କୁଜଙ୍ଗ: କୁଜଙ୍ଗ ଥାନା ବାଲିତୁଠ ଅଂଚଳରେ ଜନୈକା ୫ମ ଶ୍ରେଣୀ ଛାତ୍ରୀ ତଥା ୧୧ ବର୍ଷର ନାବାଳିକା ୫ ମାସର ଗର୍ଭବତୀ ହେବା ଘଟଣାରେ ଟ୍ୟୁସନ୍ ମାଷ୍ଟରାଣୀଙ୍କ ବାପା ସୁବାଷ ମୁଦୁଲି (୫୩) ଓ ପିଡ଼ୀତା ଛାତ୍ରୀର ସମ୍ପର୍କୀୟ ଅଜା ରବୀନ୍ଦ୍ର କୁମାର ଦାସ (୫୫) ଆଜି ଜେଲ୍ ଯାଇଥିବା ସୂଚନା ମିଳିଛି। ଏହି ଘଟଣାକୁ ନେଇ ବାଲିତୁଠ ଅଂଚଳରେ ଚାଂଚଲ୍ୟ ସୃଷ୍ଟି କରିଛି।
ପ୍ରକାଶ ଯେ, କୁଜଙ୍ଗ ଥାନା ଅନ୍ତର୍ଗତ ବାଲିତୁଠ ବାଲିସାହି ଗ୍ରାମର ଜନୈକା ଯୁବତୀ ଘରୋଇ ଭାବେ ଟ୍ୟୁସନ କରନ୍ତି। ତାଙ୍କ ନିକଟକୁ ନିକଟସ୍ଥ ଗ୍ରାମର ବହୁ ଛାତ୍ରଛାତ୍ରୀ ପାଠ ପଢିବାକୁ ଆସନ୍ତି। ଶିକ୍ଷୟତ୍ରୀ ଜଣକ ଅନୁପସ୍ଥିତ ରହିଲେ ତାଙ୍କର ବାପା ସୁବାଷ ମୁଦୁଲି ପିଲାଙ୍କୁ ପାଠ ପଢାଇଥାନ୍ତି। ଏହି ସୁଯୋଗରେ ଦଳିତ ବର୍ଗର ଜନୈକା ୧୧ବର୍ଷର ନାବାଳିକା ତଥା ୫ମ ଶ୍ରେଣୀ ଛାତ୍ରୀଙ୍କୁ ବାରମ୍ବାର ଦୁଷ୍କର୍ମ କରିଥିଲେ। ଗତ କିଛିଦିନ ତଳେ ପୀଡ଼ିତା ଛାତ୍ରୀ ଜଣଙ୍କର ହଠାତ୍ ପେଟ ଯନ୍ତ୍ରଣା ହୋଇଥିଲା। ଛାତ୍ରୀଙ୍କ ବାପା ନିକଟସ୍ଥ ବାଲିତୁଠ ଡାକ୍ତରଖାନାକୁ ଚିକିତ୍ସା ନିମନ୍ତେ ନେଇଥିଲେ। ସେଠାରେ ପରୀକ୍ଷା କରିବାରୁ ଛାତ୍ରୀ ଜଣକ ୫ମାସର ଅନ୍ତସତ୍ୱା ହୋଇଥିବା ଜଣାପଡିଥିଲା। ଯାହା ଫଳରେ ସୁବାଷ ଛାତ୍ରୀ ଜଣଙ୍କ ସହ ଶାରିରୀକ ସମ୍ପର୍କ ରଖିଥିବାର ସ୍ୱୀକାର କରିଥିଲା ଏବଂ ଏ ସମ୍ପର୍କରେ କାହାକୁ କିଛି ନକହିବାକୁ ବାରମ୍ବାର ଧମକ ଦେଉଥିଲା। ଘଟଣା ସମ୍ପର୍କରେ ପରିବାର ଲୋକେ ଜାଣିବା ପରେ କୁଜଙ୍ଗ ଥାନାରେ ଲିଖିତ ଅଭିଯୋଗ କରିଥିଲେ।
ଅଭିଯୋଗ ଆଧାରରେ ପୋଲିସ୍ ମାମଲା ରୁଜ୍ଜୁ କରି ସୁବାଷକୁ ଗିରଫ କରି ପଚରାଉଚରା କରିବା ପରେ ଘଟଣାଟି ଭିନ୍ନ ମୋଡ଼ ନେଇଥିଲା ବରଂ ଏହି ଘଟଣାରେ ପୀଡିତାର ସମ୍ପର୍କୀୟ ଅଜା ରବୀନ୍ଦ୍ର କୁମାର ଦାସ ସଂପୃକ୍ତିନେଇ ସୁବାଷ ପୋଲିସ୍ ଆଗରେ ପ୍ରକାଶ କରିଥିଲା। ପୋଲିସ୍ ତୁରନ୍ତ ସମ୍ପର୍କୀୟ ଅଜା ରବୀନ୍ଦ୍ରକୁ ଗିରଫ କରିଥିଲା। ଗତକାଲି ଅଭିଯୁକ୍ତଙ୍କର ଡ଼ିଏନଏ ପରୀକ୍ଷା ପାଇଁ ନମୁନା ପଠାଯାଇଛି। ସାତଦିନ ମଧ୍ୟରେ ଡିଏନ୍ଏ ରିପୋର୍ଟ ଆସିଲାପରେ ସତ୍ୟାସତ୍ୟ ଜଣାପଡିବ ବୋଲି ପୋଲିସ୍ କହିଛି। ଏହି ଘଟଣାକୁ ନେଇ ସ୍ଥାନୀୟ ଅଂଚଳରେ ବେଶ ଆଲୋଡନ ପ୍ରକାଶ ପାଇଛି।
