Categories
ଆଜିର ଖବର ଜାତୀୟ ଖବର

ଆସାମ ତୈଳକୂପରେ ଭୟଙ୍କର ବିସ୍ଫୋରଣ ,୩ ବିଦେଶୀ ବିଶେଷଜ୍ଞ ଗୁରୁତର

ଗୁଆହାଟୀ: ଆସାମର ତିନସୁକିଆ ଜିଲ୍ଲା ସ୍ଥିତ ବାଗଜାନ ତୈଳକୂପରେ ବୁଧବାର ହଠାତ ଏକ ଭୟଙ୍କର ବିସ୍ଫୋରଣ ଘଟିବାରୁ ସେଠାରେ କାମ କରୁଥିବା ୩ ଜଣ ବିଦେଶୀ ବିଶେଷଜ୍ଞ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ଅଏଲ ଇଣ୍ଡିଆର 5 ନମ୍ବର ତୈଳ କୂପଠାରେ ବିସ୍ଫୋରଣ ଘଟିଛି। ଏଠାରେ ଜୁନ୍ ମାସ 9 ତାରିଖରେ ନିଆଁ ଲାଗିଛି। ଏପରିକି ଏହି ନିଆଁକୁ ଲିଭାଇବାକୁ ବିଦେଶରୁ ଆସିଥିବା ବିଶେଷଜ୍ଞ ମଧ୍ୟ ବିଫଳ ହେଲେଣି ।

ଗତ ମେ ୨୭ରେ ତୈଳକୂପର ପ୍ରେସର କଣ୍ଟ୍ରୋଲ ସିଷ୍ଟମ ବିଫଳ ହେବାରୁ ଏଥିରୁ ତୈଳ ନିର୍ଗତ ହେବା ଆରମ୍ଭ କରିଥିଲା । ଏହି ତୈଳକୂପରେ ହୋଇଥିବା ଛିଦ୍ରକୁ ମରାମତି କରିବାକୁ ଅଏଲ ଇଣ୍ଡିଆ ପକ୍ଷରୁ ସିଂଗାପୁରର ଏକ କମ୍ପାନି ଆଲର୍ଟ ଡିଜାଷ୍ଟର କଣ୍ଟ୍ରୋଲକୁ ଦାୟିତ୍ୱ ଅର୍ପଣ କରାଯାଇଥିଲା । ସିଂଗାପୁର କମ୍ପାନିର ଏକ ୬ ଜଣିଆ ବିଶେଷଜ୍ଞ ଟିମ ଗତ ଜୁନ ୮ରୁ ସ୍ଥିତିକୁ ନିୟନ୍ତ୍ରଣ କରିବାକୁ ଉଦ୍ୟମ କରୁଥିଲେ । ଏହି ଦଳରେ ସିଂଗାପୁରର ୩ ଜଣ, ଆମେରିକାର ୨ ଜଣ ଓ କାନାଡାର ଜଣେ ନାଗରିକ ଥିଲେ ।

କିନ୍ତୁ ସ୍ଥିତିକୁ ସମ୍ଭାଳିବାରେ ବିଫଳହେବାରୁ ସେମାନେ ଭାରତ ଛାଡ଼ିବାକୁ ଇଚ୍ଛାପ୍ରକାଶ କରିବା ପରେ ସ୍ଥାନୀୟ ଲୋକମାନେ ସେମାନଙ୍କୁ ପ୍ରାୟ ୧୮ ଘଣ୍ଟା ଧରି ବନ୍ଧକ ରଖିଥିଲେ।

Categories
ଆଜିର ଖବର ଜାତୀୟ ଖବର

ଆସାମ ତେଲଖଣି ଅଗ୍ନିକାଣ୍ଡ : 2 ଜଣଙ୍କ ପ୍ରାଣହାନି

ତିନସୁକିଆ : ଆସାମରେ ରହିଥିବା ତେଲଖଣିରେ ଅଗ୍ନିକାଣ୍ଡ ଘଟି ଦୁଇ ଜଣଙ୍କର ପ୍ରାଣହାନି ଘଟିଛି । ଆସାମର ତିନିସୁକିଆ ଜିଲ୍ଲାରେ ଘଟିଥିବା ଅଗ୍ନିକାଣ୍ଡରେ 2 ଜଣ ଅଗ୍ନିଶମ ବିଭାଗ ଅଧିକାରୀଙ୍କ ପ୍ରାଣହାନି ଘଟିଛି । ମଙ୍ଗଳବାରରୁ ଆରମ୍ଭ ହୋଇଥିବା ଏହି ଅଗ୍ନିକାଣ୍ଡରେ ବର୍ତ୍ତମାନ ସୁଦ୍ଧା 2 ଜଣ ଅଗ୍ନିଶମ ଅଧିକାରୀଙ୍କ ପ୍ରାଣହାନି ଘଟିଥିବା ବେଳେ 6 ଜଣ ଆହତ ହୋଇଛନ୍ତି । ତିନିସୁକିଆର ବାଘଜନରେ ରହିଥିବା ଅଏଲ ଇଣ୍ଡିଆ ଲିମିଟେଡ୍‌ର ଏହି ତେଲଖଣିରେ ଲାଗିଥିବା ନିଆଁକୁ ଆୟତ କରିବା ପାଇଁ ପ୍ରୟାସ ଜାରି କରାଯାଇଛି ବୋଲି ଆସାମ ପରିବେଶ ମନ୍ତ୍ରୀ ଶୁକ୍ଲବୈଦ୍ୟ ପ୍ରକାଶ କରିଛନ୍ତି । ଏହା ସହିତ ସିଙ୍ଗାପୁରରୁ ଏକ ବିଶେଷଜ୍ଞ ଦଳ ମଧ୍ୟ ଆସାମରେ ପହଞ୍ଚିଛନ୍ତି । (ଏଜେନ୍ସି)

Categories
ଆଜିର ଖବର ଜାତୀୟ ଖବର

ଆସାମର ବାରାକ୍‌ ଉପତ୍ୟାକାରେ ଧସିଲା ମାଟି ଅତଡା : 20 ଜଣଙ୍କ ପ୍ରାଣହାନି

ଦିସ୍‌ପୁର : ଆସାମରେ ଏକ ଅଭାବନୀୟ ଘଟଣାରେ 20 ଜଣ ପ୍ରାଣ ହରାଇଛନ୍ତି । ଆସାମର ତିନି ଜିଲ୍ଲାର ବାରାକ୍‌ ଉପତ୍ୟାକାରେ ଭୂସ୍ଖଳନ ଘଟି 20 ଜଣଙ୍କ ପ୍ରାଣହାନି ଘଟିଛି । ବନ୍ୟା କାରଣରୁ ଆସାମରେ ମଙ୍ଗଳବାର ଏହି ଭୂସ୍ଖଳନ ଘଟିଛି । ବିଗତ କିଛି ଦିନ ଧରି ବର୍ଷା କାରଣରୁ ଏହି ଭୁସ୍ଖଳନ ଘଟିଛି । କରିମଗଞ୍ଜ ଜିଲ୍ଲାରେ 6 ଜଣଙ୍କର ପ୍ରାଣହାନି ଘଟିଥିବା ବେଳେ , ଚହର ଏବଂ ହାଇଲାକଣ୍ଡି ଜିଲ୍ଲାରେ 7 ଜଣ ଲେଖାଏଁ ପ୍ରାଣ ହରାଇଛନ୍ତି । ଅନ୍ୟାନ୍ୟ କାରଣରୁ 9 ଜଣ ଲୋକଙ୍କ ପ୍ରାଣ ହାନି ଘଟିଥିବା ବେଳେ 7ଟି ଜିଲ୍ଲାର 356 ଗ୍ରାମର ଲକ୍ଷାଧିକ ଲୋକ ବନ୍ୟାଦ୍ବାରା ପ୍ରଭାବିତ ହୋଇଛନ୍ତି । ସରକାରୀ ରିପୋର୍ଟ ଅନୁଯାୟୀ ଏହି ବନ୍ୟାରେ 2678 ହେକ୍ଟର ଚାଷଜମି ପ୍ରଭାବିତ ହୋଇଥିବା ବେଳେ 44 ହଜାର ଗୃହ ପାଳିତ ପଶୁ ପ୍ରଭାବିତ ହୋଇଛନ୍ତି । (ଏଜେନ୍ସି)

Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ଆସାମରେ ବ୍ୟାପୁଛି ସ୍ବାଇନ୍‌ ଫ୍ଲୁ : ମାଂସ ଖାଇବା ଉପରେ ସରକାରଙ୍କ କଟକଣା

ଆସାମ : ଦେଶବ୍ୟାପୀ କରୋନାର ସଙ୍କ୍ରମଣ ବ୍ୟାପୁଥିବା ବେଳେ ଆସାମରେ ସ୍ବାଇନ୍‌ ଫ୍ଲୁ ଚିନ୍ତାର କାରଣ ହୋଇଛି । ବିଗତ ଚାରିଦନ ମଧ୍ୟରେ 2 ହଜାରରୁ ଅଧିକ ଘୁଷୁରୀ ପ୍ରାଣ ହରାଇବା ପରେ ରବିବାର ଘୁଷୁରୀ ମାଂସ ଖାଇବା କିମ୍ବା ବିକିବା ଉପରେ ରୋକ୍‌ ଲଗାଇଛନ୍ତି ଆସାମ ସରକାର । ବ୍ରହ୍ମପୁତ୍ର ଗେଷ୍ଟ ହାଉସ୍‌ରେ ସରକାରୀ ଅଧିକାରୀଙ୍କ ସହିତ ବୈଠକ ପରେ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନଓ୍ବାଲ ଏହି ନିଷ୍ପତ୍ତି ନେଇଛନ୍ତି । ରବିବାର ଠାରୁ ଏହି କଟକଣା ଲାଗୁ କରାଯାଇଥିବା ବେଳେ ପରବର୍ତ୍ତୀ ନିଷ୍ପତ୍ତି ପର୍ଯ୍ୟନ୍ତ ମାଂସ ଖାଇବା କିମ୍ବା ବିକିବା ଉପରେ ଏହି କଟକଣା ଲାଗୁ କରାଯାଇଛି । (ଏଜେନ୍ସି)

Categories
ଅପରାଧ ଆଜିର ଖବର ଜାତୀୟ ଖବର

ଆସାମରେ ନାବାଳିକାକୁ ଦୁଷ୍କର୍ମ ପରେ ହତ୍ୟା, 7 ନାବାଳକ ଅଟକ

ଗୌହାଟୀ : ଆସାମରେ ଏକ ଲୋମହର୍ଷଣକାରୀ ଘଟଣା ଘଟିଯାଇଛି । ଜଣେ ନାବାଳିକାଙ୍କୁ ଦୁଷ୍କର୍ମ କରାଯିବା ପରେ ହତ୍ୟା କରାଯାଇଛି । ଏହି ଘଟଣାରେ ସମ୍ପୃକ୍ତ 7 ଜଣ ନାବାଳକ ଛାତ୍ରଙ୍କୁ ପୋଲିସ୍‌ ଗିରଫ କରିଛି । ଆସାମର ବିଶ୍ବନାଥ ଜିଲ୍ଲାରେ ନାବାଳିକାଙ୍କ ଶବ ଝୁଲନ୍ତା ଅବସ୍ଥାରେ ଏକ ଗଛରୁ ଉଦ୍ଧାର କରାଯାଇଛି । ଶୁକ୍ରବାର ଛାତ୍ରୀ ଜଣକ ନିଜର ବୋର୍ଡ ପରୀକ୍ଷା ଦେଇଥିବା ବେଳେ ଉକ୍ତ 7 ସହପାଠୀ ତାଙ୍କୁ ପାର୍ଟି ବାହାନାରେ ନେଇ ବଳାତ୍କାର କରିଥିଲେ । ଏନେଇ ପୀଡିତାଙ୍କ ମାମୁଁ ଥାନାରେ ଅଭିଯୋଗ କରିବା ପରେ 7 ଜଣ ଅଭିଯୁକ୍ତଙ୍କୁ ଅଟକ ରଖାଯାଇଛି । 12 ବର୍ଷୀୟା ନାବାଳିକାଙ୍କୁ ଦୁଷ୍କର୍ମ ପରେ ଏହି 7 ନାବାଳକ ହତ୍ୟା କରିଥିବା ସନ୍ଦେହ କରାଯାଉଛି । ସମସ୍ତ ଅଭିଯୁକ୍ତ ନାବାଳକ ହୋଇଥିବାରୁ ସେମାନଙ୍କୁ ଏକ ପର୍ଯ୍ୟବେକ୍ଷଣ କେନ୍ଦ୍ରରେ ରଖାଯାଇଛି । (ଏଜେନ୍ସି)

Categories
ଆଜିର ଖବର ଜାତୀୟ ଖବର

ଆସାମ ଏବଂ ମେଘାଳୟରେ ମୃଦୁ ଭୂକମ୍ପ

ଗୌହାଟୀ/ଶିଲଂ : ଆସାମ ଏବଂ ମେଘାଳୟରେ ମୃଦୁ ଭୂକମ୍ପ ଝଟ୍‌କା ଅନୁଭୂତ ହୋଇଛି । ଶୁକ୍ରବାର ଅପରାହ୍ନରେ ଆସାମ ଏବଂ ମେଘାଳୟରେ ଏହି ଭୂମିକମ୍ପ ଅନୁଭୂତ ହୋଇଥିଲା । ରିକ୍ଟର ସ୍କେଲରେ ଏହି ଭୂକମ୍ପର ତୀବ୍ରତା 2.9ରୁ 3.3 ମଧ୍ୟରେ ରହିଛି । ଏହା ସହିତ ବାଂଲାଦେଶ ସୀମାରେ ସକାଳ 8.32 ମିନିଟ୍‌ରେ ଭୂକମ୍ପ ଅନୁଭୂତ ହୋଇଥିଲା । ଆସାମରେ ଅପରାହ୍ନ 2.05 ମିନିଟ୍‌ରେ ଅନୁଷ୍ଠିତ ଭୂକମ୍ପର ତୀବ୍ରତା 3.3 ରହିଥିଲା । ସେହିପରି ମେଘାଳୟର ରାଜଧାନୀ ଶିଲଂ ଏବଂ ଦିମା ହାସାଓରେ ଏହି ଭୂକମ୍ପର ପ୍ରଭାବ ଅନୁଭୂତ ହୋଇଥିଲା । (ଏଜେନ୍ସି)

