ମୁମ୍ବାଇ: ଭାରତୀୟ କ୍ରୀଡା ଇତିହାସରେ ସ୍ୱର୍ଣ୍ଣ ଅକ୍ଷରରେ ଲିପିବଦ୍ଧ କରି ଭାରତୀୟ ଦୃଷ୍ଟିହୀନ ମହିଳା କ୍ରିକେଟ୍ ଦଳ ପ୍ରଥମ ଦୃଷ୍ଟିହୀନ ମହିଳା ଟି୨୦ ବିଶ୍ୱକପ୍ ଜିତି ସମଗ୍ର ଦେଶକୁ ଗର୍ବିତ କରିଛି। ପଡ଼ିଆରେ ସେମାନଙ୍କର ସଂଘର୍ଷ, ଆତ୍ମବିଶ୍ୱାସ ଏବଂ ଦଳଗତ ମନୋଭାବ ସ୍ପଷ୍ଟ ଥିଲା – ସେମାନଙ୍କର ଦୃଷ୍ଟିଶକ୍ତି ସୀମିତ ହୋଇପାରେ, କିନ୍ତୁ ସେମାନଙ୍କ ସ୍ୱପ୍ନ ବିଶ୍ୱକୁ ଚମକାଇ ଦେଇଥିଲା।
ଏହି ସ୍ମରଣୀୟ ସଫଳତା ପାଇଁ ଦଳକୁ ଅଭିନନ୍ଦନ ଜଣାଇ ନୀତା ଏମ୍. ଅମ୍ବାନୀ କହିଛନ୍ତି ଯେ, “ଆମର ଦୃଷ୍ଟିହୀନ ମହିଳା କ୍ରିକେଟର ମାନେ ପୁଣି ଥରେ ଭାରତକୁ ଗର୍ବିତ କରିଛନ୍ତି। ପ୍ରଥମ ଟି୨୦ କ୍ରିକେଟ୍ ବିଶ୍ୱକପ୍ ଜିତି, ଭାରତୀୟ ଦୃଷ୍ଟିହୀନ ମହିଳା କ୍ରିକେଟ୍ ଦଳ ପ୍ରମାଣିତ କରିଛି ଯେ ପ୍ରକୃତ ଦୃଷ୍ଟି ଆଖିରେ ନୁହେଁ, ବରଂ ହୃଦୟରେ ଥାଏ। ଏହି ବିଜୟ ସାହସ, ଦୃଢ଼ତା ଏବଂ ଅଟଳ ଭାବନାର ବିଜୟ। ସେମାନେ ଲକ୍ଷ ଲକ୍ଷ ଲୋକଙ୍କ ପାଇଁ ଆଶା, ସମ୍ଭାବନା ଏବଂ ପ୍ରେରଣାର ପଥକୁ ଆଲୋକିତ କରିଛନ୍ତି। ଦଳ ଏବଂ ସେମାନଙ୍କ ପରିବାରକୁ ହାର୍ଦ୍ଦିକ ଅଭିନନ୍ଦନ!”
ଭାରତୀୟ ଦୃଷ୍ଟିହୀନ ମହିଳା କ୍ରିକେଟ ଦଳର କାହାଣୀ ଆଗାମୀ ଅନେକ ପିଢ଼ି ପାଇଁ ପ୍ରେରଣା ପାଲଟିଛି – ଯେଉଁଠାରେ ସାହସ ଥାଏ, ବିଜୟ ତା’ର ପଥ ଖୋଜିନିଏ।
