ଦିଲ୍ଲୀ: କେନ୍ଦ୍ର ବନ୍ଦର, ଜାହାଜ ଚଳାଚଳ ଏବଂ ଜଳପଥ (ଏମଓପିଏସ୍ଡବ୍ଲ୍ୟୁ) ମନ୍ତ୍ରୀ ସର୍ବାନନ୍ଦ ସୋନୋୱାଲ ମଙ୍ଗଳବାର ମୁମ୍ବାଇରେ ଅନୁଷ୍ଠିତ ଅନ୍ତର୍ଜାତୀୟ ସାମୁଦ୍ରିକ ନାଭିଗେସନ ସହାୟତା ସଂଗଠନ (ଆଇଏଏଲଏ) ପରିଷଦର ତୃତୀୟ ଅଧିବେଶନକୁ ଆଭାସୀ ମାଧ୍ୟମରେ ଉଦଘାଟନ କରିଛନ୍ତି। କେନ୍ଦ୍ର ମନ୍ତ୍ରୀ ଲାଇଟହାଉସ ପର୍ଯ୍ୟଟନ ପାଇଁ ଡିଜିଟାଲ ଟିକେଟିଂ ପୋର୍ଟାଲ ମଧ୍ୟ ଉନ୍ମୋଚନ କରିଛନ୍ତି, ଯାହା ସମଗ୍ର ଭାରତରେ ଲାଇଟହାଉସ ଗନ୍ତବ୍ୟସ୍ଥଳଗୁଡିକରେ ପହଞ୍ଚ ବୃଦ୍ଧି କରିବା ପାଇଁ ଡିଜିଟାଲ ପରିଦର୍ଶକ ସେବା ଦିଗରେ ଏକ ପ୍ରମୁଖ ପଦକ୍ଷେପ।
ଡିସେମ୍ବର ୮ରୁ ୧୨ ପର୍ଯ୍ୟନ୍ତ ଅନୁଷ୍ଠିତ ହେଉଥିବା ଏହି ପ୍ରତିଷ୍ଠିତ ବିଶ୍ୱସ୍ତରୀୟ କାର୍ଯ୍ୟକ୍ରମ ବନ୍ଦର, ଜାହାଜ ପରିବହନ ଏବଂ ଜଳପଥ (ଏମଓପିଏସଡବ୍ଲ୍ୟୁ) ମନ୍ତ୍ରଣାଳୟ ଅଧୀନରେ ଲାଇଟହାଉସ ଏବଂ ଲାଇଟସିପ୍ସ ମହାନିର୍ଦ୍ଦେଶାଳୟ (ଡିଜିଏଲଏଲ) ଦ୍ୱାରା ଆୟୋଜିତ। ଏଥିରେ ୪୨ ଜଣ ଆଇଏଏଲଏ ପରିଷଦ ସଦସ୍ୟ, ତିନି ଜଣ ଏଆଇଏମ୍ଜି ସଦସ୍ୟ, ୧୧ ଜଣ ପର୍ଯ୍ୟବେକ୍ଷକ, ଆଇଏଏଲଏ ସଚିବାଳୟ ପ୍ରତିନିଧି ଏବଂ ୩୦ରୁ ଅଧିକ ଦେଶର ପ୍ରତିନିଧି ଯୋଗ ଦେବେ।
ଉଦ୍ଘାଟନୀ ଅଧିବେଶନରେ ଉଦ୍ବୋଧନ ଦେଇ କେନ୍ଦ୍ର ମନ୍ତ୍ରୀ ସର୍ବାନନ୍ଦ ସୋନୋୱାଲ କହିଛନ୍ତି ଯେ ମୁମ୍ବାଇରେ ପରିଷଦର ଏହି ଆୟୋଜନ ବିଶ୍ୱ ସାମୁଦ୍ରିକ ମାନଦଣ୍ଡର ଭବିଷ୍ୟତ ଗଠନରେ ଭାରତର ବୃଦ୍ଧି ପାଉଥିବା ଭୂମିକାକୁ ଦର୍ଶାଉଛି । ସର୍ବାନନ୍ଦ ସୋନୋୱାଲ ହରପ୍ପା ଯୁଗରୁ ପ୍ରଚଳିତ ଭାରତର ସାମୁଦ୍ରକି ଐତିହ୍ୟ ସମ୍ପର୍କରେ ଉଲ୍ଲେଖ କରିଥିଲେ ଏବଂ ଲୋଥାଲରେ ଭାରତ ଦ୍ୱାରା ବିକଶିତ ଜାତୀୟ ସାମୁଦ୍ରିକ ଐତିହ୍ୟ କମ୍ପେ୍ଲକ୍ସ (ଏନଏମଏଚସି) ଉପରେ ଆଲୋକପାତ କରିଥିଲେ। ଯେଉଁଥିରେ ଭାରତର ସାମୁଦ୍ରିକ ଅତୀତ ଏବଂ ଭବିଷ୍ୟତର ଉତ୍ସବ ପାଳନ କରୁଥିବା ସମର୍ପିତ ଲାଇଟହାଉସ ସଂଗ୍ରହାଳୟ ମଧ୍ୟ ଅନ୍ତର୍ଭୁକ୍ତ ।
