍ତି। ଭାରତ ବିପକ୍ଷରେ ବର୍ଡର ଗାଭାସ୍କର ଟ୍ରଫିରେ କମିନ୍ସ ୨୫ ୱିକେଟ୍ ନେଇଥିଲେ। ସେହିଭଳି ସେ ବିଶ୍ୱ ଟେଷ୍ଟ ଚାମ୍ପିଅନସିପର ଫାଇନାଲରେ ମଧ୍ୟ ଭଲ ବୋଲିଂ କରିଥିଲେ। ଫାଇନାଲରେ ସେ ସାତ ୱିକେଟ୍ ନେଇଥିଲେ।
ଜୋଶ୍ ହେଜଲଉଡ୍: ଅଷ୍ଟ୍ରେଲିଆର ଦ୍ରୁତ ବୋଲର ହେଜଲଉଡ୍ ୱେଷ୍ଟଇଣ୍ଡିଜ୍ ବିପକ୍ଷରେ ଚଳିତ ଟେଷ୍ଟ ସିରିଜରେ ଭଲ ବୋଲିଂ କରିଛନ୍ତି। ସେ ପ୍ରଥମ ମ୍ୟାଚ୍ରେ ୫ ୱିକେଟ୍ ନେଇଥିଲେ। ପ୍ରଥମ ମ୍ୟାଚ୍ରେ ସେ ମୋଟ ସାତ ୱିକେଟ୍ ନେଇଥିଲେ, ଯାହା ଫଳରେ ସେ ଗୋଟିଏ ସ୍ଥାନ ହାସଲ କରିଛନ୍ତି। ସେ ଏବେ ୮୧୭ ରେଟିଂ ପଏଣ୍ଟ ସହିତ ଚତୁର୍ଥ ସ୍ଥାନରେ ଆସିଛନ୍ତି।
ନୋମାନ ଅଲି: ପାକିସ୍ତାନୀ ବୋଲର ନୋମାନ ଅଲି ଟପ୍-୫ ତାଲିକାରେ ଏକମାତ୍ର ସ୍ପିନ୍ ବୋଲର। ନୋମାନ ୮୦୬ ରେଟିଂ ପଏଣ୍ଟ ସହିତ ପଞ୍ଚମ ସ୍ଥାନରେ ଅଛନ୍ତି। ସେ ଗୋଟିଏ ସ୍ଥାନ ହରାଇଛନ୍ତି।