Categories
ଆଜିର ଖବର ଖେଳ

ଆସାମ ବିପକ୍ଷରେ ଇନିଂସ ବିଜୟ ସହିତ ପଏଣ୍ଟ ଟେବୁଲ୍‌ର ପ୍ରଥମ ସ୍ଥାନରେ ଓଡିଶା

ସମୀକ୍ଷା ବ୍ୟୁରୋ
କଟକ : ଓଡିଶା ଏବଂ ଆସାମ ମଧ୍ୟରେ ଅନୁଷ୍ଠିତ ରଣଜୀ ଟ୍ରଫି ମୁକାବିଲାର ଅନ୍ତିମ ଦିବସରେ ମ୍ୟାଚ୍‌ ଜତିନେଇଛି ଓଡିଶା । ଆସାମକୁ ଏକ ଇନିଂସ ଓ 3 ରନ୍‌ରେ ପରାସ୍ତ କରି ଓଡିଶା ପୁନର୍ବାର ପଏଣ୍ଟ ଟେବୁଲର ପ୍ରଥମ ସ୍ଥାନକୁ ଉନ୍ନୀତ ହୋଇଛି । ପ୍ରଥମ ଇନିଂସରେ ଓଡିଶା 436 ରନ୍‌ କରିଥିବା ବେଳେ ଆସାମ 238 ରନ୍‌ରେ ସମସ୍ତ ଓ୍ବିକେଟ ହରାଇ ଫଲୋଅନ୍‌ ଡାକରା ପାଇଥିଲା । ଦ୍ବତୀୟ ଇନିଂସରେ ଆସାମର ଦୁଇ ଓପନର ଦୃଢତାର ସହିତ ଇନିଂସ ଆରମ୍ଭ କରିଥିଲେ । 198 ରନ୍‌ ପଛରେ ରହିଥିବା ଆସାମ ପକ୍ଷରୁ ଦୁଇ ଓପ୍‌ନର କୁନାଲ ସାଇକିଆ(74) ଏବଂ ଶୁଭମ ମଣ୍ଡଳ(72) ପ୍ରଥମ ଓ୍ବିକେଟରେ 124 ରନ୍‌ ଯୋଡିଥିଲେ । ପ୍ରଥମ ଓ୍ବିକେଟର ପତନ ପରେ ଆସାମ ଇନିଂସ ତାସ ପତା ପରି ଭୁଷୁଡି ପଡିଥିଲା । ଦୁଇ ଜଣଙ୍କ ବ୍ୟତିତ 11 ନମ୍ବର ବ୍ୟାଟ୍ସମ୍ୟାନ୍‌ ଅରୂପ ଦାସ(13) କେବଳ ଦୁଇ ଅଙ୍କ ଛୁଇଁଥିଲେ । ଆସାମର 8 ଜଣ ଖେଳାଳି ଦୁଇ ଅଙ୍କ ଛୁଇଁବାରେ ସକ୍ଷମ ହୋଇନଥିବା ବେଳେ ଓଡିଶା ପକ୍ଷରୁ ରାଜେଶ ମହାନ୍ତି ସର୍ବାଧିକ 4ଟି ଓ୍ବିକେଟ ଅକ୍ତିଆର କରିଥିଲେ । ସୂର୍ଯ୍ୟକାନ୍ତ ପ୍ରଧାନ ଏବଂ ଦେବବ୍ରତ ପ୍ରଧାନ ପ୍ରତ୍ୟେକ ତିନୋଟି ଲେଖାଏଁ ଓ୍ବିକେଟ ଅକ୍ତିଆର କରିଥିଲେ । 79 ରନ୍‌ ଏବଂ 7ଟି ଓ୍ବିକେଟ ଅକ୍ତିଆର କରିଥିବା ଦେବବ୍ରତଙ୍କୁ ମ୍ୟାଚ୍‌ର ଶ୍ରେଷ୍ଠ ଖେଳାଳି ଘୋଷଣା କରାଯାଇଥିଲା ।

Categories
ଆଜିର ଖବର ଜାତୀୟ ଖବର

ଝିଅଙ୍କ ବିବାହ ପାଇଁ ଆସାମ ସରକାର ପ୍ରଦାନ କରିବେ 10 ଗ୍ରାମ ସୁନା

ଗୌହାଟୀ, 31/12 : ଆସନ୍ତା ଜାନୁୟାରୀ 1 ତାରିଖ,2020ରୁ ଆସାମ ସରକାର ଏକ ନୂତନ ଯୋଜନା ପ୍ରଣୟନ କରିବାକୁ ଯାଉଛନ୍ତି। ଅରୁନ୍ଧତୀ ଯୋଜନା ନାମକ ଏହି ଯୋଜନା ଅନୁସାରେ ବିବାହ କରୁଥିବା କନ୍ୟାଙ୍କୁ 10 ଗ୍ରାମର ସୁନା ପ୍ରଦାନ କରିବେ। ସରକାରଙ୍କ ପକ୍ଷରୁ ଏହି ଯୋଜନା ଅନୁଯାୟୀ କନ୍ୟାଙ୍କୁ 10 ଗ୍ରାମ୍‌ ସୁନା ଅଥବା 30 ହଜାର ଟଙ୍କା ପ୍ରଦାନ କରାଯିବ। ଏହି ଯୋଜନାରେ ସରକାରଙ୍କୁ ବାର୍ଷିକ 30 ହଜାର କୋଟିର ଅର୍ଥ ଖର୍ଚ୍ଚ କରିବାକୁ ପଡିବ ବୋଲି ଜଣାପଡିଛି। ତେବେ ଏହି ନିୟମ ଅନୁଯାୟୀ ବିବାହ ପାଇଁ ସର୍ବାଧିକ ବୟସ ସୀମାର କୌଣସି ସୀମା ରଖାଯାଇନଥିବା ବେଳେ ସର୍ବନିମ୍ନ ବୟସ ଝିଅଙ୍କ ପାଇଁ 18 ଏବଂ ପୁଅଙ୍କ ପାଇଁ 21 ରହିଛି। ଏହା ସହିତ କେବଳ ଝିଅର ପ୍ରଥମ ବିବାହରେ ଏହି ଅର୍ଥ ପ୍ରଦାନ କରାଯିବ। ବିବାହ ଅଧିନିୟମ ଧାରା 1954 ଅନୁଯାୟୀ ବିବାହ ପଞ୍ଜୀକୃତ ହୋଇଥିଲେ ଏହି ଅର୍ଥ ପ୍ରଦାନ କରାଯିବ। (ଏଜେନ୍ସୀ)