କେନ୍ଦ୍ର ମନ୍ତ୍ରୀ ବିଶ୍ୱସ୍ତରୀୟ ସହଯୋଗର ବର୍ଦ୍ଧିତ ପ୍ରାସଙ୍ଗିକତା ଉପରେ ଗୁରୁତ୍ୱାରୋପ କରିଥିଲେ କାରଣ ପ୍ରଯୁକ୍ତିବିଦ୍ୟା ସାମୁଦ୍ରିକ ନାଭିଗେସନକୁ ପୁନଃଆକୃତି ଦେଉଛି, ଯେଉଁଥିରେ ସ୍ୱୟଂସାଶାସିତ ପରିବହନ, ଉପଗ୍ରହ-ସକ୍ଷମ ପ୍ରଣାଳୀ ଏବଂ ଡିଜିଟାଲ ଜାହାଜ ପରିଚାଳନା ଅନ୍ତର୍ଭୁକ୍ତ। ସୋନୋୱାଲ ବିଶ୍ୱବ୍ୟାପୀ ନାଭଗେସନ ମାନଦଣ୍ଡକୁ ସମନ୍ୱିତ କରିବାରେ ଆଇଏଏଲଏର ନେତୃତ୍ୱର ଗୁରୁତ୍ୱକୁ ରେଖାଙ୍କିତ କରିଥିଲେ ଏବଂ ନିରାପଦ, ଦକ୍ଷ ଏବଂ ସ୍ଥାୟୀ ସାମୁଦ୍ରିକ ନୌପରିଚାଳନା ପାଇଁ ଭାରତର ସହଭାଗୀତାକୁ ପୁନଃନିଶ୍ଚିତ କରିଥିଲେ।
ଏହି କାର୍ଯ୍ୟକ୍ରମରେ ଉଦ୍ବୋଧନ ଦେଇ ସର୍ବାନନ୍ଦ ସୋନୋୱାଲ କହିଛନ୍ତି, “ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିପୂର୍ଣ୍ଣ ନେତୃତ୍ୱରେ, ଭାରତର ସାମୁଦ୍ରିକ କ୍ଷେତ୍ର ଏକ ପରିବର୍ତ୍ତନଶୀଳ ରୂପାନ୍ତର ଦେଇ ଗତି କରୁଛି – ଭିତ୍ତିଭୂମି ପ୍ରସାରଣ ଏବଂ ଡିଜିଟାଲ ନବାଚାରରୁ ଆରମ୍ଭ କରି ସବୁଜ ତଥା ସ୍ଥାୟୀ ପରିବହନ ପର୍ଯ୍ୟନ୍ତ। ପ୍ରଧାନମନ୍ତ୍ରୀ ମୋଦୀଙ୍କ ରଣନୈତିକ ଫୋକସ ଭାରତକୁ କେବଳ ଏପ ପ୍ରମୁଖ ସାମୁଦ୍ରିକ ରାଷ୍ଟ୍ର ଭାବରେ ନୁହେଁ ବରଂ ବିଶ୍ୱସ୍ତରୀୟ ମାନଦଣ୍ଡ, ସୁରକ୍ଷା ଏବଂ ସହଯୋଗ ପାଇଁ ଏକ ବିଶ୍ୱସ୍ତ ଅଂଶଗ୍ରହଣକାରୀ ଭାବରେ ସ୍ଥାନିତ କରିଛି।”
