ବାଣପୁର: ସ୍ଥାନୀୟ ବାଣପୁର ସରସ୍ଵତୀ ଉଚ୍ଚ ମାଧ୍ୟମିକ ବିଦ୍ୟାଳୟ ଛାତ୍ର ଶିବପ୍ରସାଦ ହୋତା ୧୯ ବର୍ଷ ରୁ କମ୍ ଜାତୀୟ ସ୍ତରୀୟ ଭଲିବଲ୍ ପ୍ରତିଯୋଗିତା ପାଇଁ ଓଡିଶା ତରଫରୁ ଆଜି ମଧ୍ୟପ୍ରଦେଶ ଯାତ୍ରା କରିଛନ୍ତି। ଶିବପ୍ରସାଦ ପୁଞ୍ଜିଆମ୍ବା ଶାସନ ନିବାସୀ ସନ୍ତୋଷ କୁମାର ହୋତା ଓ ସୁମିତ୍ରା ହୋତାଙ୍କର ଏକ ମାତ୍ର ପୁତ୍ର। ପିଲାଟି ଦିନରୁ କ୍ରୀଡା ପ୍ରତି ରୁଚି ରଖିଥିବା ଶିବପ୍ରସାଦ ନିଜର କଠିନ ପରିଶ୍ରମ ବଳରେ ବାରିପଦା ଠାରେ ଅନୁଷ୍ଠିତ ସିଲେକ୍ସନ ଟ୍ରାଏଲ୍ ରେ (Selection Trial) ଉଚ୍ଚ ମାନର କ୍ରୀଡା ପ୍ରଦର୍ଶନ କରି ସମସ୍ତଙ୍କ ଦୃଷ୍ଟି ଆକର୍ଷଣ କରି ଓଡିଶାର ୧୨ ଜଣଙ୍କ ମଧ୍ୟରେ ନିଜର ସ୍ଥାନ ସୁରକ୍ଷିତ ରଖି ପାରିଥିଲେ। ଏଥିପାଇଁ ଏସବୁର ଶ୍ରେୟ ନିଜର କୋଚ୍ ଓ କ୍ରୀଡା ଶିକ୍ଷୟିତ୍ରୀ କଳ୍ପଶ୍ରୀ ପ୍ରଧାନଙ୍କୁ ପ୍ରଦାନ କରିଛନ୍ତି।
ପ୍ରଧାନ ଗୁରୁଜୀ ଅବିନାଶ ପଟ୍ଟନାୟକ, ଅଧ୍ୟକ୍ଷ ଜ୍ୟୋତିର୍ମୟ ତ୍ରିପାଠୀଙ୍କ ସମେତ ବିଦ୍ୟାମନ୍ଦିରର ସମସ୍ତ ଗୁରୁଜୀ ଗୁରୁମାଙ୍କୁ ଏହି ସଫଳତା ପାଇଁ କୃତଜ୍ଞତା ଜ୍ଞାପନ କରିଛନ୍ତି। ଏହାଛଡା ସମସ୍ତଙ୍କ ଅତୁଟ ସମର୍ଥନ ଓ ସହଯୋଗ ପାଇଁ ସମସ୍ତଙ୍କ ନିକଟରେ ଋଣୀ ବୋଲି ଆମ ପ୍ରତିନିଧିଙ୍କୁ ଜଣାଇଛନ୍ତି। ଏ ଖବର ପ୍ରସାରିତ ହେବା ପରେ ସାରା ବାଣପୁର ଅଞ୍ଚଳରେ ଆନନ୍ଦର ଲହରୀ ଖେଳିଯାଇଛି।