Categories
ଆଜିର ଖବର

ଆସାମ ହିଂସା ପାଇଁ ଏସ୍‌ଆଇଟି ତଦନ୍ତ ନିର୍ଦ୍ଦେଶ ଦେଲେ ସୋନଓ୍ବାଲ

ଗୌହାଟୀ, 21/12 : ନାଗରିକତ୍ବ ସଂଶୋଧନ ଆଇନ(ସିଏଏ)କୁ ନେଇ ଆସାମରେ ଘଟିଥିବା ହିଂସାକାଣ୍ଡର ଏସଆଇଟି ତଦନ୍ତ ହେବ । ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ ଏ ନେଇ ସ୍ବତନ୍ତ୍ର ତଦନ୍ତକାରୀ ଟିମ(ଏସଆଇଟି) ଗଠନ କରିଛନ୍ତି । ଶନିବାର ସୋନଓ୍ବାଲ ଏସ୍‌ଆଇଟି ତଦନ୍ତର ନିର୍ଦ୍ଦେଶ ଦେଇଛନ୍ତି । ମୁଖ୍ୟମନ୍ତ୍ରୀ କହିଛନ୍ତି, ନାଗରିକତ୍ବ ସଂଶୋଧନ ଆଇନ ବିରୋଧରେ ବିକ୍ଷୋଭ ପ୍ରଦର୍ଶନ ବେଳେ ରାଜ୍ୟରେ ହିଂସାକାଣ୍ଡ ଘଟିଥିଲା । ଯେଉଁମାନେ ହିଂସାରେ ସାମିଲ ରହିଛନ୍ତି ସେମାନଙ୍କୁ ଛଡ଼ାଯିବ ନାହିଁ । ହିଂସାକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୋନଓ୍ବାଲ ଦୃଢୋକ୍ତି ପ୍ରକାଶ କରିଛନ୍ତି । (ଏଜେନ୍ସୀ)

Categories
ଆଜିର ଖବର

ବାଂଲାଦେଶ ମନ୍ତ୍ରୀଙ୍କ ପରେ ଭାରତ ଗସ୍ତ ଋଦ୍ଦ କଲେ ଜାପାନ ପ୍ରଧାନମନ୍ତ୍ରୀ

ଟୋକିଓ,13/12 : ନାଗରିକତ୍ବ ସଂଶୋଧନ ବିଲ୍‌କୁ ବିରୋଧ କରି ଦୁଇ ବାଂଲାଦେଶ ମନ୍ତ୍ରୀ ନିଜର ଭାରତ ଗସ୍ତ ଋଦ୍ଦ କରିଥିବା ବେଳେ ଆଜି ଜାପାନ ପ୍ରଧାନମନ୍ତ୍ରୀ ସିଞ୍ଜୋ ଆବେ ଏହି ଧାରାରେ ସାମିଲ ହୋଇଛନ୍ତି । ଆସାମର ରାଜଧାନୀ ଗୌହାଟୀରେ ଭାରତ ଏବଂ ଜାପାନ ପ୍ରଧାନମନ୍ତ୍ରୀଙ୍କ ମଧ୍ୟରେ ଏକ ସମ୍ମିଳନୀ ଆୟୋଜିତ ହେବାର କାର୍ଯ୍ୟକ୍ରମ ରହିଥିଲା । ମାତ୍ର ନାଗରିକତ୍ବ ସଂଶୋଧନ ବିଲ୍‌କୁ ବିରୋଧ କରି ଆସାମ, ତ୍ରିପୁରା ଏବଂ ମେଘାଳୟରେ ଆନ୍ଦୋଳନ ଚାଲି ରହିଥିବାରୁ ଏହି ସମ୍ମିଳନୀ ହେବା ନେଇ ଆଶଙ୍କା ଦେଖା ଦେଇଛି । ରବିବାର ଜାପାନ ପ୍ରଧାନମନ୍ତ୍ରୀ ସିଞ୍ଜୋ ଆବେ ରବିବାର ଭାରତ ଗସ୍ତରେ ଆସିବାର ଥିଲା ମାତ୍ର ବର୍ତ୍ତମାନ ଆବେ ଭାରତ ଗସ୍ତ ଋଦ୍ଦ କରିବାର ଯୋଜନା କରୁଛନ୍ତି ବୋଲି ଜାପାନ ପକ୍ଷରୁ ପ୍ରକାଶ କରାଯାଇଛି । ଜାପାନ ପ୍ରଧାନନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏନେଇ କୌଣସି ସୂଚନା ମିଳି ନାହିଁ ବୋଲି ବୈଦେଶିକ ମନ୍ତ୍ରାଳୟ ମୁଖପାତ୍ର ରବୀଶ କୁମାର ପ୍ରକାଶ କରିଛନ୍ତି ।

Categories
ଆଜିର ଖବର

ଆସାମରେ କର୍ଫ୍ୟୁ : ପରସ୍ଥିତି ନିୟନ୍ତ୍ରଣ ପାଇଁ ଆସାମ ଓ ତ୍ରିପୁରାରେ 8 କମ୍ପାନୀ ସେନା ମୁତୟନ

ନୂଆଦିଲ୍ଲୀ, 12/12 : ନାଗରିକତ୍ବ ସଂଶୋଧନ ବିଲ୍‌କୁ ନେଇ ଉତ୍ତର ପୂର୍ବୀୟ ରାଜ୍ୟ ଗୁଡିକରେ ଆନ୍ଦୋଳନ ଚାଲିଥିବା ବେଳେ ଗତକାଲି ଠାରୁ ଆସାମରେ କର୍ଫ୍ୟୁ ଜାରି କରାଯାଇଛି । ଗତକାଲି ଠାରୁ ରାଜ୍ୟରେ ଇଣ୍ଟରନେଟ ଏବଂ ମୋବାଇଲ ସେବା ବନ୍ଦ କରାଯାଇଥିବା ବେଳେ ଗୁରୁବାର 8 କମ୍ପାନୀ ଯବାନଙ୍କୁ ମୁତୟନ କରାଯାଇଛି । ନାଗରିକତ୍ବ ବିଲ ସଂଶୋଧନକୁ ନେଇ ସମ୍ପୂର୍ଣ୍ଣ ଆସାମରେ ଆନ୍ଦୋଳନ ଚାଲିଥିବା ବେଳେ 70ରୁ ଅଧିକ ଟ୍ରେନ୍‌ ଏବଂ 30ରୁ ଅଧିକ ବିମାନ ଚଳାଚଳ ବାତିଲ କରାଯାଇଛି । ଆସାମ ସମେତ ତ୍ରିପୁରାରେ ମଧ୍ୟ 3 କମ୍ପାନୀ ଯବାନ ମୁତୟନ କରାଯାଇଛି । ଆସାମରେ ଶାନ୍ତି ବଜାୟ ରଖିବା ପାଇଁ ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନଓ୍ବାଲ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶାନ୍ତି ବଜାୟ ରଖିବା ପାଇଁ ନିବେଦନ କରିଛନ୍ତି ।(ଏଜେନ୍ସୀ)