ଏହି କାର୍ଯ୍ୟକ୍ରମ ସମୟରେ, ସର୍ବାନନ୍ଦ ସୋନୋୱାଲ ଲାଇଟହାଉସ ପର୍ଯ୍ୟଟନ ପାଇଁ ଡିଜିଟାଲ ଟିକେଟିଂ ପୋର୍ଟାଲ ଆରମ୍ଭ କରିଥିଲେ, ଯାହା ୭୫ଟି ଲାଇଟହାଉସ ଗନ୍ତବ୍ୟବସ୍ଥଳରେ ପରିଦର୍ଶକଙ୍କ ପାଇଁ ଡିଜିଟାଲ ପ୍ରବେଶ, ସ୍ୱଚ୍ଛତା ଏବଂ ସୁବିଧାକୁ ସୁରକ୍ଷିତ କରିଥାଏ। ମନ୍ତ୍ରୀ ଉଲ୍ଲେଖ କରିଥିଲେ ଯେ, ଭାରତର ସମସ୍ତ ଲାଇଟହାଉସ ବର୍ତ୍ତମାନ ସୌରଚାଳିତ ଏବଂ ଗତ ଦଶନ୍ଧି ମଧ୍ୟରେ ଏହି ସ୍ଥାନଗୁଡିକରେ ପର୍ଯ୍ୟଟନ ଉଲ୍ଲେଖନୀୟ ଭାବରେ ବୃଦ୍ଧି ପାଇଛି।
ସର୍ବାନନ୍ଦ ସୋନୋୱାଲ ସମାବେଶକୁ କହିଥିଲେ, “ମୁମ୍ବାଇରେ ତୃତୀୟ ଆଇଏଏଲଏ ପରିଷଦ ଅଧିବେଶନ ଆୟୋଜନ କରିବା ଭାରତ ପାଇଁ ଅତ୍ୟନ୍ତ ଗର୍ବର ବିଷୟ। ସ୍ୱୟଂଶାସିତ ପରିବହନ, ଉପଗ୍ରହ-ଆଧାରିତ ନାଭିଗେସନ ସିଷ୍ଟମ ଏବଂ ଡିଜିଟାଲାଇଜେସନ ଭଳି ପ୍ରଯୁକ୍ତିବିଦ୍ୟା ଦ୍ରୁତ ଗତିରେ ବିକଶିତ ହେଉଥିବାରୁ, ନାଭିଗେସନ ମାନକଗୁଡିକର ବିଶ୍ୱସ୍ତରୀୟ ସମନ୍ୱୟରେ ଆଇଏଏଲଏର ଭୂମିକା ଆହୁରି ଗୁରୁତ୍ୱପୂର୍ଣ୍ଣ ହେଉଛି। ନିରାପଦ, ଦକ୍ଷ ଏବଂ ସ୍ଥାୟୀ ନାଭିଗେସନ ପାଇଁ ଭାରତ ଆଇଏଏଲ୍ଏ ସହିତ ଦୃଢ଼ ଭାବରେ ଠିଆ ହୋଇଛି।”
ପ୍ରମୁଖ ଜାତୀୟ ପଦକ୍ଷେପଗୁଡିକ ଉପରେ ଆଲୋକପାତ କରି, ସୋନୋୱାଲ ମାରିଟାଇମ ଇଣ୍ଡିଆ ଭିଜନ ୨୦୩୦ ଏବଂ ସାମୁଦ୍ରିକ ଅମୃତ କାଳ ଭିଜନ ୨୦୪୭ ଅନ୍ତର୍ଗତ ସଂସ୍କାରଗୁଡିକୁ ଉଲ୍ଲେଖ କରିଥିଲେ, ଯାହା ବନ୍ଦରଗୁଡିକର ଭିତ୍ତଭୂମିକୁ ସୁଦୃଢ଼ କରିବା, ଜାହାଜ ନିର୍ମାଣ କ୍ଷମତା ବୃଦ୍ଧି କରିବା, ପରିବହନ ଦକ୍ଷତା ବୃଦ୍ଧି କରିବା, ସବୁଜ ପରିବହନକୁ ପ୍ରୋତ୍ସାହିତ କରିବା ଏବଂ ଡିଜିଟାଲ ପରିବର୍ତ୍ତନକୁ ତ୍ୱରାନ୍ୱିତ କରିବା ଉପରେ ପର୍ଯ୍ୟବେସିତ। କେନ୍ଦ୍ରମନ୍ତ୍ରୀ ଆହୁରି କହିଛନ୍ତି ଯେ, ଏହି ପଦକ୍ଷେପଗୁଡିକ ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଭାରତର ଦୀର୍ଘକାଳୀନ ସାମୁଦ୍ରିକ ରଣନୀତିକୁ ପ୍ରତିନିଧିତ୍ୱ କରେ।
