ନୂଆଦିଲ୍ଲୀ: ରାଜସ୍ଥାନରେ ବଡ଼ ବଡ଼ ସଡ଼କ ଦୁର୍ଘଟଣା କ୍ରମାଗତ ବୃଦ୍ଧି ପାଉଛି। ଜୈସଲମେର ବସ୍ ଅଗ୍ନିକାଣ୍ଡରେ କୋଡ଼ିଏ ଜଣ ପ୍ରାଣ ହରାଇଥିବା ବେଳେ ମାତ୍ର ଦୁଇ ଦିନ ପରେ ଆଜି ବାଡ଼ମେରରୁ ଆଉ ଏକ ବଡ଼ ଦୁର୍ଘଟଣାର ଖବର ଆସିଛି। ଏକ ଟ୍ରେଲର ସହିତ ଧକ୍କା ହୋଇ ଗୋଟିଏ ସ୍କୋର୍ପିଓ କାରରେ ନିଆଁ ଲାଗିଯାଇଛି। ଯାହାଫଳରେ ଚାରି ବନ୍ଧୁ ପୋଡ଼ି ମୃତ୍ୟୁବରଣ କରିଛନ୍ତି ଏବଂ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି।
ଘଟଣାଟି ପ୍ରାୟ ରାତି ୨:୩୦ ସମୟରେ ସିନ୍ଧାରୀ ଥାନା ଅଞ୍ଚଳରେ ଘଟିଛି। ଟ୍ରେଲର ସହିତ ଧକ୍କା ହେବା ପରେ ସ୍କୋର୍ପିଓ କାରରେ ତୁରନ୍ତ ନିଆଁ ଲାଗିଯାଇଥିଲା। ନିଆଁ ଏତେ ତୀବ୍ର ଥିଲା ଯେ, କାହାରିକୁ ବାହାରିବା ପାଇଁ ସୁଯୋଗ ମିଳିନଥିଲା।
ଗୁରୁତର ଭାବେ ପୋଡ଼ିଯାଇଥିବା ଯୁବକଙ୍କ ଅବସ୍ଥା ସଙ୍କଟାପନ୍ନ ରହିଛି। ରିପୋର୍ଟ ଅନୁଯାୟୀ ପାଞ୍ଚ ଜଣ ବନ୍ଧୁ କୌଣସି କାମରେ ଯାଇ ଘରକୁ ଫେରୁଥିଲେ। ଏହି ଦୁଃଖଦ ଦୁର୍ଘଟଣା ଘଟିବା ସମୟରେ ସେମାନେ ଘରୁ ମାତ୍ର ୩୦ କିଲୋମିଟର ଦୂରରେ ଥିଲେ।
ମୃତ ସମସ୍ତ ଯୁବକଙ୍କ ବୟସ ୨୨ ରୁ ୩୦ ବର୍ଷ ମଧ୍ୟରେ ହେବ। ମୃତକଙ୍କ ପରିଚୟ ମିଳିଛି। ମୃତକଙ୍କ ମଧ୍ୟରେ ମୋହନ ସିଂହ, ଶମ୍ଭୁ ସିଂହ, ପଞ୍ଚରାମ ଦେୱାସୀ ଏବଂ ପ୍ରକାଶ ଅଛନ୍ତି।