ନୂଆଦିଲ୍ଲୀ: ବିହାରରେ ନିର୍ବାଚନ ପୂର୍ବରୁ ଭୋଟର ତାଲିକାର ‘ସ୍ପେଶାଲ୍ ଇଣ୍ଟେସିଭ ରିଭିଜନ’ (SIR) ମାମଲାରେ ସୁପ୍ରିମକୋର୍ଟରୁ ନିର୍ବାଚନ କମିଶନଙ୍କୁ ବଡ଼ ଆଶ୍ୱସ୍ତି ମିଳିଛି। କୋର୍ଟ SIR ଉପରେ ସ୍ଥଗିତାଦେଶ ଦେବାକୁ ମନା କରିଛନ୍ତି ଏବଂ ନିର୍ବାଚନ କମିଶନଙ୍କୁ ତିନୋଟି ଦସ୍ତାବିଜ ଆଧାର କାର୍ଡ, ଭୋଟର ପରିଚୟପତ୍ର ଏବଂ ରାସନ କାର୍ଡ ଗ୍ରହଣ କରିବାକୁ ପରାମର୍ଶ ଦେଇଛନ୍ତି। କୋର୍ଟ କହିଛନ୍ତି ଯେ, ଆବେଦନଗୁଡ଼ିକରେ ଗଣତନ୍ତ୍ର ସହିତ ଜଡିତ ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନ ଉଠାଯାଇଛି, ଯାହା ଭୋଟ ଦେବାର ଅଧିକାର ସହିତ ଜଡିତ। କୋର୍ଟ କହିଛନ୍ତି ଯେ, “ଆବେଦନକାରୀମାନେ ଜୁନ୍ ୨୪ ତାରିଖର ନିର୍ବାଚନ କମିଶନଙ୍କ ଆଦେଶକୁ ଚ୍ୟାଲେଞ୍ଜ କରୁଛନ୍ତି। ସେମାନେ ଏହାକୁ ସମ୍ବିଧାନ ଏବଂ ଆଇନର ବ୍ୟବସ୍ଥା ବିରୁଦ୍ଧରେ କହୁଛନ୍ତି।”
ସୁପ୍ରିମକୋର୍ଟ କହିଛନ୍ତି ଯେ, “ନିର୍ବାଚନ ପଞ୍ଜୀକରଣ ନିୟମ, ୧୯୬୦ ବିଷୟରେ ମଧ୍ୟ ଆବେଦନକାରୀ ଉଲ୍ଲେଖ କରିଛନ୍ତି। ନିର୍ବାଚନ କମିଶନଙ୍କ ଓକିଲ କହିଛନ୍ତି ଯେ, ୨୦୦୩ ରେ ମଧ୍ୟ ଇଣ୍ଟେସିଭ ରିଭିଜନ କରାଯାଇଥିଲା। ଏହା ଏବେ ବି ସଠିକ୍ ଭାବରେ ଚାଲିଛି। ଆବେଦନକାରୀ କହିଛନ୍ତି ଯେ, ବିଧାନସଭା ନିର୍ବାଚନ ନଭେମ୍ବରରେ ହେଉଛି। ଏହା ପୂର୍ବରୁ ବିଜ୍ଞପ୍ତି ଜାରି କରାଯିବ। ଆମେ ବିଶ୍ୱାସ କରୁଛୁ ଯେ, ଏହା ଉପରେ ଏକ ବିସ୍ତୃତ ଶୁଣାଣି ଆବଶ୍ୟକ।”
ବିଚାରପତି କହିଛନ୍ତି ଯେ, ଏହି ମାମଲାର ପରବର୍ତ୍ତୀ ଶୁଣାଣି ୨୮ ଜୁଲାଇରେ ହେବ ଏବଂ ଏହା ପୂର୍ବରୁ ସମସ୍ତ ପକ୍ଷ ସେମାନଙ୍କର ଉତ୍ତର ଦାଖଲ କରିବା ଉଚିତ। ଶୁଣାଣି ସମୟରେ ବିଚାରପତି କହିଛନ୍ତି ଯେ, “କମିଶନଙ୍କ ଓକିଲ କହିଛନ୍ତି ଯେ ସେ କେବଳ ୧୧ ଟି ଦଲିଲରେ ସୀମିତ ନୁହଁନ୍ତି। ଆମେ ପରାମର୍ଶ ଦେଉଛୁ ଯେ, ନିର୍ବାଚନ କମିଶନ ମଧ୍ୟ ୩ଟି ଦଲିଲ – ଆଧାର କାର୍ଡ, ଭୋଟର ପରିଚୟ ପତ୍ର ଏବଂ ରାସନ କାର୍ଡ ଗ୍ରହଣ କରିବା ବିଷୟରେ ବିଚାର କରିବା ଉଚିତ।”