ନୂଆଦିଲ୍ଲୀ: ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ସରମା ଶୁକ୍ରବାର ଦିନ ଦାବି କରିଛନ୍ତି ଯେ, ତାଙ୍କ ରାଜ୍ୟରେ ମୁସଲମାନ ଜନସଂଖ୍ୟା ପ୍ରତି ୧୦ ବର୍ଷରେ ପ୍ରାୟ ୩୦ ପ୍ରତିଶତ ବୃଦ୍ଧି ପାଉଛି ଏବଂ ସେମାନେ ୨୦୪୧ ସୁଦ୍ଧା ସଂଖ୍ୟାଗରିଷ୍ଠ ହେବେ। ସେ କହିଛନ୍ତି ଯେ, ପ୍ରତି ୧୦ ବର୍ଷରେ ମୁସଲମାନମାନଙ୍କର ଜନସଂଖ୍ୟା ୧୧ ଲକ୍ଷ ବୃଦ୍ଧି ପାଇଥାଏ। ଏଥି ସହିତ ହିନ୍ଦୁ ସମ୍ପ୍ରଦାୟର ଜନସଂଖ୍ୟା ମାତ୍ର ୧୬ ପ୍ରତିଶତ ବୃଦ୍ଧି ପାଉଛି।
ମୁଖ୍ୟମନ୍ତ୍ରୀ ସରମା କହିଛନ୍ତି ଯେ, “୨୦୧୧ ରେ ଆସାମରେ ୧.୪ କୋଟି ମୁସଲମାନ ଥିଲେ। ୨୦୪୧ ସୁଦ୍ଧା ଆସାମ ମୁସଲମାନ ସଂଖ୍ୟାଗରିଷ୍ଠ ରାଜ୍ୟରେ ପରିଣତ ହେବ। ଏହା ଏକ ବାସ୍ତବତା ଏବଂ ଏହାକୁ କେହି ରୋକି ପାରିବେ ନାହିଁ।”
ସିଏମ୍ ସରମାଙ୍କ ଆକଳନରେ କେତେ ସତ୍ୟ ଅଛି?:
ଗଣମାଧ୍ୟମ ଅନୁଯାୟୀ, ୨୦୧୧ ଜନଗଣନା ଅନୁଯାୟୀ ଆସାମରେ ମୋଟ ମୁସଲମାନ ଜନସଂଖ୍ୟା ୧.୦୭ କୋଟି ଥିଲା, ଯାହା ସମୁଦାୟ ୩.୧୨ କୋଟି ବାସିନ୍ଦାଙ୍କ ୩୪.୨୨ ପ୍ରତିଶତ ଥିଲା। ରାଜ୍ୟରେ ୧.୯୨ କୋଟି ହିନ୍ଦୁ ଥିଲେ, ଯାହା ସମୁଦାୟ ଜନସଂଖ୍ୟାର ପ୍ରାୟ ୬୧.୪୭ ପ୍ରତିଶତ ଥିଲା।
ଆସାମ ସିଏମ କହିଛନ୍ତି ଯେ, ତାଙ୍କ ସରକାର ମୁସଲମାନ ସମ୍ପ୍ରଦାୟର ଜନସଂଖ୍ୟା ବୃଦ୍ଧି ପାଇଁ ପଦକ୍ଷେପ ନେଇଛନ୍ତି। ମୁଖ୍ୟମନ୍ତ୍ରୀ କହିଛନ୍ତି ଯେ, “ଅନେକ ଲୋକ ମଧ୍ୟ ଆମକୁ ସାହାଯ୍ୟ କରିଛନ୍ତି। ଯଦି ‘ନିଜୁତ ମୋଇନା’ ଯୋଜନା ସଫଳ ହୁଏ, ତେବେ ଝିଅମାନେ ଡାକ୍ତର ଏବଂ ଇଞ୍ଜିନିୟର ହେବେ। ତା’ପରେ ସେମାନେ (ସନ୍ତାନମାନଙ୍କୁ) ଜନ୍ମ ଦେବେ ନାହିଁ।”
ଏହି ଯୋଜନା ଅଧୀନରେ ଆସାମ ସରକାର ଆସନ୍ତା ପାଞ୍ଚ ବର୍ଷ ପାଇଁ ୧୧୦୦ ଟଙ୍କାରୁ ଆରମ୍ଭ କରି ସ୍ନାତକୋତ୍ତର ପର୍ଯ୍ୟନ୍ତ ଛାତ୍ରୀମାନଙ୍କୁ ମାସିକ ୨୫୦୦ ଟଙ୍କା ପର୍ଯ୍ୟନ୍ତ ସହାୟତା ପ୍ରଦାନ କରୁଛନ୍ତି। ସେ କହିଛନ୍ତି ଯେ, ‘ଗତ ତିନି ବର୍ଷ ମଧ୍ୟରେ ଆମ ସରକାର ନେଇଥିବା ପଦକ୍ଷେପରୁ ଆମେ କିଛି ଫଳାଫଳ ପାଇବୁ, କିନ୍ତୁ ସମସ୍ୟା ବହୁତ ବଡ।’