ନୂଆଦିଲ୍ଲୀ: ଆଜି ନୂଆଦିଲ୍ଲୀରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ଚନ୍ଦନ କାଠ ବିକାଶ କମିଟିର ରିପୋର୍ଟ ଉନ୍ମୋଚିତ ହୋଇଛି। ଏହି ରିପୋର୍ଟ ଉନ୍ମୋଚନ କାର୍ଯ୍ୟକ୍ରମ ଭାରତୀୟ ପ୍ଲାଏଉଡ୍ ଏବଂ ପ୍ୟାନେଲ୍ ଶିଳ୍ପ ମହାସଂଘ (ଏଫଆଇପିପିଆଇ) ଦ୍ୱାରା ପ୍ରାୟୋଜିତ ହୋଇଥିଲା। ଭାରତ ସରକାରଙ୍କ ପୂର୍ବତନ ଅର୍ଥ ସଚିବ ଶ୍ରୀ ରତନ ପି. ୱାଟଲ ଏହି ଉନ୍ମୋଚନ କାର୍ଯ୍ୟକ୍ରମର ଅଧ୍ୟକ୍ଷତା କରିଥିବା ବେଳେ କେନ୍ଦ୍ର ସରକାରଙ୍କ ବିଭିନ୍ନ ମନ୍ତ୍ରଣାଳୟ/ବିଭାଗର ପ୍ରତିନିଧିମାନଙ୍କ ବ୍ୟତୀତ, ଗ୍ରୀନ୍ ପ୍ଲାଏ ଇଣ୍ଡଷ୍ଟ୍ରିଜ୍ ଲିମିଟେଡ୍, ସିଏଣ୍ଡଏମଡି ଏବଂ ଏଫଆଇପିପିଆଇର ସଭାପତି ଶ୍ରୀ ରାଜେଶ ମିତ୍ତଲ ମଧ୍ୟ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ।
ଭାରତ ସରକାରଙ୍କ ପୂର୍ବତନ ଅର୍ଥ ସଚିବ ରତନ ପ୍ରକାଶ ୱାଟଲଙ୍କ ଅଧ୍ୟକ୍ଷତାରେ ଚନ୍ଦନ କାଠ ବିକାଶ ସମିତି ଗଠିତ ହୋଇଥିଲା। ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ, କୃଷି ଓ କୃଷକ କଲ୍ୟାଣ ମନ୍ତ୍ରଣାଳୟ, ବାଣିଜ୍ୟ ମନ୍ତ୍ରଣାଳୟ, ଆୟୁଷ ମନ୍ତ୍ରଣାଳୟ, ଭାରତ ସରକାରଙ୍କ ଜାତୀୟ ଔଷଧୀୟ ଉଦ୍ଭିଦ ବୋର୍ଡ ଭଳି ସମସ୍ତ ସମ୍ପୃକ୍ତ ମନ୍ତ୍ରଣାଳୟ / ବିଭାଗଗୁଡ଼ିକର ପ୍ରତିନିଧିମାନେ ଏହି କମିଟିର ସଦସ୍ୟ ଅଛନ୍ତି। ବେଙ୍ଗାଲୁରୁର କାଠ ବିଜ୍ଞାନ ଏବଂ ପ୍ରଯୁକ୍ତି ପ୍ରତିଷ୍ଠାନ ଏବଂ ତାମିଲନାଡୁ କୃଷି ବିଶ୍ୱବିଦ୍ୟାଳୟର ବନ ମହାବିଦ୍ୟାଳୟ ଏବଂ ଗବେଷଣା ପ୍ରତିଷ୍ଠାନର ପ୍ରତିନିଧିମାନେ ମଧ୍ୟ ଏହି କମିଟିରେ ପ୍ରତିନିଧିତ୍ୱ କରୁଛନ୍ତି।
ଚନ୍ଦନ କାଠ ଚାଷ ଗ୍ରାମୀଣ ନିଯୁକ୍ତି ସୃଷ୍ଟି କରିପାରିବ। ଏହାଛଡ଼ା ଚନ୍ଦନ କାଠ ଏବଂ ଏହାର ଅନ୍ୟାନ୍ୟ ବିଭିନ୍ନ ଉପ-ଜାତ ଦ୍ରବ୍ୟର ରପ୍ତାନି ମାଧ୍ୟମରେ ଗୁରୁତ୍ୱପୂର୍ଣ୍ଣ ବୈଦେଶିକ ମୁଦ୍ରା ଉପାର୍ଜନ ପାଇଁ ଏହି ଚାଷ ଏକ ପ୍ଲାଟଫର୍ମ ଭାବରେ କାର୍ଯ୍ୟ କରିପାରିବ। ବର୍ତ୍ତମାନ ଏବଂ ଭବିଷ୍ୟତରେ ଆମ ସମାଜର ଚନ୍ଦନ କାଠ ଆବଶ୍ୟକତା ପୂରଣ କରିବା ସହିତ ଭାରତ ଆତ୍ମନିର୍ଭର ହୋଇପାରିବ। ଭାରତୀୟ ଚନ୍ଦନର ଅତୀତ ଗୌରବ ଫେରିପାଇବା ପାଇଁ କେନ୍ଦ୍ର ଏବଂ ରାଜ୍ୟ ସରକାରଙ୍କ ଦ୍ୱାରା ଅନେକ ପଦକ୍ଷେପ ଓ ସଂସ୍କାର ଗ୍ରହଣ କରାଯିବାର ଆବଶ୍ୟକତା ରହିଛି। ଦେଶରେ ଚନ୍ଦନ କାଠର ବିକାଶ ପାଇଁ ସମସ୍ୟାଗୁଡ଼ିକୁ ଚିହ୍ନଟ କରିବା ଏବଂ ସୁପାରିସ କରିବା ପାଇଁ ଶ୍ରୀ ୱାଟଲ ଏହି ଆନ୍ତଃମନ୍ତ୍ରୀସ୍ତରୀୟ ଚନ୍ଦନ କାଠ ବିକାଶ ସମିତି ଗଠନ କରିବା ଲାଗି ପଦକ୍ଷେପ ନେଇଥିଲେ।
ଏହି ସମିତି ପ୍ରମୁଖ ରାଜ୍ୟ ସରକାରଙ୍କ ବନ ବିଭାଗ ସମେତ ବିଭିନ୍ନ ଅଂଶୀଦାରଙ୍କ ସହିତ ବ୍ୟାପକ ବିଚାରବିମର୍ଶ କରିଛି ଏବଂ ଭାରତରେ ଚନ୍ଦନ କାଠର ବିକାଶ ଏବଂ ଅତୀତ ଗୌରବ ଫେରିପାଇବା ପାଇଁ ଏହାର ରିପୋର୍ଟରେ ବ୍ୟାପକ ପଦକ୍ଷେପ ସୁପାରିସ କରିଛି।