କ୍ଷମତାକୁ ଆସିବା ପରେ ମୁଖ୍ୟମନ୍ତ୍ରୀ ବିଏସ୍ ୟେଦ୍ୟୁୟରପ୍ପା ଏବେ ଆକ୍ସନ ମୋଡ୍ରେ । ୟେଦ୍ୟୁରପ୍ପାଙ୍କ କର୍ଣ୍ଣାଟକ ସରକାର କନ୍ନଡ ଓ ସଂସ୍କୃତି ବିଭାଗ ଟିପୁ ସୁଲତାନଙ୍କ ଜୟନ୍ତୀ ପାଳନ ନ ହେବା ନେଇ ନିର୍ଦ୍ଦେଶ ଦେଇଛନ୍ତି। ବିଜେପି ବିଧାୟକ ବୋପାୟା ମୁଖ୍ୟମନ୍ତ୍ରୀ ୟେଦ୍ୟୁରପ୍ପାଙ୍କୁ ରାଜ୍ୟରେ ଟିପୁସୁଲତାନ ଜୟନ୍ତୀ ଉତ୍ସବ କରିବା ଉପରେ ରୋକ୍ ଲଗାଇବାକୁ ଦାବି କରିଥିଲେ । ଏହା ପୂର୍ବରୁ କର୍ଣ୍ଣାଟକରେ କଂଗ୍ରେସ-ଜେଡିଏସ୍ ସରକାର ଥିବା ସମୟରେ ଏହି ସମାରୋହ ବଡ଼ ଆଡମ୍ବର ସହକାରେ ପାଳନ ହୋଇଛି । ପୂର୍ବରୁ ରାଜ୍ୟରେ ଟିପୁ ସୁଲତାନ ଜୟନ୍ତୀ ପ୍ରସଙ୍ଗ ନେଇ ରାଜ୍ୟ ରାଜନୀତି ବେଶ୍ ଗରମ ରହିଛି । ବିଜେପି ସବୁବେଳେ ଏହି ପ୍ରସଙ୍ଗକୁ ବିରୋଧ କରି ଆସିଛି । ୧୮ଶ ଶତାବ୍ଦୀର ମୈସୁର ଶାସକ ଟିପୁ ସୁଲତାନଙ୍କ ଜୟନ୍ତୀ ପ୍ରତି ବର୍ଷ ନଭେମ୍ବର ୧୦କୁ ପାଳନ କରାଯାଇଥାଏ । କିନ୍ତୁ ରାଜ୍ୟରେ ବିଜେପି ସରକାର ଶାସନ କ୍ଷମତାକୁ ଆସିବା ପରେ ଏହି ମହୋତ୍ସବ ପାଳନ ନେଇ ରୋକ୍ ଲଗାଯାଇଛି ।
