ଖେଳାଳୀମାନଙ୍କ ଜୀବନୀକୁ ନେଇ ଅନେକଗୁଡ଼ିଏ ଭାରତୀୟ ସିନେମା ତିଆରି ହୋଇଛି । କ୍ରିକେଟର୍ ସଚିନ୍ ତେନ୍ଦୁଲ୍କର, ମେରିକମ୍, ଏମ୍ଏସ୍,ଧୋନୀଙ୍କୁ ନେଇ ଫିଲ୍ମ ରିଲିଜ୍ ହୋଇସାରିଥିବାବେଳେ ଭାରତର ପ୍ରଥମ ଓ୍ବାର୍ଲ୍ଡକପ୍ ବିଜୟକୁ ନେଇ ‘୮୩’ ନିର୍ମାଣ ଚାଲିଛି । ଏବେ ମିଳିଥିବା ସୂଚନା ଅନୁସାରେ ଶ୍ରୀଲଙ୍କାର ବରିଷ୍ଠ ସ୍ପିନ୍ ବୋଲର ମୁଥେୟା ମୁରଲିଧରନଙ୍କ ଉପରେ ତାମିଲରେ ଏକ ଫିଲ୍ମ କରାଯାଉଥିବା ଶୁଣିବାକୁ ମିଳିଛି। ତାଙ୍କ ଜୀବନୀ ଉପରେ ଆଧାରିତ ହୋଇଥିବା ଏହି ଫିଲ୍ମର ନାଁ ହେଉଛି ‘୮୦୦’। ଏହି ଲୋକପ୍ରିୟ ଖେଳାଳି ଜଣକ ତାଙ୍କ କ୍ରିକେଟ୍ କ୍ୟାରିଅର୍ରେ ୮୦୦ଟି ଓ୍ବିକେଟ୍ ନେଇଥିଲେ । ଏମ୍.ଏସ୍. ଶ୍ରୀପତିଙ୍କ ନିର୍ଦ୍ଦେଶିତ ଏହି ଫିଲ୍ମରେ ସାଉଥ୍ର ସୁପରଷ୍ଟାର ବିଜୟ ସେଥୁପତି ମୁରଲୀଧରନଙ୍କ ଚରିତ୍ରରେ ନଜର ଆସିବେ। ଫିଲ୍ମଟି ଭାରତ, ଶ୍ରୀଲଙ୍କା, ଇଂଲଣ୍ଡ ଭଳି ସ୍ଥାନଗୁଡ଼ିକରେ ଶୁଟିଂ କରାଯିବ ବୋଲି ସୂଚନା ରହିଛି । ଫିଲ୍ମଟି ତାମିଲ୍ ବ୍ୟତୀତ ଅନ୍ୟାନ୍ୟ ଭାଷାରେ ମଧ୍ୟ ରିଲିଜ୍ କରାଯିବ । ବିଗ୍ବଜେଟ୍ରେ ପ୍ରସ୍ତୁତ କରାଯାଉଥିବା ଫିଲ୍ମଟିର ଶୁଟିଂ ଚଳିତ ବର୍ଷ ଡିସେମ୍ବରରୁ ଆରମ୍ଭ ହେବ ।
