ପୂର୍ବତନ ଅର୍ଥ ମନ୍ତ୍ରୀ ତଥା ବିଜେପିର ବରିଷ୍ଠ ନେତା ଅରୁଣ ଜେଟଲୀଙ୍କୁ ଦିଲ୍ଲୀ ସ୍ଥିତ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥା(ଏମ୍ସ)ରେ ଭର୍ତ୍ତି କରାଯାଇଛି। ଅରୁଣ ଜେଟଲୀଙ୍କୁ ଶୁକ୍ରବାର ହସ୍ପିଟାଲରେ ଭର୍ତ୍ତି କରାଯାଇଥିଲା। ଆଜି ଏମ୍ସ ଅରୁଣ ଜେଟଲୀଙ୍କ ମେଡିକାଲ ବୁଲେଟିନ୍ ମଧ୍ୟ ଜାରି କରିଛି। ଏମ୍ସର କହିବା କଥା ଅରୁଣ ଜେଟଲୀଙ୍କ ସ୍ଵାସ୍ଥ୍ୟବସ୍ଥା ସ୍ଥିର ରହିଛି ଏବଂ ଏବେ ସେ ଆଇସିୟୁରେ ଅଛନ୍ତି। ଶନିବାର ସକାଳୁ ସକାଳୁ ଉପରାଷ୍ଟ୍ରପତି ଭେଙ୍କେୟା ନାଇଡୁ ଏମ୍ସରେ ପହଞ୍ଚି ଜେଟ୍ଲୀଙ୍କ ସ୍ବାସ୍ଥ୍ୟବସ୍ଥା ସମ୍ପର୍କରେ ପଚାରି ବୁଝିଛନ୍ତି । ସୂଚନା ମୁତାବକ ନିଃଶ୍ଵାସ ପ୍ରଶ୍ଵାସରେ କଷ୍ଟ ଅନୁଭବ କରିବା ପରେ ଅରୁଣ ଜେଟଲୀଙ୍କୁ ଶୁକ୍ରବାର ଏମ୍ସରେ ଭର୍ତ୍ତି କରାଯାଇଥିଲା। ଅରୁଣ ଜେଟଲୀଙ୍କ ଚିକିତ୍ସା ଟ୍ରିଟମେଣ୍ଟ ଆଣ୍ଡ୍ରୋକ୍ରିନୋଲୋଜିଷ୍ଟ ନେଫ୍ରୋଲୋଜିଷ୍ଟ ଓ କାର୍ଡିଅଲୋଜିଷ୍ଟ ଡାକ୍ତରଙ୍କ ତତ୍ଵାବଧାନରେ ଚାଲିଛି। ଜେଟଲୀଙ୍କ ସ୍ଵାସ୍ଥ୍ୟବସ୍ଥା ପଚାରି ବୁଝିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ସ୍ଵାସ୍ଥ୍ୟମନ୍ତ୍ରୀ ଡ. ହର୍ଷବର୍ଦ୍ଧନ, ଗୃହ ମନ୍ତ୍ରୀ ଅମିତ୍ ଶାହା ଓ ବାଚସ୍ପତି ଓମ ବିର୍ଲା ମଧ୍ୟ ଏମ୍ସ ପହଞ୍ଚିଥିଲେ। ଦୁଇ ବର୍ଷ ହେବ ଅରୁଣ ଜେଟଲୀ ଅସୁସ୍ଥ ଅଛନ୍ତି। ସେ ସଫ୍ଟ ଟିସୁ କର୍କଟ ରୋଗରେ ପୀଡ଼ିତ ଅଛନ୍ତି। ଅରୁଣ ଜେଟଲୀ ଗତ ମୋଦି ସରକାରରେ ଅର୍ଥ ମନ୍ତ୍ରଣାଳୟ ସହିତ କିଛି ସମୟ ପାଇଁ ପ୍ରତିରକ୍ଷା ବିଭାଗ ମଧ୍ୟ ସମ୍ଭାଳିଥିଲେ। ମାତ୍ର ଅସୁସ୍ଥତା କାରଣରୁ ଏଥର ସେ ମୋଦିଙ୍କ ମନ୍ତ୍ରିମଣ୍ଡଳରେ ସାମିଲ ହୋଇନଥିଲେ। ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଚିଠି ଲେଖି ମନ୍ତ୍ରିମଣ୍ଡଳରେ ସାମିଲ ହେବାକୁ ମନା କରି ଦେଇଥିଲେ।