Categories
ବିଶେଷ ଖବର

ସେପଟେ ଆସାମ, ତ୍ରିପୁରା ଜଳୁଛି, ହେଲେ ସଂସଦରେ ଚାଲିଛି ପ୍ରବଳ ଉତ୍ସାହର ଭାଷଣ

କେଦାର ମିଶ୍ର

ଯେମିତି କାଶ୍ମୀରକୁ ବାକି ଭାରତ ଠାରୁ ସଂପୂର୍ଣ୍ଣ ବିଚ୍ଛିନ୍ନ କରିଦେଇ ସଂସଦରେ ଧାରା ୩୭୦ ଉଚ୍ଛେଦ କରାଗଲା, ନାଗରିକତା ସଂଶୋଧନ ବିଲ ଗୃହୀତ ହେଲା ବେଳକୁ ମଧ୍ୟ ଉତ୍ତର ପୂର୍ବ ରାଜ୍ୟ ଗୁଡିକରେ ସେଇ ସମାନ ପରିସ୍ଥିତି ସୃଷ୍ଟି ହେଲା। ଆଜି ଆସାମ, ତ୍ରିପୁରା, ମଣିପୁର, ମେଘାଳୟ ସମେତ ଅନ୍ୟାନ୍ୟ ଉତ୍ତର ପୂର୍ବ ରାଜ୍ୟ ଗୁଡିକରେ ନିଆଁ ଜଳୁଛି। ଅନେକ ସହରରେ କର୍ଫ୍ୟୁ ଜାରି ହୋଇଥିବା ବେଳେ ପ୍ରାୟ ସବୁ ସହରରେ ସେନାବାହିନୀ ସଜାଗ ରହିଛନ୍ତି। ଅନେକ ଅଞ୍ଚଳରେ ଇଣ୍ଟରନେଟ ଓ ଫୋନ ସେବା ବନ୍ଦ କରି ଦିଆଯାଇଛି।  ସବୁ ଉତ୍ତର ପୂର୍ବ ରାଜ୍ୟ ଗୁଡିକ ନାଗରିକତା ସଂଶୋଧନ ବିଲକୁ ବିରୋଧ କରୁଛନ୍ତି। ଖୋଦ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ ମଧ୍ୟ ଏହି ବିଲି ଗୃହୀତ ନ କରାଇବାକୁ ଅନୁରୋଧ କରିଥିଲେ। ବିଜେପିର ସ୍ଥାନୀୟ ସଂଗଠନ ଗୁଡିକ ଏହି ବିଲ ବିରୋଧରେ ପ୍ରବଳ ଜନ ଅସନ୍ତୋଷ ସୃଷ୍ଟି ହେବ ବୋଲି ବିଜେପି ନେତୃତ୍ବକୁ ସତର୍କ କରାଇ ଦେଇଥିଲେ। ତା ସତ୍ତ୍ୱେ ଏହି ବିଲକୁ ଗୃହୀତ କରାଇ ନେବାକୁ  ଗୃହମନ୍ତ୍ରୀ ଅମିତ ଶାହ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏତେ ତତ୍ପରତା ପ୍ରକାଶ କରିବାର କାରଣ କଣ?

କାଶ୍ମୀର ଭଳି ଉତ୍ତର ପୂର୍ବ ରାଜ୍ୟ ଗୁଡିକ ମଧ୍ୟ ଆଗାମୀ ଦିନରେ ବିଚ୍ଛିନ୍ନାଞ୍ଚଳ ହୋଇ ରହିବାର ସମ୍ଭାବନା ରହିଛି କି? ସଂସଦୀୟ ଗଣତନ୍ତ୍ରରେ ସଂଖ୍ୟା ଦୃଷ୍ଟିରୁ ଯେଉଁ ରାଜ୍ୟ ମାନଙ୍କର ପ୍ରତିନିଧିତ୍ଵ ଦୁର୍ବଳ ସେମାନଙ୍କ ଉପରେ ସଂଖ୍ୟା ଗରିଷ୍ଠତାର ଅହଂକାର ଦେଖାଇ ଜୁଲମ କରା ଯାଉନାହିଁ କି? ଉତ୍ତର ପୂର୍ବ ସ୍ଥିତ ଆସାମ, ମେଘାଳୟ, ଅରୁଣାଚଳ ପ୍ରଦେଶ, ମିଜୋରାମ, ନାଗାଲାଣ୍ଡ, ମଣିପୁର, ତ୍ରିପୁରା, ମେଘାଳୟ ଓ ସିକିମ- ଏହି ୯ ଟି ରାଜ୍ୟର ମୋଟ ଲୋକସଭା ସଦସ୍ୟଙ୍କ ସଂଖ୍ୟା ମାତ୍ର ୨୭। ତାରି ଭିତରୁ କେବଳ ଆସାମରେ ଅଛନ୍ତି ୧୪ ଜଣ ଲୋକସଭା ସଦସ୍ୟ। ସଂଖ୍ୟା ଦୃଷ୍ଟିରୁ ଜାମ୍ମୁ କାଶ୍ମୀରର ଯେମିତି କୌଣସି ବିଶେଷ ପ୍ରଭାବ ନଥିଲା, ସେମିତି ଉତ୍ତର ପୂର୍ବ ରାଜ୍ୟ ଗୁଡିକର ମଧ୍ୟ କୌଣସି ପ୍ରଭାବ ନାହିଁ। ଯଦି ଏ ପ୍ରକାର ପ୍ରତିବାଦ ଉତ୍ତର ପ୍ରଦେଶ, ଗୁଜରାଟ, ତାମିଲନାଡୁ, କର୍ଣ୍ଣାଟକ ବା ବିହାରରେ ହୋଇଥାନ୍ତା, ତାହେଲେ ଲୋକମତକୁ ଉପେକ୍ଷା କରି ସରକାର ଏ ପ୍ରକାର ଆଇନ ପ୍ରଣୟନ କରିବାକୁ ସାହସ କରି ନଥାନ୍ତେ।

ଲୋକେ ପ୍ରତିବାଦ କରୁଥିବା ବେଳେ ଶାସକ ଦଳ ସେଇ ପ୍ରତିବାଦକୁ ଉପେକ୍ଷା କରି ନିଜ ମତକୁ ଲୋକଙ୍କ ଉପରେ ଚାପି ଦେବାର ଉଦ୍ୟମ କରୁଛନ୍ତି। ଏହାର ପରିଣତି ଆଗକୁ ଆହୁରି ଭୟଙ୍କର ହେବାର ସମ୍ଭାବନାକୁ ଆଡେଇ ଦିଆ ଯାଇ ନପାରେ। ଏହି ବିଲ ସହିତ ଧର୍ମ ଏକ ମୌଳିକ ଆଧାର ବାବେ ସଂଯୁକ୍ତ ହୋଇଥିବାରୁ ବିଦେଶନୀତି ଉପରେ ମଧ୍ୟ ଏହାର ପ୍ରଭାବ ପଡିବ। ଆଗାମୀ ଦିନରେ ବହୁ ବିଦେଶୀ ରାଷ୍ଟ୍ର ଏହାକୁ ନେଇ ପ୍ରତିବାଦ କରିବେ। ବାଂଲାଦେଶ ଯିଏକି ଭାରତର ଅତ୍ୟନ୍ତ ଘନିଷ୍ଠ ସହଯୋଗୀ ରହି ଆସିଛି, ତାକୁ ଏକ ହିନ୍ଦୁ ବିଦ୍ଵେଷୀ ରାଷ୍ଟ୍ର ବୋଲି ବିଜେପି ତରଫରୁ ପ୍ରଚାର କରା ଯାଉଛି। ଗୋଟେ ପକ୍ଷରେ ବାଂଲାଦେଶ ସହିତ ଆମ ସମ୍ପର୍କ ଅତ୍ୟନ୍ତ ମଧୁର ବୋଲି କୁହା ଯାଉଥିବା ବେଳେ ଘରୋଇ ରାଜନୀତିରେ ବାଂଲାଦେଶକୁ ନିୟମିତ ବିରୋଧ କରାଯାଉଛି। ଏ ପ୍ରକାର ଦୋ ମୁହାଁ ନୀତିର ପରିଣତି ସାଂଘାତିକ ହୋଇପାରେ।

