ନୂଆଦିଲ୍ଲୀ: ୨୦୨୫ ଏସିଆ କପ୍ ଆରମ୍ଭ ହେବାକୁ ଆଉ ମାତ୍ର କିଛି ଦିନ ବାକି ଅଛି। ଏହି ଟୁର୍ଣ୍ଣାମେଣ୍ଟ ସେପ୍ଟେମ୍ବର ୯ ତାରିଖରୁ ଆରମ୍ଭ ହେବାକୁ ଯାଉଛି, ଯେଉଁଥିରେ ଏସିଆର ୮ ଟି ଦଳ ପରସ୍ପର ସହିତ ମୁହାଁମୁହିଁ ହେବେ। କିନ୍ତୁ ଏହି ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ଏକ ବଡ଼ ଅପଡେଟ୍ ଆସିଛି। ଏସିଆ କପରେ ହେବାକୁ ଥିବା ମ୍ୟାଚ୍ ଗୁଡ଼ିକର ସମୟରେ ଏକ ବଡ଼ ପରିବର୍ତ୍ତନ କରାଯାଇଛି। ଏହି ଟୁର୍ଣ୍ଣାମେଣ୍ଟ ସଂଯୁକ୍ତ ଆରବ ଏମିରେଟ୍ସ (UAE) ରେ ଆୟୋଜିତ ହେବାକୁ ଯାଉଛି। ଏହି ମ୍ୟାଚ୍ ଗୁଡ଼ିକ UAE ରେ ସନ୍ଧ୍ୟା ୬ ଟାରେ ଆରମ୍ଭ ହେବାର ଥିଲା। ଏହି ସ୍ଥାନରେ ଦିନ ସମୟରେ ଅତ୍ୟଧିକ ଗରମ ହେତୁ, ମ୍ୟାଚ୍ ର ସମୟ ବର୍ତ୍ତମାନ ଅଧ ଘଣ୍ଟା ବୃଦ୍ଧି କରି ସନ୍ଧ୍ୟା ୬:୩୦ କରାଯାଇଛି।
ଭାରତରେ ମ୍ୟାଚ୍ ଗୁଡ଼ିକର ସମୟ କେତେ?:
ଏଥର ଏସିଆ କପ୍ ଟି-୨୦ ଫର୍ମାଟରେ ଖେଳାଯାଉଛି। ଏହି ମ୍ୟାଚ୍ ଗୁଡ଼ିକ ଭାରତୀୟ ସମୟ ସନ୍ଧ୍ୟା ୭:30୩୦ ଟାରେ ଆରମ୍ଭ ହେବାର ଥିଲା। କିନ୍ତୁ ବର୍ତ୍ତମାନ କାର୍ଯ୍ୟସୂଚୀ ଆସିବା ସହିତ ଏହି ସମୟ ଅଧ ଘଣ୍ଟା ବୃଦ୍ଧି ପାଇଛି, ଯାହା ଫଳରେ ଭାରତରେ ରାତି ୮ ଟାରୁ ଏହି ମ୍ୟାଚ୍ ଗୁଡ଼ିକୁ ସିଧା ଦେଖାଯାଇପାରିବ। ସେପ୍ଟେମ୍ବର ମାସରେ UAEରେ ତାପମାତ୍ରା ପ୍ରାୟ ୪୦ ଡିଗ୍ରୀ ରହିଥାଏ। ଖେଳାଳୀମାନଙ୍କୁ ସନ୍ଧ୍ୟାରେ ଗରମରୁ କିଛି ଆଶ୍ୱସ୍ତି ପାଇବା ପାଇଁ ମ୍ୟାଚ୍ ର ସମୟ ଅଧ ଘଣ୍ଟା ବୃଦ୍ଧି କରାଯାଇଛି। କ୍ରିକେଟ୍ ବୋର୍ଡ ପ୍ରସାରକମାନଙ୍କୁ ସମୟ ପରିବର୍ତ୍ତନ କରିବାକୁ ଆବେଦନ କରିଥିଲା, ଯାହା ପରେ ପ୍ରବଳ ଗରମକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି।
୧୯ ଟି ମ୍ୟାଚ୍ ମଧ୍ୟରୁ ୧୮ ଟିର ସମୟରେ ପରିବର୍ତ୍ତନ:
ଏସିଆ କପରେ ଫାଇନାଲ ସମେତ ମୋଟ ୧୯ ଟି ମ୍ୟାଚ୍ ଖେଳାଯିବ, ଯାହା ମଧ୍ୟରୁ ୧୮ ଟି ମ୍ୟାଚ୍ ର ସମୟ ଅଧ ଘଣ୍ଟା ବୃଦ୍ଧି କରାଯାଇଛି। ଏହି ସମସ୍ତ ୧୮ ଟି ମ୍ୟାଚ୍ ଦିବା-ରାତ୍ର ମ୍ୟାଚ୍। ସେହିପରି ସେପ୍ଟେମ୍ବର ୧୫ ତାରିଖରେ ଦିନରେ ଗୋଟିଏ ମ୍ୟାଚ୍ ଖେଳାଯିବ, ଯାହା UAE ଏବଂ ଓମାନ ମଧ୍ୟରେ ହେବ, ଏହି ମ୍ୟାଚ୍ ର ସମୟରେ କୌଣସି ପରିବର୍ତ୍ତନ ହୋଇନାହିଁ। ଏହି ମ୍ୟାଚ୍ ଭାରତୀୟ ସମୟ ଅନୁସାରେ ସନ୍ଧ୍ୟା ୫:୩୦ ରେ ଆରମ୍ଭ ହେବ।