ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର ଜିଲ୍ଲା ଶିକ୍ଷା ବିଭାଗ ଅଧିନସ୍ଥ ନାକଟିଦେଉଳ ବ୍ଲକ ଶିକ୍ଷା ବିଭାଗ ଛାତ୍ରଛାତ୍ରୀଙ୍କ ପାଇଁ ଆସିଥିବା ପରିଭ୍ରମଣ ଟଙ୍କା ହଡପ ହେବା ସମ୍ପର୍କରେ ବ୍ଲକ ଶିକ୍ଷା ଅଧିକାରୀଙ୍କ ବିରୋଧରେ ସମ୍ବଲପୁର ଜିଲ୍ଲାପାଳଙ୍କ ଠାରେ ଅଭିଯୋଗ ହୋଇଛି।
ସରକାର ଶିକ୍ଷା ବିଭାଗ ତରଫରୁ ଛାତ୍ରଛାତ୍ରୀ ମାନଙ୍କୁ ବିଭିନ୍ନ ଶିକ୍ଷଣୀୟ ସ୍ଥାନକୁ ପରିଭ୍ରମଣ (ଏକ୍ସପୋଜର ଭିଜିଟ) କରାଇବା ପାଇଁ ଲକ୍ଷାଧିକ ଟଙ୍କା ଅନୁଦାନ ଦେଇଥାନ୍ତି।
ସୂଚନା ଅଧିକାର ଆଇନ ବଳରେ ମଗାଯାଇଥିବା ତଥ୍ୟ ଅନୁସାରେ ଏକ୍ସପୋଜର ଭିଜିଟ ପାଇଁ ନାକଟିଦେଉଳ ବ୍ଲକ ଗୋଷ୍ଠି ଶିକ୍ଷା ଅଧିକାରୀଙ୍କ ନିକଟକୁ ୨ ଲକ୍ଷ ୨୨ ହଜାର ଟଙ୍କା ମଞ୍ଜୁର ହୋଇଥିଲା। କିନ୍ତୁ ଉକ୍ତ ଟଙ୍କା କାର୍ଯ୍ୟର ବିଲ୍ ଭାଉଚର୍ ରେ ଅନେକ ଅନିୟମିତତା ହୋଇଥିବା ଜଣା ପଡିଥିଲା। ଅନିୟମିତତା ଗୁଡ଼ିକ ହେଲା ନାକଟିଦେଉଳ ବ୍ଲକ ଗୋଷ୍ଠୀ ଶିକ୍ଷା ଅଧିକାରୀ (ଏକ୍ସପୋଜର) ଭିଜିଟ କାର୍ଯ୍ୟରେ ୩୩୪ ଜଣ ଛାତ୍ରଛାତ୍ରୀଙ୍କୁ ୮ ଗୋଟି ବସରେ ନେବା ଆଣିବା କରିଛନ୍ତି। ଦର୍ଶାଯାଇଥିବା ବସ୍ ମଧ୍ୟରୁ ତିନି ଗୋଟି ବସ୍ ଜାଲିଆତି ଅଟେ।
ଓଡି ୧୫ ସି ୨୧୦୫ ବସ୍ ନୁହେଁ ଏଚଏଫ ଡିଲକ୍ସ ବାଇକ୍ ଯାହା ନାଁ ସନ୍ତୋଷ ସିଂ ନାମରେ ଅଛି, ଦିତ୍ୱୀୟରେ ଓଡି ୧୫- ୯୩୦୪ ବସ୍ ନୁହେଁ ହିରୋ ହୁଣ୍ଡା ପାସନ ଏକ୍ସପ୍ରୋ ଯାହା ସୋମବାବୁ ସାହୁ ନାମରେ ଏବଂ ତୃତୀୟରେ ଓଡି ୨୧ବି ୫୩୫୮ ବସ୍ ନୁହେଁ ସ୍ପ୍ଲେଣ୍ଡର ପ୍ଲସ ଯାହା ବିକ୍ରମ ପ୍ରକାଶ ସାଇଙ୍କ ନାମରେ ଅଛି। ଗୋଟିଏ ବସରେ ୪୧ ଜଣ ଛାତ୍ରଛାତ୍ରୀ ହିସାବରେ ୩ ଟି ବସକୁ ମୋଟ ୧୨୩ ଜଣ ଛାତ୍ର (ଏକ୍ସପୋଜର ଭିଜିଟ) ରେ ସାମିଲ ହୋଇନାହାନ୍ତି। ଜଣ ଛାତ୍ରଛାତ୍ରୀ ପିଛା ୬୬୬ ଟଙ୍କା ହିସାବରେ ୮୧ ହଜାର ୯୧୮ ଟଙ୍କା ସୃଷ୍ଟ ଆତ୍ମସାତ କରାଯାଇଛି।
ଗାଡି ଭଡା ବାବଦକୁ ଓଡି ୧୫ ସି ୨୧୦୫ ରେ ୧୧,୬୯୦ ଟଙ୍କା ଦ୍ଵିତୀୟ ଗାଡି ଓଡି ୧୫- ୯୩୦୪ ରେ ୨୩, ୩୮୦ ଟଙ୍କା ଏବଂ ତୃତୀୟ ଗାଡି ଓଡି ୨୧ବି ୫୩୫୮ ରେ ୧୭,୧୫୦ ଟଙ୍କା ହିସାବରେ ମୋଟ ୫୨,୨୨୦ ଟଙ୍କା ଗାଡ଼ି ଭଡା ନାଁରେ ଆତ୍ମସାତ କରାଯାଇଛି। ୧୨୩ ଛାତ୍ରଛାତ୍ରୀଙ୍କ ସମସ୍ତ ଖର୍ଚ୍ଚ, ୩ ଗୋଟି ଗାଡ଼ିର ଆନୁମାନିକ ଖର୍ଚ୍ଚ ହାରାହାରି ୧ ଲକ୍ଷ ୩୪ ହଜାର ୧୩୮ ଟଙ୍କାରୁ ତଦନ୍ତ କରାଗଲେ ଅଧିକ ହୋଇପାରେ।
ଏଣୁ ନାକଟିଦେଉଳ ବ୍ଲକ ଶିକ୍ଷା ଅଧିକାରୀଙ୍କ (ଏକ୍ସପ୍ଲୋଜର ଭିଜିଟ) ଖର୍ଚ୍ଚର ପୁଙ୍ଖାନୁପୁଙ୍ଖ ତଦନ୍ତ କରିବା ସହ ଏଥିରେ ସମ୍ପୃକ୍ତି ଥିବା ବ୍ୟକ୍ତି ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସୂଚନା ଅଧିକାର କର୍ମୀ ସଞ୍ଜୟ କୁମାର ଛୁରିଆ ସମ୍ବଲପୁର ଜିଲ୍ଲାପାଳଙ୍କଠାରେ ଅଭିଯୋଗ କରିଛନ୍ତି।