ନୂଆଦିଲ୍ଲୀ: କର୍ଣ୍ଣାଟକ କଂଗ୍ରେସ ବିଧାୟକ ଏଚ୍. ଏ. ଇକବାଲ ହୁସେନ ଆଜି ଦାବି କରିଛନ୍ତି ଯେ, ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କୁ ଆଗାମୀ ଦୁଇରୁ ତିନି ମାସ ମଧ୍ୟରେ ରାଜ୍ୟର ମୁଖ୍ୟମନ୍ତ୍ରୀ ହେବାର ସୁଯୋଗ ମିଳିପାରେ। ଶିବକୁମାରଙ୍କ ଘନିଷ୍ଠ କୁହାଯାଉଥିବା ବିଧାୟକଙ୍କ ଏହି ମନ୍ତବ୍ୟ ଚଳିତ ବର୍ଷ ଶେଷ ଭାଗରେ କର୍ଣ୍ଣାଟକରେ ନେତୃତ୍ୱ ପରିବର୍ତ୍ତନ ହେବାର କଳ୍ପନାଜଳ୍ପନା ମଧ୍ୟରେ ଆସିଛି।
ସେପ୍ଟେମ୍ବର ପରେ ରାଜ୍ୟରେ ବୈପ୍ଳବିକ ରାଜନୈତିକ ପରିବର୍ତ୍ତନର ସଙ୍କେତ ଦେଇଥିବା ସମବାୟ ମନ୍ତ୍ରୀ କେ. ଏନ. ରାଜନ୍ନାଙ୍କ ସାମ୍ପ୍ରତିକ ବୟାନ ପରେ ପୁଣି ଆଲୋଚନା ଆରମ୍ଭ ହୋଇଛି, ଯାହା ସେପ୍ଟେମ୍ବର ପରେ ରାଜ୍ୟରେ ରାଜନୈତିକ ପରିବର୍ତ୍ତନର ସଙ୍କେତ ଦେଇଥିଲା। ସେ କହିଥିଲେ ଯେ, ଆପଣମାନେ ସମସ୍ତେ ଜାଣନ୍ତି ଯେ ଏହି ସରକାର କ୍ଷମତାକୁ ଆସିବା ପୂର୍ବରୁ ଆମର (କଂଗ୍ରେସର) ଶକ୍ତି କ’ଣ ଥିଲା।
କଂଗ୍ରେସ ବିଧାୟକ କହିଛନ୍ତି ଯେ, ଏହି ବିଜୟ ହାସଲ କରିବା ପାଇଁ କିଏ ସଂଘର୍ଷ କରିଥିଲେ ଏବଂ କିଏ ଝାଳ ବୁହାଇଥିଲେ, ତାହା ସମସ୍ତେ ଜାଣନ୍ତି। ତାଙ୍କର (ଶିବକୁମାରଙ୍କ) ରଣନୀତି ଏବଂ କାର୍ଯ୍ୟକ୍ରମ ଏବେ ଇତିହାସ। ରାମନଗରରେ ସାମ୍ବାଦିକମାନଙ୍କ ଦ୍ଵାରା ଯେତେବେଳେ ହୁସେନଙ୍କୁ ପଚରାଗଲେ ଯେ, ଶିବକୁମାରଙ୍କ ମୁଖ୍ୟମନ୍ତ୍ରୀ ହେବାର ସୁଯୋଗ ଅଛି କି ନାହିଁ, ସେ କହିଥିଲେ ଯେ ମୁଁ କଳ୍ପନାଜଳ୍ପନାରେ ବିଶ୍ୱାସ କରେ ନାହିଁ। ଆମେ ନିଶ୍ଚିତ ଯେ ହାଇକମାଣ୍ଡ ପରିସ୍ଥିତି ବିଷୟରେ ଅବଗତ ଏବଂ ତାଙ୍କୁ ସୁଯୋଗ ଦେବା ପାଇଁ ସଠିକ୍ ସମୟରେ ସଠିକ୍ ନିଷ୍ପତ୍ତି ନେବେ।
