କୋଲକୋତା: ଆର୍ଜେଣ୍ଟିନା ଫୁଟବଲ୍ କିମ୍ବଦନ୍ତୀ ଲିଓନେଲ୍ ମେସିଙ୍କ ଇଭେଣ୍ଟ ସମୟରେ କୋଲକାତାର ସଲ୍ଟ ଲେକ୍ ଷ୍ଟାଡିୟମରେ ହୋଇଥିବା ବିଶୃଙ୍ଖଳା ପରେ ବଙ୍ଗଳା ସରକାରଙ୍କ କ୍ରୀଡା ମନ୍ତ୍ରୀ ଅରୂପ ବିଶ୍ୱାସ ତାଙ୍କ ପଦରୁ ଇସ୍ତଫା ଦେଇଛନ୍ତି। ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ଲେଖିଥିବା ଚିଠିରେ ଅରୂପ କହିଛନ୍ତି ଯେ, ଘଟଣାର ନିରପେକ୍ଷ ଏବଂ ସ୍ୱାଧୀନ ତଦନ୍ତ ସୁନିଶ୍ଚିତ କରିବା ପାଇଁ ସେ ଇସ୍ତଫା ଦେଉଛନ୍ତି। ତୃଣମୂଳ କଂଗ୍ରେସ ବରିଷ୍ଠ ନେତା କୁନାଲ ଘୋଷ କହିଛନ୍ତି ଯେ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟ କ୍ରୀଡା ମନ୍ତ୍ରୀ ଅରୂପ ବିଶ୍ୱାସଙ୍କ ଇସ୍ତଫା ଗ୍ରହଣ କରିଛନ୍ତି।
ଶନିବାର (ଡିସେମ୍ବର ୧୩, ୨୦୨୫) ଦିନ କୋଲକାତାର ସଲ୍ଟ ଲେକ୍ ଷ୍ଟାଡିୟମରେ ପ୍ରଶଂସକମାନେ ଉତ୍ସାହର ସହିତ ଲିଓନେଲ୍ ମେସିଙ୍କୁ ଅପେକ୍ଷା କରିଥିଲେ। ଅନେକ ପ୍ରଶଂସକ ମହଙ୍ଗା ଟିକେଟ୍ କିଣିଥିଲେ, କିନ୍ତୁ ଯେତେବେଳେ ମେସି ପହଞ୍ଚିଲେ, ତାଙ୍କୁ ଭିଆଇପିଙ୍କ ଭିଡ଼ ଘେରି ଯାଇଥିଲା। ମେସିଙ୍କ ଚାରିପାଖରେ ରାଜନେତା, ପୋଲିସ ଅଧିକାରୀ ଏବଂ ଭିଆଇପିଙ୍କ ଏକ ମାନବ ଘେରାବନ୍ଦୀ ସୃଷ୍ଟି ହୋଇଥିଲା, ଯାହା ଦର୍ଶକଙ୍କୁ ତାଙ୍କର ଗୋଟିଏ ଝଲକ ମଧ୍ୟ ଦେଖିବାକୁ ବାଧା ଦେଇଥିଲା। କ୍ରୋଧିତ ପ୍ରଶଂସକମାନେ ଷ୍ଟାଡିୟମରେ ଭଙ୍ଗାରୁଜା କରିଥିଲେ।
ପରିସ୍ଥିତି ନିୟନ୍ତ୍ରଣ ବାହାରକୁ ଚାଲିଯିବା ପରେ, ପୋଲିସ ପ୍ରବଳ ଲାଠିଚାର୍ଜ କରିଥିଲା। ଶାନ୍ତି ଫେରାଇ ଆଣିବା ପାଇଁ ରାପିଡ୍ ଆକ୍ସନ୍ ଫୋର୍ସ (RAF) କର୍ମଚାରୀମାନଙ୍କୁ ନିୟୋଜିତ କରାଯାଇଥିଲା। ଉତ୍ତେଜନା ପରେ, ମେସି ନିର୍ଦ୍ଧାରିତ ସମୟ ପୂର୍ବରୁ ଷ୍ଟାଡିୟମ ଛାଡି ଚାଲିଯାଇଥିଲେ। ଘଟଣା ସହିତ ଜଡିତ ଅଭିଯୋଗରେ ଇଭେଣ୍ଟର ମୁଖ୍ୟ ଆୟୋଜକ ଶତାଦୃ ଦତ୍ତଙ୍କୁ ଗିରଫ କରାଯାଇଥିଲା।