ନୂଆଦିଲ୍ଲୀ: କର୍ଣ୍ଣାଟକ କଂଗ୍ରେସ ନେତା କେ.ଏନ୍. ରାଜନ୍ନା ଆଜି ସିଦ୍ଧରମୈୟା ସରକାରରେ ସମବାୟ ମନ୍ତ୍ରୀ ପଦରୁ ଇସ୍ତଫା ଦେଇଛନ୍ତି। ଦାବି କରାଯାଉଛି ଯେ, ଦଳର ହାଇକମାଣ୍ଡ ତାଙ୍କ ଇସ୍ତଫା ଦାବି କରିବା ପରେ କେ.ଏନ୍. ରାଜନ୍ନା ପଦ ଛାଡିବାକୁ ନିଷ୍ପତ୍ତି ନେଇଛନ୍ତି। ରାଜନ୍ନାଙ୍କ ଇସ୍ତଫା ମଧ୍ୟ ଗ୍ରହଣ କରାଯାଇଛି।
କେ.ଏନ୍. ରାଜନ୍ନା ରାହୁଲ ଗାନ୍ଧୀଙ୍କ ଦ୍ୱାରା ଲଗାଯାଇଥିବା ଭୋଟ ଚୋରି ଅଭିଯୋଗକୁ ସମାଲୋଚନା କରିଥିଲେ। ସେ ଚିନ୍ତା ପ୍ରକାଶ କରି କହିଥିଲେ ଯେ, ନିର୍ବାଚନ ପୂର୍ବରୁ କଂଗ୍ରେସ ଦଳ ଭୋଟର ତାଲିକାରେ ଥିବା କଥିତ ତ୍ରୁଟି ଦୂର କରିବାରେ ବିଫଳ ହୋଇଛି। ଦଳ ଲଜ୍ଜିତ ହେବା ଉଚିତ, କାରଣ ଏହି ଅନିୟମିତତା ଆମ ଆଖି ସାମ୍ନାରେ ଘଟିଥିଲା। ଏହା ସହିତ, ସେ କଂଗ୍ରେସ ଦଳକୁ ମଧ୍ୟ ପ୍ରଶ୍ନ କରିଥିଲେ ଏବଂ କହିଥିଲେ ଯେ, କଂଗ୍ରେସ କ୍ଷମତାରେ ଥିବା ସମୟରେ ଭୋଟର ତାଲିକା ପ୍ରସ୍ତୁତ କରାଯାଇଥିଲା।
କେ.ଏନ୍. ରାଜନ୍ନା କଂଗ୍ରେସକୁ ପ୍ରଶ୍ନ କରିଥିଲେ ଏବଂ କହିଥିଲେ ଯେ, ‘ସେତେବେଳେ ସମସ୍ତେ ଆଖି ବନ୍ଦ କରି ଚୁପ୍ ବସିଥିଲେ କି? ଦଳକୁ ଲଜ୍ଜା ଲାଗିବା କଥା। ଯଦି ଆମେ ଏପରି ଜିନିଷ ବିଷୟରେ ସାଧାରଣ ଭାବରେ କଥାବାର୍ତ୍ତା କରିବା ଆରମ୍ଭ କରୁ, ତେବେ ଭିନ୍ନ ଭିନ୍ନ ମତ ବାହାରି ଆସିବ। ଆମ ସରକାର କ୍ଷମତାରେ ଥିବା ସମୟରେ ଭୋଟର ତାଲିକା ପ୍ରସ୍ତୁତ କରାଯାଇଥିଲା। କଂଗ୍ରେସ କ’ଣ ସେତେବେଳେ ଆଖି ବନ୍ଦ କରି ଚୁପ୍ ବସିଥିଲା?
ସେ ଆହୁରି କହିଛନ୍ତି ଯେ, ଏହି ଅନିୟମିତତା ଘଟିଥିଲା, ଏହା ସତ୍ୟ। ଏଥିରେ କିଛି ମିଥ୍ୟା ନାହିଁ। ଆମକୁ ଲଜ୍ଜା ଲାଗିବା କଥା, କାରଣ ଏହି ଅନିୟମିତତା ଆମ ଆଖି ସାମ୍ନାରେ ଘଟିଥିଲା। ଯେତେବେଳେ ଦଳ ଆପତ୍ତି ଦାଖଲ କରିବା ଉଚିତ ଥିଲା, ସେତେବେଳେ ଚୁପ୍ ରହିଲା।
ରାଜନ୍ନାଙ୍କ ମନ୍ତବ୍ୟରେ କଂଗ୍ରେସ କ୍ଷୁବ୍ଧ:
ନେତା କେଏନ ରାଜନ୍ନ କହିଛନ୍ତି ଯେ, ‘କଂଗ୍ରେସ ସେତେବେଳେ ଏଥିରେ ଧ୍ୟାନ ଦେଇନଥିଲା, ତେଣୁ ଆମକୁ ଭବିଷ୍ୟତରେ ପ୍ରସ୍ତୁତ ହେବାକୁ ପଡିବ।’ ନିର୍ବାଚନରେ ଅନିୟମିତତା ସମ୍ପର୍କରେ ସେ କହିଛନ୍ତି ଯେ, ମହାଦେବପୁରାରେ ପ୍ରକୃତରେ ଜାଲିଆତି ହୋଇଛି। ତିନୋଟି ଭିନ୍ନ ସ୍ଥାନରେ ଜଣେ ବ୍ୟକ୍ତି ପଞ୍ଜୀକୃତ ହୋଇଥିଲେ ଏବଂ ସେ ତିନୋଟି ସ୍ଥାନରେ ଭୋଟ ଦେଇଥିଲେ। ଯେତେବେଳେ ଭୋଟର ତାଲିକାର ଡ୍ରାଫ୍ଟ ପ୍ରସ୍ତୁତ କରାଯାଉଛି, ଆମେ ନଜର ରଖିବା ଉଚିତ ଏବଂ ଆପତ୍ତି ପଞ୍ଜୀକୃତ କରିବା ଉଚିତ, ଯାହା ଆମର ଦାୟିତ୍ୱ। ସେତେବେଳେ ଆମେ ନୀରବ ରହିଲୁ, କିନ୍ତୁ ଏବେ ଆମେ ଏହା ବିଷୟରେ କଥା ହେଉଛୁ।
ସେପଟେ କଂଗ୍ରେସ ଦଳର ପ୍ରମୁଖ ନେତାମାନେ ରାଜନ୍ନାଙ୍କ ମନ୍ତବ୍ୟରେ କ୍ଷୁବ୍ଧ। କର୍ଣ୍ଣାଟକର ଉପମୁଖ୍ୟମନ୍ତ୍ରୀ ଡିକେ ଶିବକୁମାର କହିଛନ୍ତି ଯେ, ରାଜନ୍ନାଙ୍କ ସମ୍ପୂର୍ଣ୍ଣ ଦୋଷ ରହିଛି ଏବଂ ଦଳୀୟ ନେତୃତ୍ୱ ତାଙ୍କ ମନ୍ତବ୍ୟର ଜବାବ ଦେବେ।