କେନ୍ଦ୍ରମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ନୌଚାଳନା ସହାୟତା ସାମୁଦ୍ରିକ ସୁରକ୍ଷାର କେନ୍ଦ୍ରବିନ୍ଦୁ ରହିଛି ଏବଂ ଭାରତ ବିକାଶଶୀଳ ସାମୁଦ୍ରିକ ଦେଶଗୁଡିକ ପାଇଁ ଆଧୁନିକ ଅଟୋଏନ ସିଷ୍ଟମ, ଡିଜିଟାଲ ନାଭିଗେସନ ସମାଧାନ ଏବଂ କ୍ଷମତା ନିର୍ମାଣରେ ନିବେଶ ଜାରି ରଖିଛି।
କେନ୍ଦ୍ର ମନ୍ତ୍ରୀ ସର୍ବାନନ୍ଦ ସୋନୋୱାଲ କହିଛନ୍ତି, “ଆମର ଯଶସ୍ୱୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାହସିକ ସଂସ୍କାର ଏବଂ ଅମୃତ କାଳ ପାଇଁ ଏକ ଭବିଷ୍ୟତମୁଖୀ ରୋଡମ୍ୟାପ ସହିତ ଭାରତର ସାମୁଦ୍ରିକ ପଥକୁ ପୁନଃପରିଭାଷିତ କରିଛନ୍ତି। ଲାଇଟ୍ହାଉସ ପର୍ଯ୍ୟଟନ ପାଇଁ ଡିଜିଟାଲ ଟିକେଟିଂ ହେଉ, ଆଧୁନିକ ନାଭିଗେସନ ସିଷ୍ଟମ କିମ୍ବା ସବୁଜ ପରିବହନ ପଦକ୍ଷେପ ହେଉ ପ୍ରତ୍ୟେକ ମାଇଲଖୁଣ୍ଟ ଭାରତକୁ ସୁରକ୍ଷିତ, ଦକ୍ଷ ଏବଂ ସ୍ଥାୟୀ ସାମୁଦ୍ରିକ ପରିଚାଳନାରେ ଅଗ୍ରଣୀ କରିବା ପାଇଁ ତାଙ୍କର ପ୍ରତିବଦ୍ଧତାକୁ ପ୍ରତିଫଳିତ କରେ।”
ଭାରତ ଆଇଏଏଲ୍ଏ ପରିଷଦର ଏକ ସକ୍ରିୟ ସଦସ୍ୟ, ଯିଏ ବୈଷୟିକ ସହଯୋଗ, ତାଲିମ ଏବଂ ବିଶ୍ୱ ମାନକ-ନିର୍ଦ୍ଧାରଣରେ ଯୋଗଦାନ ଦେଉଛି ତଥା ନିରାପଦ ନୌଚାଳନା ଅଭ୍ୟାସକୁ ବୃଦ୍ଧି କରିବା ପାଇଁ ଅନ୍ତର୍ଜାତୀୟ ଅଂଶୀଦାରମାନଙ୍କ ସହିତ ସହଯୋଗ କରୁଛି।
ମୁମ୍ବାଇରେ ତୃତୀୟ ଆଇଏଏଲ୍ଏ ପରିଷଦ ଅଧିବେଶନର ଆୟୋଜନ ବିଶ୍ୱସ୍ତରୀୟ ସାମୁଦ୍ରିକ ସହଯୋଗକୁ ସୁଦୃଢ଼ କରିବା ଏବଂ ନୌଚାଳନା, ସୁରକ୍ଷା ତଥା ସ୍ଥିରତାରେ ଅନ୍ତର୍ଜାତୀୟ ମାନକକୁ ଆଗକୁ ବଢ଼ାଇବା ପାଇଁ ଭାରତର ପ୍ରତିବଦ୍ଧତାକୁ ସ୍ପଷ୍ଟ କରୁଛି।