ସଂସଦରେ ଏହି ବିଲର ଆଲୋଚନା ସମୟରେ ଅମିତ ଶାହ ତାଙ୍କର ଚିରାଚରିତ ଘୋଷାପାଠ ଦୋହରାଇଛନ୍ତି। ସବୁ କଥା ପାଇଁ କଂଗ୍ରେସକୁ ଗାଳି କରି ଖସିଯିବାର ସହଜ ବାଟ ଛଡା ବିଜେପିକୁ ଅଧିକ କିଛି ଦେଖା ଯାଉନି। ଗୋଟେ ବିଲ ବିରୋଧରେ ୯ ଟି ରାଜ୍ୟର କ୍ରୋଧ ଓ ପ୍ରତିବାଦ ପାଇଁ କେବଳ କଂଗ୍ରେସକୁ ଦାୟୀ କରିବାର କୌଣସି ଯୁକ୍ତି ନାହିଁ। ଉତ୍ତର ପୂର୍ବ ରାଜ୍ୟ ଗୁଡିକରେ ଅନେକ ଜାଗାରେ ବିଜେପି ସରକାର ରହିଛି ଓ ସମ୍ପୃକ୍ତ ରାଜ୍ୟ ସରକାର ଗୁଡିକ କେନ୍ଦ୍ର ସରକାର ବିରୋଧରେ କିଛି କହି ପାରୁନାହାନ୍ତି। ତଥାପି ଉତ୍ତର ପୂର୍ବ ରାଜ୍ୟର ମୁଖ୍ୟମନ୍ତ୍ରୀମାନେ ବିଭିନ୍ନ ସମୟରେ ଏହି ବିଲ ବିରୋଧରେ ନିଜର ସ୍ପଷ୍ଟ ମତ ଦେଇଛନ୍ତି। ହେଲେ ସେମାନଙ୍କ କଥା ଶୁଣିବ କିଏ?

ଛୋଟିଆ ରାଜ୍ୟ ଗୁଡିକ ଲୋକସଭା ଓ ରାଜ୍ୟସଭାରେ ସଙ୍ଖ୍ୟାବଳରେ ସବୁବେଳେ ଦୁର୍ବଳ ରହିବେ। ଏହାର ଅର୍ଥ କଣ ସେମାନଙ୍କ ମତ ଓ ପ୍ରତିବାଦର କିଛି ମୂଲ୍ୟ ନାହିଁ? ସଙ୍ଘିୟ ବ୍ୟବସ୍ଥାରେ ସବୁ ରାଜ୍ୟର ନିଜସ୍ଵ ଅଧିକାର ରହିଛି। ଉତ୍ତର ପୂର୍ବ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ପରାମର୍ଶ ଓ ଅନୁରୋଧକୁ ଉପେକ୍ଷା କରି କେନ୍ଦ୍ର ସରକାର ସମ୍ବିଧାନ ବିରୋଧୀ ଆଭିମୁଖ୍ୟ ପୋଷଣ କରୁଛନ୍ତି।

ନିଜ ରାଜ୍ୟର ସ୍ଵାର୍ଥ ପାଇଁ କାମ କରୁଛୁ ବୋଲି ଡିଣ୍ଡିମ ପିଟୁଥିବା ହେଲେ କାଶ୍ମୀର ଓ ଉତ୍ତର ପୂର୍ବ ରାଜ୍ୟର କ୍ଷମତା ସଙ୍କୁଚିତ କରୁଥିବା ଆଇନକୁ ସମାର୍ଥନ ଦେଉଥିବା ବିଜୁ ଜନତା ଦଳ ଗୁଡିକ କଦାପି ଏହି ଭ୍ରମରେ ରୁହନ୍ତୁ ନାହିଁ ଯେ, ବିଜେପିକୁ ସମର୍ଥନ କରି ସେମାନେ ସୁରକ୍ଷିତ ରହିବେ। କେନ୍ଦ୍ର ସରକାର ନିଜ ହାତରେ ସବୁ କ୍ଷମତା ଠୁଳ କରିବା ଲାଗି ଗୋଟାଏ ପରେ ଗୋଟେ ସଙ୍ଘିୟ ବ୍ୟବସ୍ଥାକୁ ଉଚ୍ଛେଦ କରି ଚାଲୁଛନ୍ତି ଓ  ଚାଳିବେ ମଧ୍ୟ। କାଲି କାଶ୍ମୀର ଥିଲା, ଆଜି ଉତ୍ତର ପୂର୍ବ ରାଜ୍ୟ ଗୁଡିକ ସେହି ଦୁର୍ଦ୍ଦଶା ଭୋଗୁଛନ୍ତି, ଆସନ୍ତା କାଲୀ ବିହାର କି ଓଡିଶା ଯେ ସେ ଦୁର୍ଦ୍ଦଶା ନ ଭୋଗିବେ, ତାହା ବିଲକୁଲ କହିହେବା ନାହିଁ!!

Categories
ବିଶେଷ ଖବର

ଆସାମରେ ଚୂଡାନ୍ତ ଜାତୀୟ ନାଗରିକ ରେକର୍ଡ ପ୍ରକାଶ ପାଇଲା ପରେ ୧୯ ଲକ୍ଷ “ଦେଶ ନଥିବା ଲୋକେ” ଏବେ କରିବେ କଣ?

କେଦାର ମିଶ୍ର

ଗତକାଲି ଆସାମରେ ପ୍ରବଳ ବର୍ଷା ସତ୍ତ୍ୱେ ଲୋକେ କମ୍ପ୍ୟୁଟର କେନ୍ଦ୍ର ଆଗରେ ଲମ୍ବା ଧାଡିରେ ଠିଆ ହୋଇଥିଲେ। ସେମାନଙ୍କ ଲାଗି ଗତ କାଲୀ ଥିଲା ଜୀବନ ଓ ମରଣର ନିର୍ଣ୍ଣାୟକ ଦିନ। ସୁପ୍ରିମ କୋର୍ଟଙ୍କ ନିର୍ଦ୍ଦେଶ କ୍ରମେ ଆସାମର ଜାତୀୟ ନାଗରିକ ରେକର୍ଡର ଚୂଡାନ୍ତ ତାଲିକା ଗତକାଲି ପ୍ରକାଶ ପାଇଛି। ମୋଟ ୩.୩ କୋଟି ଆସାମ ବାସିନ୍ଦାଙ୍କ ଭିତରୁ ୩.୧୧ କୋଟି ଲୋକଙ୍କ ଭାରତୀୟ ନାଗରିକତା ବୈଧ ବୋଲି ଘୋଷଣା କରା ଯାଇଥିବା ବେଳେ ୧୯.୦୬ ଲକ୍ଷ ଲୋକଙ୍କୁ ଏହି ରେକର୍ଡରୁ ବାଦ ଦିଆଯାଇଛି। ୩୦, ଜୁନ, ୨୦୧୮ ରେ ଯେତେବେଳେ ଏନଆରସିର ଚିଠା ତାଲିକା ପ୍ରକାଶ ପାଇଥିଲା ସେଥିରେ ପ୍ରାୟ ୪୧ ଲକ୍ଷ ଲୋକଙ୍କ ନାଗରିକତା ଉପରେ ପ୍ରଶ୍ନଚିହ୍ନ ଲଗା ଯାଇଥିଲା। ତେବେ ଆଇନଗତ ପ୍ରକ୍ରିୟା ଦେଇ ପ୍ରାୟ ୨୧ ଲକ୍ଷ ଲୋକ ନିଜର ନାଗରିକତା ପ୍ରମାଣପତ୍ର ଦାଖଲ କରି ପାରିଛନ୍ତି।

