ନୂଆଦିଲ୍ଲୀ: ଆମ ଆଦମୀ ପାର୍ଟି (AAP) ନେତାଙ୍କ ସମସ୍ୟା ବଢ଼ିବା ପରି ମନେ ହେଉଛି। AAP ସରକାର ସମୟରେ ଘଟିଥିବା ତିନୋଟି ଭିନ୍ନ ଦୁର୍ନୀତିରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ମନି ଲଣ୍ଡରିଂ ଅଧୀନରେ ମାମଲା ରୁଜୁ କରିଛି। ହସ୍ପିଟାଲ ନିର୍ମାଣ, CCTV ଏବଂ ସେଲଟର ହୋମ ଦୁର୍ନୀତିରେ ECIR ଦାୟର କରାଯାଇଛି। ଶୀଘ୍ର AAP ର ଶୀର୍ଷ ନେତାମାନଙ୍କୁ ଜେରା ପାଇଁ ସମନ ପଠାଯାଇପାରେ।
ହସ୍ପିଟାଲ ନିର୍ମାଣ ଦୁର୍ନୀତି (5,590 କୋଟି ଟଙ୍କା):
2018-19 ରେ ଦିଲ୍ଲୀ ସରକାର 24 ଟି ହସ୍ପିଟାଲ ନିର୍ମାଣ କରିବାକୁ ନିଷ୍ପତ୍ତି ନେଇଥିଲେ। ଯୋଜନା ଅନୁଯାୟୀ, ICU ସହିତ ସଜ୍ଜିତ ହସ୍ପିଟାଲ 6 ମାସ ମଧ୍ୟରେ ପ୍ରସ୍ତୁତ ହେବାର ଥିଲା, କିନ୍ତୁ 3 ବର୍ଷ ପରେ ମଧ୍ୟ କାମ ଅସମ୍ପୂର୍ଣ୍ଣ ରହିଛି। ଏପର୍ଯ୍ୟନ୍ତ ପ୍ରାୟ 800 କୋଟି ଟଙ୍କା ଖର୍ଚ୍ଚ ହୋଇଛି। LNJP ହସ୍ପିଟାଲର ମୂଲ୍ୟ 488 କୋଟି ଟଙ୍କାରୁ ବୃଦ୍ଧି ପାଇ 1135 କୋଟି ଟଙ୍କା ହୋଇଛି। ଅନେକ ସ୍ଥାନରେ ଆବଶ୍ୟକୀୟ ଅନୁମୋଦନ ବିନା ନିର୍ମାଣ କାର୍ଯ୍ୟ ହୋଇଥିଲା ଏବଂ ଠିକାଦାରଙ୍କ ଭୂମିକା ଉପରେ ମଧ୍ୟ ପ୍ରଶ୍ନ ଉଠାଯାଉଛି। HIMS ନାମକ ଡିଜିଟାଲ୍ ସ୍ୱାସ୍ଥ୍ୟ ବ୍ୟବସ୍ଥା ଯୋଜନା 2016 ରୁ ଅଟକି ରହିଛି, ଯାହାକୁ ଜାଣିଶୁଣି ବିଳମ୍ବ କରାଯାଇଥିଲା।
CCTV ଦୁର୍ନୀତି (571 କୋଟି ଟଙ୍କା):
2019 ରେ ଦିଲ୍ଲୀର 70 ବିଧାନସଭା ଆସନରେ 1.4 ଲକ୍ଷ CCTV କ୍ୟାମେରା ସ୍ଥାପନ ପାଇଁ ଏକ ପ୍ରକଳ୍ପ ଆରମ୍ଭ ହୋଇଥିଲା। ଏହାର ଚୁକ୍ତିନାମା ସରକାରୀ କମ୍ପାନୀ BEL କୁ ଦିଆଯାଇଥିଲା। କାର୍ଯ୍ୟ ସମୟ ମଧ୍ୟରେ ସମାପ୍ତ ହୋଇନଥିଲା, ଯାହା ପାଇଁ BEL କୁ 17 କୋଟି ଟଙ୍କା ଜରିମାନା କରାଯାଇଥିଲା, କିନ୍ତୁ ପରେ କୌଣସି ଠୋସ୍ କାରଣ ନ ଦେଇ ଜରିମାନା ଛାଡ କରାଯାଇଥିଲା। ଅଭିଯୋଗ ହୋଇଛି ଯେ, ସତ୍ୟେନ୍ଦ୍ର ଜୈନଙ୍କୁ ଠିକାଦାରଙ୍କ ମାଧ୍ୟମରେ 7 କୋଟି ଟଙ୍କା ଲାଞ୍ଚ ଦିଆଯାଇଥିଲା।
ଆଶ୍ରୟସ୍ଥଳ ଦୁର୍ନୀତି (207 କୋଟି ଟଙ୍କା):
ଦିଲ୍ଲୀ ଅର୍ବାନ ସେଲଟର ଇମ୍ପ୍ରୁଭମେଣ୍ଟ ବୋର୍ଡ (DUSIB) ସହ ଜଡିତ ଅନେକ ଅନିୟମିତତା ମାମଲା ସାମ୍ନାକୁ ଆସିଛି। ନକଲି FDR ମାଧ୍ୟମରେ 207 କୋଟି ଟଙ୍କା ଆତ୍ମସାତ କରାଯାଇଥିଲା। ପଟେଲ ନଗରରେ 15 ଲକ୍ଷ ଟଙ୍କାର ରାସ୍ତା ମରାମତି ଦେଖାଇ ଠକେଇ କରାଯାଇଥିଲା। ଲକଡାଉନ୍ ସମୟରେ ହୋଇଥିବା କାମ ସମ୍ପର୍କରେ ମଧ୍ୟ ମିଥ୍ୟା କାଗଜପତ୍ର ପ୍ରସ୍ତୁତ କରାଯାଇଥିଲା। 250 କୋଟି ଟଙ୍କାର ସେଲଟର ହୋମ ଦୁର୍ନୀତିରେ ନକଲି କର୍ମଚାରୀଙ୍କ ନାମରେ ଦରମା ଦର୍ଶାଯାଇଥିଲା ଏବଂ ରାଜନେତାମାନଙ୍କୁ କମିଶନ ଭାବରେ ଟଙ୍କା ଦିଆଯାଇଥିଲା।
ସିବିଆଇ ଏବଂ ଏସିବି ପୂର୍ବରୁ ଏହି ମାମଲାଗୁଡ଼ିକର ତଦନ୍ତ କରୁଛନ୍ତି। ଏବେ ସମାନ ଏଫଆଇଆର ଆଧାରରେ ଇଡି ମଧ୍ୟ ମନି ଲଣ୍ଡରିଂର ତଦନ୍ତ ଆରମ୍ଭ କରିଛି। ସୂତ୍ର ଅନୁସାରେ ଆମ ଆଦମୀ ପାର୍ଟିର ଅନେକ ବଡ଼ ନେତାଙ୍କୁ ଖୁବ୍ ଶୀଘ୍ର ଜେରା ପାଇଁ ଡକାଯାଇପାରେ।