ଭୁବନେଶ୍ଵର: ଭୁବନେଶ୍ୱରରେ ଗୁରୁବାରଠାରୁ ଆଞ୍ଚଳିକ ଏଆଇ ପ୍ରଭାବ ସମ୍ମିଳନୀ ଆରମ୍ଭ ହୋଇଛି। ଏହା ଆସନ୍ତା 20 ତାରିଖ ପର୍ଯ୍ୟନ୍ତ ଚାଲିବ। ସମ୍ମିଳନୀର ପ୍ରଥମ ଦିନରେ କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ଆଇଟି ମନ୍ତ୍ରଣାଳୟ ଅଧୀନ ଇଣ୍ଡିଆ ଏଆଇ ମିଶନ ଏବଂ ଓଡ଼ିଶା ସରକାରଙ୍କ ସହଭାଗିତାରେ ‘ଏଆଇ ସମ୍ବଳର ସାର୍ବଜନୀନକରଣ ଉପରେ କାର୍ଯ୍ୟଗୋଷ୍ଠୀ ବୈଠକ’ ଅନୁଷ୍ଠିତ ହୋଇଛି। ଏହି ଅଧିବେଶନରେ ଇଜିପ୍ଟ ସହ ଅଧ୍ୟକ୍ଷତା କରିଥିବା ବେଳେ ଏଆଇ ସମ୍ବଳଗୁଡ଼ିକର ସାର୍ବଜନୀନକରଣ ଉପରେ ବିଶେଷ ଧ୍ୟାନ ଦିଆଯାଇଥିଲା। ଏହି କାର୍ଯ୍ୟଗୋଷ୍ଠୀ ବୈଠକରେ ବରିଷ୍ଠ ନୀତି ନିର୍ଦ୍ଧାରକ, ଶିଳ୍ପ ବିଶେଷଜ୍ଞ, ଶିକ୍ଷାବିତମାନେ ଅଂଶଗ୍ରହଣ କରିଥିଲେ। ସେମାନେ ଡାଟା ଭିତ୍ତିଭୂମି, କମ୍ପ୍ୟୁଟ୍ ଆକ୍ସେସ୍, ଦକ୍ଷତା ବିକାଶ ଏବଂ ଇଣ୍ଡିଆ ଏଆଇ ମିଶନ ଅଧୀନରେ କ୍ଷେତ୍ରୀୟ ଏଆଇ ନିୟୋଜନକୁ ନେଇ ରଣନୀତି ବିକଶିତ କରିବା ଲଗି ବିଚାରବିମର୍ଶ କରିଥିଲେ।
ଭାରତ ଏଆଇ ପ୍ରଭାବ ଶିଖର ସମ୍ମିଳନୀ କାର୍ଯ୍ୟଗୋଷ୍ଠୀ ଇଣ୍ଡିଆ ଏଆଇ ମିଶନର ଏକ ଗୁରୁତ୍ୱପୂର୍ଣ୍ଣ ଉପାଦାନ। ଏଥିରେ ସାତଟି ବିଷୟବସ୍ତୁ ଆଧାରିତ ମଞ୍ଚ ରହିଛି। ଏଥିରେ ସରକାର, ଶିଳ୍ପ, ଶିକ୍ଷା ଏବଂ ନାଗରିକ ସମାଜର ପ୍ରତିନିଧିମାନେ ଅଂଶଗ୍ରହଣ କରିବା ସହିତ ସାରା ଦେଶରେ ଏଆଇର ଗ୍ରହଣୀୟତାକୁ ନେଇ କାର୍ଯ୍ୟକାରିତା ଯୋଗ୍ୟ ରୂପରେଖ ବିକଶିତ କରିବାକୁ ନେଇ ଆଲୋଚନା କରିଥା’ନ୍ତି। ଏହି ଗୋଷ୍ଠୀଗୁଡ଼ିକ ମାନବ ପୁଞ୍ଜି, ସାମାଜିକ ସଶକ୍ତିକରଣର ଅନ୍ତର୍ଭୂକ୍ତିକରଣ, ସୁରକ୍ଷିତ ଏବଂ ବିଶ୍ୱସନୀୟ ଏଆଇ, ଦୃଢ଼ତା ଓ ନବୋନ୍ମେଷ ଏବଂ ଦକ୍ଷତା, ବିଜ୍ଞାନ ଏବଂ ଆର୍ଥିକ ବିକାଶ ଓ ସାମାଜିକ କଲ୍ୟାଣ ପାଇଁ ଏଆଇ ଉପରେ ଧ୍ୟାନ କେନ୍ଦ୍ରିତ କରିଥା’ନ୍ତି। ଭୁବନେଶ୍ୱରରେ ଆଜି ଅନୁଷ୍ଠିତ ଅଧିବେଶନରେ ଏଆଇ ସମ୍ବଳକୁ ସାର୍ବଜନୀନ କରିବା ଉପରେ ଧ୍ୟାନ କେନ୍ଦ୍ରିତ କରିଥିଲା। ମୌଳିକ ଏଆଇ ସମର୍ଥକଙ୍କର ସମାନ ଉପଲବ୍ଧତା ଉପରେ ସହମତିକୁ ପ୍ରୋତ୍ସାହିତ କରିବା ନେଇ ଅଧିବେଶନରେ ବିଚାରବିମର୍ଶ କରାଯାଇଥିଲା।
କାର୍ଯ୍ୟକ୍ରମରେ ଓଡ଼ିଶା ସରକାରଙ୍କ ଇଲେକ୍ଟ୍ରୋନିକ୍ସ ଏବଂ ଆଇଟି ମନ୍ତ୍ରୀ ଡକ୍ଟର ମୁକେଶ ମହାଲିଙ୍ଗ ଭାରତର ଜନକେନ୍ଦ୍ରିକ ଶାସନ ପାଇଁ ଏଆଇ ମିଶନ ଅନ୍ତର୍ଗତ ସାତଟି ଚକ୍ର ମଧ୍ୟରୁ ଅନ୍ୟତମ ରୂପେ ଏଆଇ ସମ୍ବଳକୁ ସାର୍ବଜନୀନ କରିବା ଉପରେ ଆଲୋକପାତ କରିଥିଲେ। ଏହି ଉଦ୍ଦେଶ୍ୟକୁ ସାକାର କରିବା ଦିଗରେ ଆଞ୍ଚଳିକ ଏଆଇ ପ୍ରଭାବ ସମ୍ମିଳନୀ ସହାୟକ ହେବ ବୋଲି ସେ କହିଥିଲେ।
ଓଡ଼ିଶା ସରକାରଙ୍କ ମୁଖ୍ୟ ସଚିବ ମନୋଜ ଆହୁଜା କହିଥିଲେ, ଭାରତର ସାର୍ବଜନୀନ ଡିଜିଟାଲ୍ ଭିତ୍ତିଭୂମି ଆଭିମୁଖ୍ୟ ସହିତ ସମନ୍ୱୟ ରଖିବା ସହିତ କମ୍ପ୍ୟୁଟ୍ ଏବଂ ତଥ୍ୟ ଭଳି ସୁଲଭ ସାର୍ବଜନୀନ ସାମଗ୍ରୀ ମାଧ୍ୟମରେ ନାଗରିକମାନଙ୍କୁ ସଶକ୍ତ କରି ଏଆଇ ସ୍ୱାଭାବିକ ଭାବରେ ବୁଦ୍ଧିମତ୍ତାକୁ ସାର୍ବଜନୀନ କରିଥାଏ।
