ପଶ୍ଚିମବଙ୍ଗର ନୂତନ ରାଜ୍ୟପାଳ ଭାବେ ଜଗଦୀପ ଧନକର୍ ଆଜି ଶପଥ ନେଇଛନ୍ତି । ପୂର୍ବରୁ ଏଠାରେ କେଶରୀନାଥ ତ୍ରିପାଠୀ ରାଜ୍ୟପାଳ ରହିଥିଲେ । ରାଜଭବନରେ ଆୟୋଜିତ ଶପଥ ସମାରୋହରେ କଲିକତାର ଉଚ୍ଚ ନ୍ୟାୟାଳୟର ମୁଖ୍ୟ ନ୍ୟାୟଧୀଶ ଟିବିଏନ୍ ରାଧାକୃଷ୍ଣନ୍ ଜଗଦୀପଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଛନ୍ତି । ଏହି ସମାରୋହରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ତଥା ବିଧାନସଭାର ନେତା ତଥା ପ୍ରତିପକ୍ଷ ଓ କଂଗ୍ରେସ ନେତା ଅବଦୁଲ୍ ମନ୍ନାନଙ୍କ ସମେତ ବହୁ ବରିଷ୍ଠ ରାଜନେତା ଉପସ୍ଥିତ ରହିଥିଲେ । ଜଗଦୀପ୍ ରାଜ୍ୟର ୨୮ତମ ରାଜ୍ୟପାଳ ଭାବେ ଶପଥ ନେଇଛନ୍ତି । ଜଗଦୀପ୍ ଧନକର୍ ୧୯୭୭ ମସିହାରେ ରାଜସ୍ଥାନ ହାଇକୋର୍ଟରେ ଓକିଲାତି ଆରମ୍ଭ କରିଥିଲେ । ୩୫ ବର୍ଷ ବୟସରେ ରାଜସ୍ଥାନ ହାଇକୋର୍ଟରେ ବାର୍ ଆସୋସିଏସନ୍ର ଅଧ୍ୟକ୍ଷ ମଧ୍ୟ ହୋଇଥିଲା । ଜଗଦୀପ୍ ଧନକର୍ ନବମ ଲୋକସଭା ପାଇଁ ଝୁନ୍ଝୁନ୍ ସଂସଦୀୟ ଆସନରୁ ଜନତା ଦଳ ତରଫରୁ ବିଜୟୀ ହୋଇଥିଲା। ୧୯୯୩ ମସିହାରେ ଅଜମେରର କିଶନଗଡ଼ ବିଧାନସଭା କ୍ଷେତ୍ରରୁ କଂଗ୍ରେସର ଟିକେଟରେ ବିଧାୟକ ହୋଇଥିଲା । ୨୦୦୩ରେ ବସୁନ୍ଧରା ରାଜେଙ୍କ ପ୍ରଦେଶ ଅଧ୍ୟକ୍ଷ ହେବା ପରେ ସେ ବିଜେପିର ସଦସ୍ୟତା ଗ୍ରହଣ କରିଥିଲେ । ୟୁପି, ପଶ୍ଚିମବଙ୍ଗ, ତ୍ରିପୁରା, ମଧ୍ୟପ୍ରଦେଶ, ବିହାର, ନାଗାଲାଣ୍ଡ ଆଦି ରାଜ୍ୟରେ ନୂତନ ରାଜ୍ୟପାଳ ନିଯୁକ୍ତି କରାଯାଇଛି ।