ଏବେ ଏ ଯେଉଁ ୧୯.୦୬ ଲକ୍ଷ ଲୋକଙ୍କ ତାଲିକା ପ୍ରକାଶ ପାଇଛି, ସେଥିରେ ସଂଖ୍ୟାଧିକ ଭାରତୀୟ ନାଗରିକ ଥାଇପାରନ୍ତି ବୋଲି କୁହାଯାଉଛି। ତାହାର କାରଣ ହେଉଛି, ଅନେକ ସ୍ଥାନରେ ପରିବାରର ବାପା ରେକର୍ଡରେ ସ୍ଥାନ ପାଇଥିବା ବେଳେ ମା ଙ୍କ ନାମ ସ୍ଥାନିତ ହୋଇନାହିଁ। କୁଲସୁନା ଖାତୁନଙ୍କ ପରିବାରରେ ତାଙ୍କ ବାପା ଭାରତୀୟ ନାଗରିକ ଭାବେ ସ୍ଵୀକୃତି ପାଇଥିବା ବେଳେ ମା ଏବେ ଦେଶହୀନ ଅବସ୍ଥାରେ ଅଛନ୍ତି। ସେହିପରି କୁଲସୁନାଙ୍କ ନାମ ତାଲିକାରେ ନଥିବା ବେଳେ ତାଙ୍କ ସାନ ଭଉଣୀର ନାମ ପ୍ରକାଶ ପାଇଛି। ଅର୍ଥାତ ପରିବାରର ଅଧା ଭାରତୀୟ ନାଗରିକ ଓ ଅଧାଙ୍କ ଭାଗ୍ୟ ଏବେ ଖଣ୍ଡାଧାରରେ। କାମରୂପ ଜିଲ୍ଲାର ଟୁକଡାପାଡା ଗାଁ ରେ ଅବଦୁଲ ହାଲିମ ମଜୁମଦାର ଓ ମଇନୁଲ ହକଙ୍କ ପରିବାରର ଅବସ୍ଥା ମଧ୍ୟ ସେୟା। ଏନଆରସି ତାଲିକା ହଜାର ହଜାର ପରିବାର ଭିତରେ ବିଚିତ୍ର ବିଭାଜନ ସୃଷ୍ଟି କରିଛି।

ଏହି ତାଲିକାରେ ବରିଷ୍ଠ ସେନାଧିକାରୀ ମହମ୍ମଦ ସାନାଉଲ୍ଲାଙ୍କ ନାମ ମଧ୍ୟ ପ୍ରକାଶ ପାଇନାହିଁ।  ୩୦ ବର୍ଷ ଧରି ସେନାବାହିନୀରେ ଦେଶ ଲାଗି କାମ କରିଥିବା ସାନାଉଲ୍ଲା ଆଜି ନିଜର ନାଗରିକତାରୁ ବଞ୍ଚିତ ହୋଇଛନ୍ତି। ସବୁଠୁ ଦୁର୍ଭାଗ୍ୟର ଘଟନା ଘଟିଛି ସରବବାଲା ସରକାରଙ୍କ ଜୀବନରେ। ଆସାମରୁ ଅଣ ଭାରତୀୟଙ୍କୁ ବିଦା କରିବା ଲାଗି ଅଶି ଦଶକରେ ଯେଉଁ ବିରାଟ ଛାତ୍ର ଆନ୍ଦୋଳନ ହୋଇଥିଲା ସେଥିରେ ସରବବାଲାଙ୍କ ପତି ମଦନ ମଲ୍ଲିକ ପ୍ରାଣ ହରାଇଥିଲେ। ଆସାମ ସରକାର ମଦନ ମଲ୍ଲିକଙ୍କୁ ଆସାମର ସହିଦ ବୋଲି ସ୍ଵୀକୃତି ଦେବା ସହିତ ତାଙ୍କ ପରିବାରକୁ ସମ୍ବର୍ଦ୍ଧିତ ମଧ୍ୟ କରିଛନ୍ତି। ହେଲେ ନାଗରିକ ରେକର୍ଡରେ ଆଜି ସରବବାଲା ସରକାରଙ୍କ ନାଁ ନାହିଁ।

ତେବେ ୪୧ ଲକ୍ଷ ରୁ “ବିଦେଶୀ” ତାଲିକା ୧୯ ଲକ୍ଷ କୁ ଖସିଲା ପରେ ମଧ୍ୟ ଆଶା କରାଯାଉଛି, ଏଥିରୁ ଆହୁରି ୧୦ ଲକ୍ଷ ଲୋକ ନିଜର ନାଗରିକତା ପ୍ରମାଣ କରିପାରିବେ। ହୁଏତ ମାତ୍ର ୮/୯ ଲକ୍ଷ ଲୋକ ଚୂଡାନ୍ତ ତାଲିକାରୁ ବାଦ ପଡି ପାରନ୍ତି। ଆଗାମୀ ଦିନରେ ଏହି ରେକର୍ଡରେ ନାଁ ନଥିବା ଲୋକେ “ଫରେନର ଟ୍ରିବ୍ୟୁନାଲ” ଓ ହାଇ କୋର୍ଟରେ ଅପିଲ କରିପାରିବେ। ତେଣୁ ଆସାମରେ ୫୦ଲକ୍ଷରୁ କୋଟିଏ ପାଖାପାଖି ବାଂଲାଦେଶୀ ମୁସଲମାନ ଅଛନ୍ତି ବୋଲି ପ୍ରଚାର କରୁଥିବା ଭାରତୀୟ ଜନତା ପାର୍ଟି ଲାଗି ଏହି ତାଲିକା ଏବେ ମୁଣ୍ଡ ବିନ୍ଧାର କାରଣ ହୋଇଛି। ରେକର୍ଡରେ ନାଁ ନଥିବା ଲୋକଙ୍କ ଭିତରେ ସଂଖ୍ୟାଧିକ ବାଂଲାଦେଶୀ ହିନ୍ଦୁ ମଧ୍ୟ ରହିଛନ୍ତି। ଏହା ବିଜେପି ଲାଗି ସବୁଠୁ ବଡ ସଙ୍କଟ ପାଲଟି ଯାଇଛି।

ଆଜି ପର୍ୟନ୍ତ ଏନଆରସି କୁ ସବୁ ପ୍ରକାର ସମର୍ଥନ ଦେଇ ଆସୁଥିବା ବିଜେପି ଏହାକୁ ଆଜି ପ୍ରବଳ ବିରୋଧ କରିଛି। ସାରା ଦେଶରେ ଏନଆରସି ଲାଗୁ  କରିବାର ଅଯଥାର୍ଥ ଦାବି ମାଧ୍ୟମରେ ବିଜେପି ଏବେ ନିଜର ବିଭାଜନକାରୀ ଏଜେଣ୍ଡାକୁ ବିଶେଷ ଭାବରେ ଆଗକୁ ନେବାର ଉଦ୍ୟମ କରୁଛି। ଏନଆରସି ଡାଟା ରୁ ଆସାମରେ ବିଜେପିକୁ ଲାଭ ତୁଳନାରେ କ୍ଷତି ଅଧିକ ମିଳିଛି। ତେଣୁ ପରିସ୍ଥିତିକୁ ଅଧିକ ଗୋଳିଆ କରିବାକୁ ଏବେ ବିଜେପି ଆସାମ ସମେତ ଉତ୍ତର ପୂର୍ବ ରାଜ୍ୟ ଗୁଡିକରେ ଉଦ୍ୟମ କରିବ।

