ନୂଆଦିଲ୍ଲୀ: ୨୦୨୫ ICC ମହିଳା ବିଶ୍ୱକପ୍ ଏବେ ରୋମାଞ୍ଚକ ସ୍ଥିତିରେ ପହଞ୍ଚିଛି। ହରମନପ୍ରୀତ କୌରଙ୍କ ନେତୃତ୍ୱରେ ଭାରତୀୟ ଦଳ ଆଜି ସେମିଫାଇନାଲ୍ରେ ଅଷ୍ଟ୍ରେଲିଆ ସହିତ ମୁକାବିଲା କରିବ। ଏହି ମ୍ୟାଚ୍ ମୁମ୍ବାଇର ଡିୱାଇ ପାଟିଲ୍ ଷ୍ଟାଡିୟମ୍ରେ ଖେଳାଯିବ, ଯେଉଁଠାରେ ପ୍ରଶଂସକମାନେ ଆଶା କରୁଛନ୍ତି ଯେ, ଭାରତୀୟ ଦଳ ପୁଣି ଥରେ ଇତିହାସ ଦୋହରାଇବ। ଭାରତ ଏବେ ସେହି ଟାଇଟଲ୍ଠାରୁ ମାତ୍ର ଦୁଇ ପାଦ ଦୂରରେ ଅଛି, ଯାହାକୁ ଲକ୍ଷ ଲକ୍ଷ କ୍ରିକେଟ୍ ପ୍ରେମୀ ବର୍ଷ ବର୍ଷ ଧରି ଅପେକ୍ଷା କରିଆସୁଛନ୍ତି।
ସେମିଫାଇନାଲ୍ରେ ଭାରତର ପ୍ରଦର୍ଶନ:
ଭାରତୀୟ ମହିଳା କ୍ରିକେଟ୍ ଦଳ ଏପର୍ଯ୍ୟନ୍ତ ଚାରି ଥର ICC ବିଶ୍ୱକପ୍ ସେମିଫାଇନାଲ୍ରେ ପହଞ୍ଚିଛି। ଦଳ ଦୁଇ ଥର ଜିତିଛି ଏବଂ ଦୁଇ ଥର ହାରିଛି।
ଭାରତ ବନାମ ଅଷ୍ଟ୍ରେଲିଆ (୧୯୯୬)
୧୯୯୬ ମସିହାରେ ଭାରତୀୟ ମହିଳା ଦଳ ପ୍ରଥମ ବିଶ୍ୱକପ୍ ସେମିଫାଇନାଲ୍ ଖେଳିଥିଲା। ଭାରତ ଅଷ୍ଟ୍ରେଲିଆ ବିପକ୍ଷରେ ଥିଲା। ଖରାପ ଆଲୋକ ଯୋଗୁଁ ମ୍ୟାଚ୍କୁ ୩୨ ଓଭରକୁ ହ୍ରାସ କରାଯାଇଥିଲା। ପ୍ରଥମେ ବ୍ୟାଟିଂ କରି ଅଷ୍ଟ୍ରେଲିଆ ୧୨୩ ରନର ବିଶାଳ ସ୍କୋର କରିଥିଲା। ଜବାବରେ, ଭାରତ ୯ ୱିକେଟରେ ମାତ୍ର ୧୦୪ ରନ କରିପାରିଥିଲା ଏବଂ ୧୯ ରନରେ ମ୍ୟାଚ୍ ହାରିଥିଲା।
ଭାରତ ବନାମ ନ୍ୟୁଜିଲ୍ୟାଣ୍ଡ (୨୦୦୦)
୨୦୦୦ ମସିହାରେ ଭାରତ ପୁଣି ଥରେ ସେମିଫାଇନାଲରେ ପହଞ୍ଚିଥିଲା। କିନ୍ତୁ ଏଥର ନ୍ୟୁଜିଲ୍ୟାଣ୍ଡ ବିପକ୍ଷରେ ଦଳର ପ୍ରଦର୍ଶନ ଦୁଃଖଦ ଥିଲା। ଭାରତୀୟ ଦଳ ମାତ୍ର ୧୧୭ ରନରେ ଅଲଆଉଟ୍ ହୋଇଯାଇଥିଲା। ନ୍ୟୁଜିଲ୍ୟାଣ୍ଡ ସହଜରେ ଏହି ଲକ୍ଷ୍ୟ ହାସଲ କରି ୯ ୱିକେଟରେ ବିଜୟୀ ହୋଇଥିଲା।
ଭାରତ ବନାମ ନ୍ୟୁଜିଲ୍ୟାଣ୍ଡ (୨୦୦୫)
୨୦୦୫ ସେମିଫାଇନାଲ ଭାରତ ପାଇଁ ସ୍ମରଣୀୟ ପ୍ରମାଣିତ ହୋଇଥିଲା। ଭାରତ ଏବଂ ନ୍ୟୁଜିଲ୍ୟାଣ୍ଡ ପୁଣି ଥରେ ମୁହାଁମୁହିଁ ହୋଇଥିଲେ। ଏଥର ଭାରତୀୟ ଦଳ ୪୦ ରନରେ ବିଜୟୀ ହୋଇଥିଲା। ପ୍ରଥମେ ବ୍ୟାଟିଂ କରି ଭାରତ ୨୦୪ ରନ କରିଥିଲା ଏବଂ ପରେ କିୱି ଦଳକୁ ୧୬୪ ରନରେ ଅଲଆଉଟ୍ କରିଥିଲା। ଏହି ବିଜୟ ପ୍ରଥମ ଥର ପାଇଁ ବିଶ୍ୱକପ ଫାଇନାଲରେ ଭାରତର ସ୍ଥାନ ସୁରକ୍ଷିତ କରିଥିଲା।
ଭାରତ ବନାମ ଅଷ୍ଟ୍ରେଲିଆ (୨୦୧୭)
୨୦୧୭ ସେମିଫାଇନାଲ ହୁଏତ ଭାରତୀୟ ମହିଳା କ୍ରିକେଟ ଇତିହାସର ସବୁଠାରୁ ଗୁରୁତ୍ୱପୂର୍ଣ୍ଣ ମୁହୂର୍ତ୍ତ ଥିଲା। ହରମନପ୍ରୀତ କୌର ଅଷ୍ଟ୍ରେଲିଆ ବିପକ୍ଷରେ ମାତ୍ର ୧୧୫ ବଲ୍ ରେ ୧୭୧ ରନ୍ ର ଏକ ବିସ୍ଫୋରକ ଇନିଂସ ଖେଳିଥିଲେ। ଭାରତ ୩୬ ରନ୍ ରେ ମ୍ୟାଚ୍ ଜିତି ଫାଇନାଲରେ ପ୍ରବେଶ କରିଥିଲା ଏବଂ ମହିଳା କ୍ରିକେଟରେ ଏକ ନୂତନ ପରିଚୟ ସ୍ଥାପନ କରିଥିଲା।
ଏବେ ୨୦୨୫ ରେ ପୁଣି ସମାନ ପରିସ୍ଥିତି:
ଆଠ ବର୍ଷ ପରେ ଭାରତ ଏବଂ ଅଷ୍ଟ୍ରେଲିଆ ସେମିଫାଇନାଲରେ ମୁହାଁମୁହିଁ ହେଉଛନ୍ତି। ହରମନପ୍ରୀତ ପୁଣି ଥରେ ଅଧିନାୟକ, ଏବଂ ସମଗ୍ର ଦେଶ ଆଶା କରୁଛି ଯେ ୨୦୧୭ ର ଇତିହାସ ୨୦୨୫ ରେ ପୁନରାବୃତ୍ତି ହେବ।