ନୂଆଦିଲ୍ଲୀ: ଇଣ୍ଡିଆନ୍ ଓଭରସିଜ୍ କଂଗ୍ରେସର ମୁଖ୍ୟ ଏବଂ ରାହୁଲ ଗାନ୍ଧୀଙ୍କ ଘନିଷ୍ଠ ସହଯୋଗୀ ସାମ ପିତ୍ରୋଦା ଏକ ବିବାଦୀୟ ବୟାନ ଦେଇଛନ୍ତି। ସେ ପାକିସ୍ତାନକୁ ପ୍ରଶଂସା କରିଛନ୍ତି। ପିତ୍ରୋଦା ବାଂଲାଦେଶ ଏବଂ ନେପାଳର ନାମ ମଧ୍ୟ ସାମିଲ କରିଛନ୍ତି। ସେ କହିଛନ୍ତି ଯେ, ପାକିସ୍ତାନ ଏବଂ ବାଂଲାଦେଶକୁ ଘର ପରି ଅନୁଭବ କରନ୍ତି। ପିତ୍ରୋଦା ଭାରତକୁ ଏହାର ପଡ଼ୋଶୀମାନଙ୍କ ପ୍ରତି ଧ୍ୟାନ ଦେବାକୁ ପରାମର୍ଶ ଦେଇଛନ୍ତି।
IANS କୁ ସାମ ପିତ୍ରୋଦା କହିଛନ୍ତି ଯେ, “ମୁଁ ବିଶ୍ୱାସ କରେ ଆମର ବୈଦେଶିକ ନୀତି ପ୍ରଥମେ ଆମ ପଡ଼ୋଶୀ ଉପରେ କେନ୍ଦ୍ରିତ ହେବା ଉଚିତ। ଆମେ କ’ଣ ପ୍ରକୃତରେ ଆମର ପଡ଼ୋଶୀଙ୍କ ସହ ସମ୍ପର୍କ ଉନ୍ନତ କରିପାରିବୁ? ମୁଁ ପାକିସ୍ତାନ ଯାଇଛି, ଏବଂ ମୁଁ ଆପଣଙ୍କୁ କହିବାକୁ ଚାହୁଁଛି, ମୁଁ ସେଠାରେ ନିଜ ଘର ପରି ଅନୁଭବ କରିଛି। ମୁଁ ବାଂଲାଦେଶ ଯାଇଛି, ମୁଁ ନେପାଳ ଯାଇଛି, ଏବଂ ମୁଁ ସେଠାରେ ମଧ୍ୟ ନିଜ ଘର ପରି ଅନୁଭବ କରିଛି। ମୁଁ ବିଦେଶ ମାଟିରେ ଅଛି ବୋଲି ଅନୁଭବ କରୁନାହିଁ।”
ପୂର୍ବରୁ ମଧ୍ୟ ବିବାଦୀୟ ବୟାନ ଦେଇଛନ୍ତି ସାମ ପିତ୍ରୋଦା:
ସାମ ସାମ ପିତ୍ରୋଦାଙ୍କ ବୟାନ ପୁଣି ଥରେ କଂଗ୍ରେସ ଦଳକୁ ଆହୁରି ଅସୁବିଧାରେ ପକାଇପାରେ। ଭାରତୀୟ ଜନତା ପାର୍ଟି କଂଗ୍ରେସ ଦଳକୁ ପୂର୍ବରୁ ରାଷ୍ଟ୍ର ବିରୋଧୀ ବୋଲି କହିସାରିଛି। ଏବେ, ବିଜେପି ଏହି ବିବୃତ୍ତିରୁ ଫାଇଦା ଉଠାଇବାକୁ ଚେଷ୍ଟା କରିବ। ଏହା ପ୍ରଥମ ଥର ନୁହେଁ ଯେ, ସାମ ପିତ୍ରୋଦା ବିବାଦୀୟ ବୟାନ ଦେଇଛନ୍ତି। ପୂର୍ବରୁ ସେ ୧୯୮୪ ଶିଖ ଦଙ୍ଗା ଉପରେ ମନ୍ତବ୍ୟ ଦେଇ ଅସୁବିଧାରେ ପଡ଼ିଥିଲେ। ସାମ ପିତ୍ରୋଦା ଦଙ୍ଗା ବିଷୟରେ କହିଥିଲେ ଯେ, “ଯାହା ହେଲା, ହେଲା।”