ନାଗରିକତାକୁ ନେଇ ରାଜନୀତି ଆଗକୁ କଣ ହେବ ତାହା ତ ଭିନ୍ନ କଥା, ହେଲେ ଯେଉଁ ୧୯ ଲକ୍ଷ ଲୋକ ଆଜି “ଦେଶହୀନ’ ଅବସ୍ଥାରେ ଅଛନ୍ତି, ସେମାନେ କରିବେ କଣ? ବାଂଲା ଦେଶ ସେମାନଙ୍କୁ ଫେରାଇନେବାକୁ ସ୍ପଷ୍ଟ ଭାବରେ ମନା କରି ଦେଇଛି। ଭାରତର ବୈଦେଶିକ ବ୍ୟାପାର ବିଭାଗର ମନ୍ତ୍ରୀ ଏ ସମ୍ପର୍କରେ ବାଂଲାଦେଶକୁ ଦୃଢ ପ୍ରତିଶ୍ରୁତି ଦେଇଛନ୍ତି।ସେହି ପୃଷ୍ଠଭୂମିରେ ଏହି ଦେଶ ନଥିବା ଲୋକେ କରିବେ କଣ? ସେମାନଙ୍କୁ ଗିରଫ କରି ଭାରତ ସରକାର ସାରା ଜୀବନ ରଖିବେ କି? ୨୪ ମାର୍ଚ୍ଚ ୧୯୭୧ ପୂର୍ବରୁ ଭାରତ ଆସିଥିବା ସବୁ ବିଦେଶୀ ନାଗରିକଙ୍କୁ ଭାରତୀୟ ଭାବରେ ଗଣନା କରାଯିବ ବୋଲି ଯାହା କୁହା ଯାଇଛି, ସେଥିରେ ପରବର୍ତ୍ତୀ ପିଢୀକୁ ନେଇ ଅନେକ ସନ୍ଦେହ ରହିଛି। ଆସନ୍ତା ଅନେକ ବର୍ଷ ଧରି ଏହି ୧୯ ଲକ୍ଷ ଲୋକଙ୍କୁ ଆଇନଗତ ଲଢେଇ ଲଢିବାକୁ ପଡିବ। ସେତେଦିନ ଯାଏ ସେମାନଙ୍କର ନାଗରିକ ଅଧିକାର ର ସୁରକ୍ଷା କରିବା କିଏ??

Categories
ଆଜିର ଖବର

ପଞ୍ଚାୟତ ପ୍ରମୁଖଙ୍କ ବୟସ ସୀମା ପରିବର୍ତ୍ତନ କଲେ ଆସାମ ସରକାର

ଆସାମ ସରକାର ପଞ୍ଚାୟତ ମୁଖ୍ୟ ତଥା ସରପଞ୍ଚ ହେବା ପାଇଁ ନିମ୍ନତମ ବୟସ ସୀମା ପରିବର୍ତ୍ତନ କରିଛନ୍ତି। ବୟସ ସୀମା ୩୫ ବର୍ଷରୁ ୨୫ ବର୍ଷକୁ ଖସାଇ ଦେଇଛନ୍ତି। ମୁଖ୍ୟମନ୍ତ୍ରୀ କାର୍ଯ୍ୟାଳୟ ତରଫରୁ ଜାରି ଏକ ବିଜ୍ଞପ୍ତିରେ ସୋମବାର ଦିନ ହୋଇଥିବା ମନ୍ତ୍ରିମଣ୍ଡଳର ବୈଠକ ଏହି ସମ୍ବନ୍ଧୀୟ ନିଷ୍ପତ୍ତି ନିଆଯାଇଛି। ରାଜ୍ୟ ସରକାରଙ୍କ ତରଫରୁ ଜାରି କରାଯାଥିବା ଏହି ବିଜ୍ଞପ୍ତିରେ ଏହି ପଦବୀ ପାଇଁ ୨ଟି ସନ୍ତାନ ନିୟମକୁ ଅପରିବର୍ତ୍ତିତ ରଖିଛନ୍ତି। ରାଜ୍ୟ ବାହାରେ କାର୍ଯ୍ୟ କରୁଥିବା ଯୁବକଙ୍କ ହିତ ତଥା ସୁରକ୍ଷିତ କରିବା ପାଇଁ ଏକ ନୂଆ କାନୁନ୍‌ ଆଣିବାର ନିୟମ କରିଛନ୍ତି। ବିଜ୍ଞପ୍ତିରେ ସାମୁଦ୍ରିକ ଭୂମି ଅତିକ୍ରମଣରୁ ମୁକ୍ତ ଅଭିଯାନ ପାଇଁ ଗୌହ୍ବାଟୀ କୋର୍ଟଙ୍କ ଆଦେଶ ନୁହେଁ ବରଂ ସଂଶୋଧିତ ଆସାମ ଭୂମି ରାଜସ୍ବ ବିନିୟମ ଅଧିନିୟମ ୧୯୮୬ ଅନୁସାରେ ବିହିତ ପଦକ୍ଷେପ ନିଆଯିବ।

Categories
ଆଜିର ଖବର

୧୩ ଯାତ୍ରୀଙ୍କୁ ନେଇ ଯାଉଥିବା ବିମାନ ନିଖୋଜ

ଆସାମର ଜୋରହାଟରୁ ଛାଡିଥିବା ଏକ ବିମାନ ନିଖୋଜ ହୋଇଯାଇଛି। ଅରୁଣାଚଳ ପ୍ରଦେଶ ଅଭିମୁଖେ ଯାତ୍ରା କରୁଥିବା ଏହି ବିମାନରେ ୧୩ ଜଣ ଯାତ୍ରୀ ରହିଥିଲେ। ନିଖୋଜଙ୍କ ମଧ୍ୟରେ ୮ ଜଣ ବିମାନ କର୍ମଚାରୀ ରହିଥିବା ବେଳେ ୫ ଜଣ ଯାତ୍ରୀ ରହିଥିଲେ। ସୋମବାର ସକାଳୁ ବିମାନଟି ଆସାମର ଜୋରହାଟରୁ ଛାଡିଥିଲା ଏବଂ ୧୨.୨୫ରେ ଏହା ଅରୁଣାଚଳ ପ୍ରଦେଶର ମେଚୁକା ବିମାନବନ୍ଦରରେ ପହଞ୍ଚିବାର ଥିଲା। ଆଣ୍ଟୋନୋଭ ଏନ୍‌ ୩୨ର ଏହି ବିମାନଟି ସହିତ ଦିନ ୧ଟା ପରଠାରୁ ସମ୍ପର୍କ ସ୍ଥାପନ ହୋଇପାରିନଥିଲା। ଭାରତୀୟ ବାୟୁସେନା ପକ୍ଷରୁ ବିମାନଟିକୁ ଖୋଜିବା ନିମନ୍ତେ ସର୍ଚ୍ଚ ଅପରେସନ୍‌ ଜାରି କରାଯାଇଛି। ଋଷୀୟ ବୈଷୟିକ କୌଶଳରେ ନିର୍ମିତ ଏହି ବିମାନଟି ଭାରତୀୟ ବାୟୁସେନା ପକ୍ଷରୁ ବିଗତ ୪ ଦଶନ୍ଧି ଧରି ବ୍ୟବହାର କରାଯାଉଛି।