ଭାରତ ସରକାରଙ୍କ ପରିସଂଖ୍ୟାନ ଏବଂ କାର୍ଯ୍ୟକ୍ରମ ରୂପାୟନ ସଚିବ ସୌରଭ ଗର୍ଗ ଫେବୃଆରୀରେ ଅନୁଷ୍ଠିତ ହେବାକୁ ଥିବା ଭାରତ ଏଆଇ ପ୍ରଭାବ ଶିଖର ସମ୍ମିଳନୀ ପାଇଁ ଓଡ଼ିଶା କାର୍ଯ୍ୟଗୋଷ୍ଠୀକୁ ଏକ ପ୍ରମୁଖ ପଦକ୍ଷେପ ବୋଲି ବର୍ଣ୍ଣନା କରିଥିଲେ । ଇଜିପ୍ଟ ଏବଂ କେନିଆ ସମ୍ମିଳନୀର ଅଧ୍ୟକ୍ଷତା କରିବାକୁ ଥିବା ବେଳେ 50ରୁ ଅଧିକ ଦେଶ ଏଥିରେ ଭାଗ ନେଇ ଏଆଇ ସମ୍ବଳକୁ ସାର୍ବଜନୀନ କରିବା ଦିଗରେ ରୂପରେଖ ଚୂଡ଼ାନ୍ତ କରିବେ।
ଆଜିର ଅଧିବେଶନରେ କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ଆଇଟି ମନ୍ତ୍ରଣାଳୟର ଯୁଗ୍ମ ସଚିବ ସୁଦୀପ ଶ୍ରୀବାସ୍ତବ, ଇଜିପ୍ଟ ଏଆଇ ପ୍ରଶାସନ ବିଶେଷଜ୍ଞ ଅହମ୍ମଦ ହେଫନୋଏ, ଆଇଆଇଟି ଭୁବନେଶ୍ୱର ନିର୍ଦ୍ଦେଶକ ପ୍ରଫେସର ଶ୍ରୀପଦ କର୍ମାଲକରଙ୍କ ସମେତ ଭାରତ ଏବଂ ଓଡ଼ିଶା ସରକାରଙ୍କ ବରିଷ୍ଠ ଅଧିକାରୀ, ଏଆଇ ବିଶେଷଜ୍ଞ, ଶିକ୍ଷାବିତ୍ ଏବଂ ଶିଳ୍ପ ପ୍ରତିନିଧିମାନେ ଅଂଶଗ୍ରହଣ କରି ସୁଚିନ୍ତିତ ମତ ଉପସ୍ଥାପନ କରିଥିଲେ।
ଏହା ପରେ ନାସକମର ନିର୍ଦ୍ଦେଶକ ପ୍ରବୀଣ ମୋକ୍କାପତିଙ୍କ ଦ୍ୱାରା ପରିଚାଳିତ ଏଆଇ ସମ୍ବଳର ସାର୍ବଜନୀନକରଣ ଉପରେ ଏକ ପ୍ୟାନେଲ ଆଲୋଚନା ହୋଇଥିଲା। ଏଥିସହିତ ରୁଦ୍ଧଦ୍ୱାର କାର୍ଯ୍ୟଗୋଷ୍ଠୀ ବୈଠକ ମଧ୍ୟ ଆୟୋଜନ କରାଯାଇଥିଲା। ଆସନ୍ତା ଫେବୃଆରୀ 15-20, 2026ରେ ନୂଆଦିଲ୍ଲୀରେ ଭାରତ ଏଆଇ ପ୍ରଭାବ ଶିଖର ସମ୍ମିଳନୀ ଅନୁଷ୍ଠିତ ହେବ। ଏଥିପୂର୍ବରୁ ଆଜିର କାର୍ଯ୍ୟଗୋଷ୍ଠୀ ବୈଠକ ଏକ ଅନୁକୂଳ କ୍ଷେତ୍ର ପ୍ରସ୍ତୁତ କରିଛି। ଏହା 2047 ସୁଦ୍ଧା ବିକଶିତ ଭାରତ ନିର୍ମାଣ ଦିଗରେ ଦେଶର ଅଗ୍ରଗତି ସକାଶେ ଏକ ବ୍ୟାପକ, ନୈତିକ ଏଆଇ ନିୟୋଜନ ଲାଗି ଭାରତ ସରକାରଙ୍କ ପ୍ରତିବଦ୍ଧତାକୁ ଦୋହରାଇଛି।