ଯେତେବେଳେ କଂଗ୍ରେସ ବିଧାୟକ ଇକବାଲ ହୁସେନଙ୍କୁ ପଚରାଗଲା ଯେ, ଡିକେ ଶିବକୁମାର ଏହି ବର୍ଷ ମୁଖ୍ୟମନ୍ତ୍ରୀ ହେବେ କି ନାହିଁ, ହୁସେନ ହଁ ଉତ୍ତର ଦେଇଥିଲେ। ସେ କହିଥିଲେ ଯେ, ଦୁଇରୁ ତିନି ମାସ ମଧ୍ୟରେ ନିଷ୍ପତ୍ତି ନିଆଯିବ।
ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ପୁଅ ଏବଂ କଂଗ୍ରେସ ଏମଏଲସି ଯତୀନ୍ଦ୍ର ସିଦ୍ଧରମୈୟା ମୁଖ୍ୟମନ୍ତ୍ରୀ ପରିବର୍ତ୍ତନକୁ ଖାରଜ କରିବା ଉପରେ ହୁସେନ କହିଥିଲେ ଯେ, କଂଗ୍ରେସ ହାଇକମାଣ୍ଡ ୨୦୨୩ ବିଧାନସଭା ନିର୍ବାଚନ ପରେ ସରକାର ଗଠନ କରିବାକୁ ନିଷ୍ପତ୍ତି ନେଇଥିଲେ, ଆମେ ସମସ୍ତେ ସେତେବେଳେ ଦିଲ୍ଲୀରେ ଏକାଠି ଥିଲୁ। ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ମଲ୍ଲିକାର୍ଜୁନ ଖରଗେ ନିଷ୍ପତ୍ତି ନେଇଥିଲେ। ସମସ୍ତେ ଏହା ଜାଣନ୍ତି ଏବଂ ସେମାନେ ମଧ୍ୟ ପରବର୍ତ୍ତୀ ନିଷ୍ପତ୍ତି ନେବେ, ସେପର୍ଯ୍ୟନ୍ତ ଆମକୁ ଅପେକ୍ଷା କରିବାକୁ ପଡିବ ଏବଂ ଦେଖିବାକୁ ପଡିବ।
କଂଗ୍ରେସ ଭିତରେ ଅନେକ କ୍ଷମତା କେନ୍ଦ୍ର ବିଷୟରେ ରାଜନ୍ନାଙ୍କ ଦାବିର ଜବାବ ଦେଇ ହୁସେନ ସେଗୁଡ଼ିକୁ ଖାରଜ କରି କହିଥିଲେ ଯେ, କେବଳ ଗୋଟିଏ କ୍ଷମତା କେନ୍ଦ୍ର ଅଛି ଏବଂ ତାହା ହେଉଛି ଦଳର ନେତୃତ୍ଵ। କଂଗ୍ରେସରେ ଶୃଙ୍ଖଳା ଏବଂ ପ୍ରତିବଦ୍ଧତା ଅଛି ଏବଂ ସମସ୍ତେ ଏହାକୁ ଅନୁସରଣ କରନ୍ତି। ଅନେକ ସମ୍ପ୍ରଦାୟର ଲୋକମାନେ ଦଳ ପାଇଁ କାମ କରିଛନ୍ତି ଏବଂ ତ୍ୟାଗ କରିଛନ୍ତି ଏବଂ ଏଥିପାଇଁ ଲଢ଼ିଛନ୍ତି। ଆଜିର ପରିସ୍ଥିତିରେ ପରିବର୍ତ୍ତନ ଆଶା କରାଯାଉଛି ଏବଂ ଏହା ଘଟିବ, କିନ୍ତୁ ଏହାକୁ ଏକ ବିପ୍ଳବ କୁହାଯାଇପାରିବ ନାହିଁ।
