ଚିଲିକା: ଦିନକୁ ଦିନ ଖୋର୍ଦ୍ଧା ଜିଲ୍ଲା ବାଣପୁର-ବାଲୁଗାଁ ଅଞ୍ଚଳରେ ବିଦ୍ୟୁତ ବିଭାଗର ଦୌରାତ୍ମ୍ୟ ବୃଦ୍ଧି ପାଇବାରେ ଲାଗିଛି। ମାନବିକତା ହରାଇ ବସିଲାଣି ବିଦ୍ୟୁତ ବିଭାଗ। କିଛିଦିନ ହେବ ବାଣପୁର-ବାଲୁଗାଁ ଅଞ୍ଚଳରେ ଘନ ଘନ ଅଘୋଷିତ ବିଦ୍ୟୁତ କାଟ ହେଉଛି। ବିଦ୍ୟୁତ କାଟ ନ କରିବାପାଇଁ ସରକାରଙ୍କ କଡ଼ା ନିର୍ଦ୍ଦେଶ ଥିଲାବେଳେ ବାଣପୁର ବାଲୁଗାଁରେ ଏହାର ବ୍ୟତିକ୍ରମ ଘଟୁଛି।
ଛାତ୍ର ଛାତ୍ରୀଙ୍କ ପାଇଁ ଅନଲାଇନ କ୍ଲାସ ହେଉ କିମ୍ବା ଘରୋଇ କର୍ମଚାରୀଙ୍କ ଅନଲାଇନ କାମ ସବୁଠି ବିଦ୍ୟୁତ ଅପରିହାର୍ଯ୍ୟ ହୋଇପଡିଛି। ବର୍ଷାଦିନ ଅଦ୍ୟାବଧି ସଂପୂର୍ଣ୍ଣ ଭାବେ ଆସିନଥିବା ବେଳେ ପ୍ରବଳ ଗୁଳୁଗୁଳି ଦିନଯାକ ରହୁଛି। ଏ ସବୁକୁ ଖାତିର ନକରି ବିଦ୍ୟୁତ ବିଭାଗ ମନଇଚ୍ଛା କାର୍ଯ୍ୟ କରୁଛି। ଦିନ ତମାମ ଅଘୋଷିତ ବିଦ୍ୟୁତକାଟ ହେଉଛି ଯାହା ଫଳରେ ଏହାର ସିଧାସଳଖ ପ୍ରଭାବ ନାଗରିକଙ୍କ ଉପରେ ପଡୁଛି।
ଅନ୍ୟ ପକ୍ଷରେ ଯଦି ଏ ନେଇ ଅଭିଯୋଗ କରାଯାଏ ତାହାଲେ ଗୋଟେ ଅଭିଯୋଗ ପ୍ରକୋଷ୍ଠ ନାଇଁ କି ଅଭିଯୋଗ ହେଲ୍ପଲାଇନ ନମ୍ବର ବି ନାଇଁ। ଯଦି ଉପରିସ୍ଥ ଅଧିକାରୀଙ୍କୁ ଯୋଗାଯୋଗ କରାଯାଉଛି ତାହାଲେ ସେମାନେ ନାଭାଲ ଗ୍ରୀଡ଼କୁ ଦୋଷ ଦେଉଛନ୍ତି ଏବଂ ଯଦି ନାଭାଲ ଗ୍ରୀଡ଼କୁ ଯୋଗାଯୋଗ କରାଯାଏ ତାହାଲେ ସେମାନେ ଟିପିସିଓଡିଏଲ ଉପରକୁ ଦୋଷ ଲଦିଦେଉଛନ୍ତି। ଦେଖିବାକୁ ଗଲେ ବର୍ଷ ତମାମ ରକ୍ଷଣାବେକ୍ଷଣ ପାଇଁ ବାରମ୍ବାର ଘୋଷଣା ହୋଇ ବିଦ୍ୟୁତ ସରବରାହ ବନ୍ଦ ରହୁଥିବା ବେଳେ ପୁଣି ଅଘୋଷିତ ବିଦ୍ୟୁତକାଟ କେତେଦୂର ଯୁକ୍ତିଯୁକ୍ତ। ଏହାସହିତ ସାମାନ୍ୟ ବର୍ଷା ପବନ ହେଲେ ସଙ୍ଗେସଙ୍ଗେ ବିଦ୍ୟୁତ କାଟ ହେଉଛି ଏବଂ ତାକୁ ମରାମତି ପାଇଁ ଘଣ୍ଟା ଘଣ୍ଟା ଲାଗୁଛି।
ତେବେ ଏଠି ପ୍ରଶ୍ନ ଉଠୁଛି ବର୍ଷ ତମାମ ବିଦ୍ୟୁତ ବିଭାଗ ମରାମତି ଆଳରେ ଦିନ ଦିନ ଧରି ଯେଉଁ ବିଦ୍ୟୁତ କାଟ କରୁଛି ତାହାର ଅଭିପ୍ରାୟ କଣ? ଏଠାର ନାଗରିକ ମାନଙ୍କ ମୌଳିକ ସୁବିଧାକୁ ଅଣଦେଖା କରିବା ଆଗକୁ ଯେ ବଡ଼ ଧରଣର ଆନ୍ଦୋଳନକୁ ପରୋକ୍ଷ ଭାବେ ବିଦ୍ୟୁତ ବିଭାଗ ନିମନ୍ତ୍ରଣ କରୁଛି ଏଥିରେ କୌଣସି ସନ୍ଦେହ ନାଇଁ। ତତସହିତ ଖୋଦ ଆଇନ ମନ୍ତ୍ରୀଙ୍କ ନିର୍ବାଚନମଣ୍ଡଳୀରେ ବିଦ୍ୟୁତ ବିଭାଗର ଏପରି ମନାମାନୀ କାର୍ଯ୍ୟକୁ ନାପସନ୍ଦ କରିଛନ୍ତି ଜନସାଧାରଣ। ଯଥାଶୀଘ୍ର ଏଠିକାର ବିଦ୍ୟୁତ କାଟ ସମସ୍ୟାକୁ ଦୂର କରିବା ଦିଗରେ ପଦକ୍ଷେପ ନେବାକୁ ସ୍ଥାନୀୟ ବିଧାୟକ ତଥା ଆଇନ ମନ୍ତ୍ରୀ ପୃଥ୍ଵୀରାଜ ହରିଚନ୍ଦନଙ୍କୁ ‘ସମୀକ୍ଷା’ ମାଧ୍ୟମରେ ବାଣପୁର-ବାଲୁଗାଁବାସୀ ନିବେଦନ କରିଛନ୍ତି।